2017年7月20日 星期四

探索大自然遊學園x動物農莊2017

啱啱個星期日我哋去咗探索大自然遊學園X動物農莊2017,由於上個星期艾菲同BB豆豬中咗流感,食咗藥好返好多但唔知做乜每日都會忽然燒一燒,而呢朝六點幾我哋兩母女又燒到38度,不過好彩食完退燒藥轉眼就退咗,掙扎咗好耐去唔去好,眼見燒腩仔好期待,艾菲同BB豆豬又好精神,呢日睇開嘅家庭醫生亦無開,咁唔玩喺屋企都係數手指,咁不如照去玩啦﹗



其實點解燒腩仔咁期待呢,因為活動喺機場博覽館舉行,憑入場卷小朋友可以免費坐機鐵來回,平日聽艾菲坐機鐵去博覽館處理私務就聽得多(大人由屋企坐港鐵去青衣站轉車來回只需$47其實都幾抵,所以艾菲有需要入去博覽館都一定係坐機鐵),今次終於可以一齊坐,呢個小朋友一到機鐵站已經想衝入去,上到車又笑到咔咔聲超興奮,把口全程無合埋過不停問東問西。



一轉眼我哋就到咗啦﹗唔知BB豆豬會唔會瞓,所以入場前影張相留念先﹗(結果佢係全程唔肯瞓,直至我哋走就九秒九暈低)

2017年7月19日 星期三

Blog Blog BB Big Party@Mikiki PlayHouse

反正追極都追唔切之前D blog,不如寫返D近期少少嘅嘢先,免得遲吓拖拖吓失憶無咗件事,而最近嘅大事又點少得一班Blog Blog BB嘅gahtering呢,大家對上一次約出來玩好似已經係陀住妹妹嘅事,今次真係要感激小檬媽嘅安排同Little K媽嘅幫忙,我哋先book到聽聞好難book嘅Mikiki Play House玩,仲安排得咁周到等艾菲可以安心食安心吹水﹗



今次來呢個gathering其實都有D驚險㗎,話說艾菲前一晚開始作病仲嘔咗兩次,幾乎以為自己來唔到勁唔開心,好彩瞓醒一覺又無事好精神喎,咁難得可以同大家一聚當然即刻換衫出發,Mikiki好近我哋屋企,上車唔使十分鐘就到,一入去就會見到大大個波波池,燒腩仔二話不說除咗鞋就衝咗入去,不過艾菲抱住第一次玩波波池嘅BB豆豬,就喺池邊呆咗好耐好耐...



眼見BB豆豬無乜反應,米高終於忍唔住捉咗佢上去Sir滑梯,Sir完又好似好少少喎,無笑但至少無咁呆囉,又其實點解米高可以咁得閒唔使睇仔呢?呢個真係要一讚呢到嘅設計,全場只得波波池一個出入口,要上上面玩迷宮同射波,甚至後面玩韆鞦都一定要穿過波波池,而樓上大部分嘅位置都係好開揚,只需輕輕抬一抬頭就可以望到小朋友去咗邊,再加上人流控制唔錯,呢朝我哋玩嘅時段絕大部分都係自己blog blog bb,其他小朋友入場人數唔多唔會好逼,所以米高都好放心由燒腩仔自己玩。

14個月



呼~我同媽媽終於都病好啦,宜家D病菌真係好惡毒,醫生話我同媽媽都中咗流感,食完藥好D但持續燒咗成個星期先終於斷尾唔再燒,由七月一日爸爸第一個中招,之後到哥哥再到媽媽同我,成家人keep住喺混亂之中過日子,無啖好食又無人執屋,大家想像到我哋嘅日子係過得幾咁黑暗嗎?



又遲咗兩星期先出場,第一件事當然係講吓我食嘢嘅進度啦,宜家照舊早晚一餐奶埋身食,下午茶奶就食又得唔食又得,視乎媽媽得唔得閒同使唔使我即刻瞓,奶癮唔係好大,不過終於學識自己搵食,有時喺街到會手多多郁手,所以我宜家一撲埋媽媽身,佢就會即刻好警覺咁望實我,kakaka...

固體照舊食足三餐,午餐晚餐座底一碗有菜有肉嘅爛飯,下午茶就麵包水果餅乾乳酪,一見大人食嘢就會無執輸咁走去擒high chair,示意大人放我上去坐底一齊食,無得一齊食的話我會發難爆喊,好食得但又唔係乜都食,比較淋身嘅食物唔太有興趣,鐘意有咬口嘅嘢,最好係大大舊畀我自己拎住食,亦已經學識自己用匙羹筆食物,基本上可以自己完成三分二碗飯(艾菲:當然會整到周圍係,但個污糟程度係可接受程度來嘅)。

2017年7月10日 星期一

花女@九龍公園

繼續努力清埋五月嘅blog,堅持堅持再堅持,暫時都未想放棄呢到,但時間太少實在寫唔切,所以大家要久等一下啦...



話說艾菲每隔一排都會想同佢哋兩兄妹影吓相,難得五月呢個星期日天氣好又得閒,於是米高就安排咗我哋去九龍公園,來到公園第一站係睇雀,BB豆豬宜家好鐘意睇D識郁嘅嘢,睇魚睇雀佢都好like。



睇睇吓忽然自己笑到咔咔聲,無乜儀態可言不過媽媽好喜歡,就連哥哥都畀佢搞到無眼睇,kakaka...

2017年7月6日 星期四

出走澳門Day2 ~ part2



離開燒灰爐公園後,我哋就去咗紅街市附近嘅新龍記,為嘅就係去食佢個蟹王撈麵,嘩嘩嘩﹗香口到呢...艾菲仲要雙併配墨魚餅,簡直係人間極品,至於個豬扒包就係專登叫畀燒腩仔食,望落好似好燶咁,不過燒腩仔就話好好味。



話明唔係玩就食,所以食完撈麵我哋再逼巴士去咗大三巴嗰邊,尋找米高一直念念不忘嘅洪馨椰子雪糕,繼椰子同芒果味後佢哋又出咗芋頭呢個新味,不過經驗話畀艾菲知最穩陣都係食返椰子味,果然係一如既往嘅正﹗讚﹗讚﹗讚﹗

2017年7月5日 星期三

出走澳門Day2 ~ part1



第二朝安排咗去坐松山纜車,不過一覺瞓醒竟然落大雨﹗由於艾菲每次去澳門都好邪咁遇著雨神(中嘅比率接近九成半,打風都試過兩次),所以都一早準備咗plan B去科學館,但我家天文台台長米高研究咗輪,決定如期出發話落雨仲好少D人喎,咁我哋就冒住雨去咗纜車站附近嘅玫瑰咖啡室食早餐,呢到係睇台灣blogger介紹,咪睇佢外表殘殘舊舊咁,碗豬扒雞翼公仔麵係好味到一個點,即點解呢D味永遠喺香港茶餐廳食唔返㗎呢???



食完早餐出來,竟然停﹗咗﹗雨﹗﹗﹗嘩﹗今次個天真係錫住我哋呀﹗YEAH!

2017年7月3日 星期一

出走澳門Day1



話說前排湊仔湊到好depress,情緒真係差到想乜都唔理走咗去,自己一個同BB豆豬來個出走台灣(佢早晚埋身食奶飛唔甩啦),不過畀米高問艾菲一個人顧得BB車定顧得行李,事實的確如此只好打消念頭,又其實暑假都已經去個長旅行,實在好難說服米高畀艾菲去個短trip,終於借慶祝BB豆豬生日做藉口,成功爭取喺BB豆豬生日後第二日出發去澳門兩日放個假﹗



今次去澳門,目標好明確就係食同玩,好記得檬媽介紹過滑草,香港無得玩一場來到點都要試,所以落船即去澳門機場快食個麥當勞,然後就衝上大潭山郊野公園。