來鯉魚門必到playroom放電，一入場即趁無人就放BB豆豬落去船仔到影相。
唔使一分鐘，燒腩仔都爬埋入來，兩兄妹拍拖撐船仔。
好似好有愛嘅畫面，實情呢...哥哥係蝦緊妹妹，意圖拉開妹妹隻手等佢跌低，好彩艾菲全程監視加出口術，哥哥先唔敢亂來。
轉過頭燒腩仔已經出咗去同其他小朋友一齊搶cushion，而呢個企都未企得穩嘅BB豆豬都唔識死咁學人搶埋一份，仲好勁咁成功畀佢擒到上去添﹗
其實來playroom玩，艾菲私心係想BB豆豬試吓鬆手自己企，結果佢都係爬爬爬爬爬...
然後玩玩吓，哥哥唔知做咩好堅持要將舊cushion推上滑梯塞住條路，跟住妹妹都無有怕咁爬埋上去。
不過sir咗一次之後發現唔好玩，BB豆豬就無再爬上去，只係企側邊睇哥哥玩。
至於燒腩仔就又玩到癲晒，霸完條滑梯再返去霸架船仔，話佢自己坐緊司機位，其他人上船都只可以坐佢後面喎...
放夠電就捉佢哋一齊行入村，睇吓海鮮食吓嘢，再去心願樹隔離個公園仔玩多陣。
之後就行入燈塔睇日落，可能係公眾假期關係，呢日石灘個位係超級多人，每張相影到嘅都係人同人。
趁BB豆豬玩完瞓著咗，影返張我們四先，唔知佢幾時肯落地行唔使艾菲揹呢？
影返張夕陽無限好都係指定動作，不過好似點影都唔夠靚咁，睇來要再同枝新鏡溝通多D先得。
之後行返出去，見跳飛機個位終於無人，就叫燒腩仔埋去玩順便影吓相，呢張相本來艾菲係捕緊佢擰轉頭跳落個9到嘅正面相，點知佢玩估你唔到嘅倒後跳，結果就成就咗張咁有feel嘅跳飛機相。
到跳另一個飛機時，佢一見到個天字就話要咁整，又其實點解跳飛機要有天同地呢兩個字呢，哈哈...
沒有留言:
張貼留言