一連幾日嘅復活節假期，難得米高唔使返工可以放足四日，點都要安排D家庭活動出去玩，第一日天文台預告天氣差所以瑣定咗呢日同BB豆豬玩cake smash，到第二朝太陽伯伯終於捨得出來，即執齊細軟出發去野餐，今次揀咗啟德跑道公園呢邊，我哋雖然十一點幾先到，但大草地都未算好多人，感覺無佐敦谷咁逼，而且呢日有太陽又有涼風，好舒服呀﹗
上次去佐敦谷唔記得帶帳蓬，今次終於記得拎，可以遮太陽又感覺有返D私隱，絕對係野餐必備好物，眼見隔離D人有凳有枱裝備更齊全，不過呢D嘢無私家車的話真係拎唔掂，所以艾菲都係羨慕吓就算。
我哋未set好嘢，燒腩仔已經急不及待要出去玩，但大頭蝦嘅艾菲今次又唔記得拎個波出來，只係帶得呢把泡泡劍，好彩把劍都好襟玩無被投訴。
至於為食妹妹呢，就趁哥哥出咗去玩時不停偷食，米高不過喺個袋到搣咗少少法包畀BB豆豬試，佢之後就識自己追住個袋搵食，又我哋專登唔幫佢搣，佢都有本事自己搣到來食，吃貨果然係吃貨。
小朋友有法包，大人都有好西食，但艾菲明明係想自己整壽司飯糰去野餐，最終都係屈服聽米高講買現成算。
除咗正餐，有個爸爸仲帶咗大量零食去收買個仔，結果有人係一粒接一粒咁食到唔停口囉﹗
終於要收起個包先趕到佢哋出去玩，心血來潮叫燒腩仔影張跳起相，一take就搞掂﹗YEAH!
跟住出場嘅有開心妹﹗坐喺同一塊草地，事隔四個月真係差好遠﹗
成日四萬咁口﹗想電暈媽媽咩﹗
仲未識自己企起身，但就成日有學大人企嘅意圖。
其實妹妹好唔鐘意草地嘅質感，一開始甚至唔肯坐喺草地，全靠偉大嘅法包安撫先成功坐到陣，然後話都無咁快就想走佬，幾經掙扎後先衝破心理關口爬返來我哋到，叻叻﹗
哥哥玩到無嘢好玩，話要拎把泡泡劍表演跳舞我哋睇，但你點睇都似耍緊太極劍多D喎，kakaka...
之後越玩越癲，係咁踩同騎上米高身，仲無啦啦著咗艾菲對鞋走咗去...
玩到三點幾，開始越來越多人，個天又慢慢轉陰天，我哋就執嘢走啦，米高順手㩒機買咗枝檸檬茶返來，有個為食妹妹興奮到企咗起身，但你都無份飲咁緊張做咩呢？而哥哥就好乖仔話要幫我哋拎個帳蓬，不過揹咗都無十步已經話重除返落來囉，嘻...
後記：一向怕曬怕蚊嘅艾菲，呢日當然同自己做足防曬同防蚊措施，偏偏無同兩個小朋友搽防曬，結果兩隻豬仔都唔覺唔覺咁曬濃咗返來，BB豆豬對手更加變咗兩截色，明顯佢D皮膚似爸爸多D容易曬黑（哥哥似艾菲曬極唔黑），以後出街真係要緊記同佢搽防曬，點講都係女仔來，要keep住白白滑滑先得㗎嘛﹗
沒有留言:
張貼留言