搞掂張通行證後，我哋就即刻入場睇羅浮宮展，呢個展艾菲想睇好耐㗎啦，不過周末假日超多人實在唔敢來，而且估都估到無乜藝術氣質嘅燒腩仔應該唔會有興趣，所以一拖再拖就拖到六月，計來計去都無辦法夾到時間自己來，唯有硬住頭皮拖埋佢兩個入場啦...
場內唔可以影相，燒腩仔亦如艾菲估計零興趣，全程不停叫好驚好悶想走（入面燈光較暗），煩到艾菲勁想搵人拖走佢，所以行到中段見到蒙羅麗莎幅電子畫，終於忍唔住嚇佢話蒙羅麗莎望住佢，叫佢要乖要安靜唔好再搞搞震，而估唔到佢事後行記念品店時，見到蒙羅麗莎D畫時真係好驚咁話「佢又望住我啦」，自覺好衰但真係笑到艾菲肚痛囉﹗
其實個羅浮宮展幾好睇，D展品好靚好珍貴，認真睇的話可以睇好耐，不過眼見燒腩仔唔多頂得住，艾菲就急急腳行完就走，轉場去隔離睇故宮展，可能呢邊有燒腩仔熟悉嘅中文字，又有印仔畀佢吸，相對無羅浮宮咁悶，但行到尾佢都係頻頻叫住想走，艾菲亦只好乖乖就範走人。
眼見燒腩仔D耐性已經用盡，所以明明仲有個金庸展可以行，艾菲都唔敢再拉佢入去睇，免得佢失控發脾氣，急急腳拉咗佢去地下個兒童探知館，好彩一入場佢就話「我認得呢到呀」，即刻笑晒口咁衝入去玩。
不過呢日嘅兒童探知館實在無嘢玩，之前燒腩仔好鐘意砌雀個位，D雀全部維修無得玩，就連懷舊玩具間房都唔知點解收起晒D玩具，大棋盤又畀班哥哥姐姐佔據咗，最終艾菲同BB豆豬陪佢玩咗N咁多次康樂棋，佢先肯放過我哋跟我哋走咋...
沒有留言:
張貼留言