14個月

呼~我同媽媽終於都病好啦，宜家D病菌真係好惡毒，醫生話我同媽媽都中咗流感，食完藥好D但持續燒咗成個星期先終於斷尾唔再燒，由七月一日爸爸第一個中招，之後到哥哥再到媽媽同我，成家人keep住喺混亂之中過日子，無啖好食又無人執屋，大家想像到我哋嘅日子係過得幾咁黑暗嗎？



又遲咗兩星期先出場，第一件事當然係講吓我食嘢嘅進度啦，宜家照舊早晚一餐奶埋身食，下午茶奶就食又得唔食又得，視乎媽媽得唔得閒同使唔使我即刻瞓，奶癮唔係好大，不過終於學識自己搵食，有時喺街到會手多多郁手，所以我宜家一撲埋媽媽身，佢就會即刻好警覺咁望實我，kakaka...

固體照舊食足三餐，午餐晚餐座底一碗有菜有肉嘅爛飯，下午茶就麵包水果餅乾乳酪，一見大人食嘢就會無執輸咁走去擒high chair，示意大人放我上去坐底一齊食，無得一齊食的話我會發難爆喊，好食得但又唔係乜都食，比較淋身嘅食物唔太有興趣，鐘意有咬口嘅嘢，最好係大大舊畀我自己拎住食，亦已經學識自己用匙羹筆食物，基本上可以自己完成三分二碗飯（艾菲：當然會整到周圍係，但個污糟程度係可接受程度來嘅）。



第二樣要講嘅就係瞓覺，依然係十點半十一點左右食最尾一餐奶，食完奶有時明明攰到暈低咗，但媽媽一抱我落床我就會即刻醒，然後玩到成一點畀媽媽逼先喊晒口咁瞓，跟住又忽然有幾晚凌晨四點就醒，爬上大人床笑晒口咁搵媽媽飲奶，點知媽媽一聲未夠鐘又趕返我落床，瞓到七點左右食朝早奶，再直接瞓到十點幾哥哥起身我又跟住起身。

至於晏覺呢，有街出的話基本上頂盡只係瞓到一個鐘，尤其係去多小朋友嘅地方，就算啱啱瞓著都會即醒，如果喺屋企就視乎哥哥合唔合作，佢唔嘈住我唔激嬲媽媽的話我都瞓到兩個鐘，佢唔合作衝入來叫我同媽媽的話又係一個鐘就醒，媽媽話好彩哥哥呢排興起想跟我哋一齊瞓晏覺（艾菲：其實係有人逃避想唔做媽媽畀佢嘅美勞功課啦），所以有時可以三母子齊齊瞓成兩個幾鐘晏覺，都幾sweet幾爽㗎﹗



依然係超級黐媽嘅小朋友，媽媽有事要出去時都可以跟爸爸同爺爺嫲嫲或公公婆婆，但就會不時望住個大門明顯等緊媽媽返，然後到佢真係返來時會唔理三七廿一丟低晒所有嘢撲出去攬佢（艾菲：都幾sweet㗎﹗），開始有自己性格同脾氣，有咩唔啱心水唔滿意，會好似哥哥當年咁撞個頭落地（堅係撞到嘭嘭聲額頭紅晒咁），有時做咗D衰嘢驚畀人鬧又會無蝕底咁喊咗先，不過媽媽話我個人都好醒目，算係識睇人眉頭眼額，稍為惡D話我會縮，知衰就會收聲，唔似哥哥當年撐到行，應該會相對易搞少少喎。



活動能力繼續係A++級別，已經識得自己行，日日喺間屋到行來行去，識得喺BB床爬出大人床（已經拉高咗個床欄都爬到），再自己爬落大人床行出房，又識得喺high chair到擒出來，仲要學識咗點樣打開廳個圍欄，宜家基本上無嘢可以阻到我嘅去路，媽媽宜家行開行埋入廚房洗手間都要不時聽住出面嘅聲睇吓我喺邊做緊咩，有時哥哥都會幫到吓眼望一陣嘅...



大小手肌發展得幾好，媽媽一教我疊高高就即刻學識，玩煮飯仔識得用茶壺倒茶落水杯，再同人飲杯先飲，開始識得自己入形狀，換完片會自己拎條片去垃圾桶丟，換衫會自動波舉高手，會自己㩒D玩具按鈕去開歌聽，可以自己上落騎Rody唔使人幫，玩豬仔車亦有意識自己用腳去行，宜家學緊幫忙收拾玩具，不過要心情好先肯幫手，否則都係會丟到一地玩具同書就走咗去。



金口依然未肯開，不過今個月好少少，間中會聽到我叫「媽媽」，唔知有無意識，通常係搵食時情急下叫，爸爸媽媽無話好擔心，只係好奇怪點解哥哥咁多野講，偏偏會有個唔願講嘢嘅妹妹，亦發覺因為我未識講嘢，有時溝通上會出現D誤會而令我好忟憎，但佢哋都知除咗等之外無咩可以做，頂多歲半去健康院唔合格之後返多去一次咁話。



最後講埋我同哥哥嘅互動，由於哥哥已經放緊暑假，所以我哋宜家真係日日朝夕相對咁滯，亦因為咁好自然地多咗好多磨擦，每日媽媽都會聽到我好幾次忽然尖叫爆喊，唔會好長通常只係半分鐘左右，佢就知哥哥又出手搞我來，雖然哥哥成日失驚無神整鬼我，其實佢個心都好錫我嘅，有好嘢食都會同我一齊分享，至於我都好關心佢㗎，除咗成日望住佢搞咩，有次佢扭計唔肯著鞋出門口搞到畀媽媽鬧，我都即刻拎起佢對襪遞畀佢示意佢乖乖著鞋唔好搞事（艾菲：呢吓真係睇到媽媽好驚喜好感動呢﹗真係無諗過咁細個嘅BB會識咁多嘢﹗） ，嘻...難兄難妹係唔係就係咁樣練成㗎？