例牌為咗布置同準備食物，我哋一家四口一早就返咗公公婆婆屋企，而為咗隆重其事，艾菲特別準備咗條紗裙畀妹妹著住出門口，又其實呢條不過係淘返來嘅後備裙，艾菲原先諗住條tutu裙萬一整唔成，又或者玩完cake smash有咩意外著唔返就著佢，點知條tutu裙玩完cake smash洗完之後仲keep到喎，咁當然要喺生日會到畀BB豆豬著多次，所以呢條靚靚紗裙就只可以喺出門口同返屋企來回時著。
至於另一主角表姐仔，都因為姨媽姨丈呢朝仲要返工，一早就來咗公公婆婆屋企，而正直trouble 2同terrible 3中間嘅表姐仔，就因為著咩衫開party嘅問題同姨媽堅持咗好耐，姨媽想佢迎合黃色嘅主題著返黃色裙，但公主迷嘅表姐仔就堅持著Elsa裙，於是艾菲就叫佢兩條裙都拎晒來，喺生日會開始前叫佢著Elsa裙畀艾菲同佢影吓沙龍當著咗，到正式時換返靚靚黃色裙就無問題啦，kakaka...
由於今次嘅生日會主題係黃色，所以艾菲就喺淘寶淘盡所有啱主題嘅黃色物資返來，有生日帽，紙碟，枱布，益力多貼，tissue paper波同啦啦球掛飾之類，但原來最後兩樣要整得靚都堅係花時間，終於搞咗成個下午先KO布置嘅部分。
另外仲特登淘咗幾個大熱Emoji波波返來影相用，燒腩仔同表姐仔見到開心到不得了，一個搶住要個笑到喊，一個就話自己係心心眼，但艾菲平日都好鐘意用黑超人就畀佢哋話唔靚而掟埋一邊。
到差唔多夠鐘就同兩個小主角換衫準備出場啦﹗又佢兩個頭上嘅頭飾，都係艾菲忽然心血來潮整，諗起佢兩個應該唔會肯全程帶住頂生日帽，所以整兩個頭飾畀佢哋喺唔帶帽時帶，等個頭無咁空洞洞，又可以配合返黃色嘅主題。
至於個生日蛋糕就係表姐仔自己揀，公主迷堅持非呢個城堡蛋糕不要，本身燒腩仔婆婆極力反對，擔心屋企雪櫃放唔落，結果我哋決定開party前先切蛋糕同食蛋糕，咁就唔使擔心雪櫃放唔落嘅問題啦﹗又切蛋糕前先來張一家四口全家福先﹗YEAH！
大家有同過小朋友開生日會嘅都應該知，影大合照同唱生日歌實在需時，BB豆豬耐性亦有限，好彩我哋一早準備咗無限量星星餅，呢個小吃貨keep住食先無咇兩滴眼淚出來咋，不過就全部相都影到佢食緊手指囉>.<。
由於表姐仔揀呢個城堡蛋糕實在太高，我哋點蠟燭時佢就好搞笑咁同姨媽投訴話佢「乜都睇唔到」，然後唱完生日歌就要特登抱佢過對面先吹到蠟燭。
到大家食蛋糕時，BB豆豬又點會執輸只望唔食，姨媽都未分完個蛋糕，佢話咁快已經啪咗兩粒士多啤梨，仲要食多少少蛋糕先肯罷休﹗
食物照舊係pizza hut外賣，加婆婆招牌茶葉蛋同滷水雞翼，燒腩仔大廚煮理嘅薯仔沙律同菠蘿腸仔，至於艾菲就搞搞新意思學人整沙嗲雞肉串燒，不過D肉焗到太乾應該唔會再有下次，而甜品就有燒腩仔睇完roadshow教整後，不停追問艾菲幾時得閒同佢一齊整嘅一口小米通，佢仲好搞笑咁係咁sell大家食佢有份整嘅嘢食添﹗
艾菲一直忙到食飽飯，先記得兼有時間同呢兩兄妹影吓相，每次睇見佢哋嘅互動就有種莫名嘅感動，雖然佢哋有交流嘅時間仲未係好多，哥哥亦成日失驚無神蝦妹妹整喊人，但媽媽知道你哋心底裡都有著對方嘅，期待你哋喺來緊日子入面有更多相親相愛嘅畫面。
忽發奇想幫四個小朋友影返張大合照，估唔到一首Happy Birthday就搞掂佢哋，對比返第一次幫燒腩仔搞生日會時，宜家嘅陣容真係強大同熱鬧好多，併埋三個妹妹一齊更顯得燒腩仔好大個仔呢﹗
沒有留言:
張貼留言