今次來呢個gathering其實都有D驚險㗎，話說艾菲前一晚開始作病仲嘔咗兩次，幾乎以為自己來唔到勁唔開心，好彩瞓醒一覺又無事好精神喎，咁難得可以同大家一聚當然即刻換衫出發，Mikiki好近我哋屋企，上車唔使十分鐘就到，一入去就會見到大大個波波池，燒腩仔二話不說除咗鞋就衝咗入去，不過艾菲抱住第一次玩波波池嘅BB豆豬，就喺池邊呆咗好耐好耐...
眼見BB豆豬無乜反應，米高終於忍唔住捉咗佢上去Sir滑梯，Sir完又好似好少少喎，無笑但至少無咁呆囉，又其實點解米高可以咁得閒唔使睇仔呢？呢個真係要一讚呢到嘅設計，全場只得波波池一個出入口，要上上面玩迷宮同射波，甚至後面玩韆鞦都一定要穿過波波池，而樓上大部分嘅位置都係好開揚，只需輕輕抬一抬頭就可以望到小朋友去咗邊，再加上人流控制唔錯，呢朝我哋玩嘅時段絕大部分都係自己blog blog bb，其他小朋友入場人數唔多唔會好逼，所以米高都好放心由燒腩仔自己玩。
再加上呢日有Little K爸爸一齊玩，佢好nice咁不停撩燒腩仔玩，用佢嘅熱情將原本好cool唔多理人嘅燒腩仔溶化，兩個喺樓上笑到咔咔聲咁玩波，所以米高就可以剩機偷一偷懶啦，Yeah！
可能大家真係太耐無見，燒腩仔今次有D獨家村，成日自閉一個人走咗去波波池後面玩韆鞦，所以大家都話唔係好搵到佢。
好彩食完嘢之後返去就開始好少少，warm up完肯玩吓其他嘢，媽媽喺餐廳同大家吹水時仲忽然見到佢同大爺喺樓上追逐添﹗
之後仲喺波波池海入面捉咗條鯊魚，同肚B一齊騎住Sir咗好多次滑梯添呀﹗
至於第一次參加Blog Blog BB gathering嘅BB豆豬，食飽飯心情都明顯好D，喺星星餅嘅利誘下終於肯畀小檬媽同豬脾媽抱一陣。
然後就同峰峰一齊，好乖豬咁邊啪星星餅，邊等媽媽同Blog友仔吹水，而有個為食妹妹仲好快手咁，偷咗小檬媽盒果汁飲咗幾啖呀﹗（哈哈...你以後要聽姨姨話啦﹗）
真心覺得今次個場超級正，玩樂區同用餐區分明，而且BB凳絕對充足，又有換片嘅地方，非常方便我哋呢D帶住細B嘅家庭，重點係食物都唔差，雖然艾菲只係食咗件pizza（前一晚嘔完唔敢食太多），但賣相同味道都好吸引，米高有試埋個意粉都話OK。
來到尾聲當然要影返張大合照啦，不過...相入面有兩個小朋友就有D爭執囉...艾菲了解完應該都係D小誤會，你逼到我我又逼返你咁啦，燒腩仔性格係幾掘唔容易讓步，所以塊面已經即時黑晒，好彩事後都肯同小寶握返手做返朋友，雖然當時係有D掃興，不過諗深一層都係佢哋大個仔嘅表現呀，開始有自己嘅主意，無話次次都咁合作，希望佢哋經一事長一智，下次再見時會更識得處理呢D場面啦﹗
沒有留言:
張貼留言