一覺瞓醒，畀兩個小朋友喺房到食吓早餐（前一晚喺超市買咗麵包同BB芝士），再睇吓晨早節目嘅巧虎，我哋就出發去玩，呢朝艾菲仲專登同BB豆豬著母女裝出動，白色背心加藍色短褲超級易襯，嘻...
呢日行程嘅第一站係去博多站附近嘅郵局，睇吓有無熱賣中嘅龍貓袋仔，咁結果當然係好無驚喜嘅售罄，然後艾菲望吓郵局入面D郵票同明信片，好多都好cute好靚，艾菲亦好快就睇中咗呢個郵筒形嘅明信片，但問職員話呢個size唔可以寄國外（但明明上次喺北海道都寄到張差唔多size叮噹形嘅明信片返香港㗎喎），咁唯有直接買走留念。
逛完郵局我哋就向海之中道出發，一上車站見到有架靚車，艾菲第一時間叫電車男燒腩仔去車頭影相，再教佢同車長揮手bye bye，點知有人怕醜唔願揮喎，相反D日本小朋友真係慣晒，一見架車開走就熱情揮手。
由博多去海之中道中間要轉一次車，第一架係比較新淨同有冷氣嘅，第二架就係舊款只得風扇，對於燒腩仔來講兩架佢都like，一上車就笑晒口V晒手任艾菲影，而BB豆豬就好醒目咁爭取時間補一補眠。
由於福岡嘅天氣實在太熱，氣溫至少有35度仲要風都無滴（體感溫度應該有40度），所以一落車我哋即跑入車站買嘢飲同雪糕食。
離開車站後，我哋跟住指示牌，喺無遮無掩嘅情況下，頂住大太陽行咗超過十分鐘（落重防曬居然唔記得帶遮﹗），熱到幾乎中暑暈低之後，終於都行到去海之中道水族館﹗入場卷可以即場買，亦可以好似我哋咁預早喺便利店買，米高話佢喺便利店買嘅package，包埋對面海之中道公園嘅入場卷，都仲平過即場單買水族館飛嘅價錢。
一入場我哋就去咗睇海獅表演（一日只得兩場，咁啱來到趕到第一場就睇咗先），我哋推住BB車所以求其喺輪椅位到睇就算，但後尾發現呢個決定係超級正確，因為坐前面D觀眾係會畀海獅整到濕晒，D水花勁到你開遮都擋唔住囉﹗
緊接住海獅出場嘅有海豚，有基本跳水，頂波，推訓練員滑水，仲好堅咁會跳上岸同大家打招呼，真係精彩過海洋公園多多聲，就連BB豆豬都睇到拍晒手，最搞笑係睇完呢個show後，佢學識咗一聽音樂就跟bit拍手。
雖然表演場地有頂，但無冷氣嘅情況下我哋一家係熱到全身濕晒，所以一完show就即刻跟住人群衝咗入去冷氣地方睇魚，睇睇吓仲有堆海龜游過。
之後去睇埋幾層樓高嘅大魚缸，有魔鬼魚有鯊魚，小朋友睇到嘩嘩聲。
睇完大魚缸我哋就跟住指示出去戶外繼續睇，呢邊有好得意嘅小企鵝睇，佢哋有D喺到游水有D喺到曬太陽，搖搖擺擺咁行來行去實在可愛到暈，不過BB豆豬就唔知點解好驚佢哋，要艾菲抱住先好少少。
除咗企鵝，仲可以畀錢買料餵海獅，只要入錢落個好似locker咁嘅雪櫃，打開拎D魚仔出來，再喺貼有海獅樣嘅管到sir條魚落去，下面隻海獅就會撲埋去食㗎啦﹗
之後我哋行返入室內，睇吓海鰻BB，又摸吓海星貝殻。
見時間差不多就去餐廳食飯，燒腩仔例牌食兒童餐，艾菲就食明太子意粉，味道算係不過不失，另外再叫咗碗白飯畀BB豆豬，可以撈朝早焗嘅蕃茄同肉碎一齊食，又艾菲其實呢朝焗咗飯仔畀佢㗎，點知到下午都仲係生米失敗咗，好彩餐廳有得單點白飯，又由於太多飯剩（後尾發現米高個餐原來有白飯跟），我哋裝起咗一碗仔畀佢夜晚撈即食咖喱汁食，估唔到喺無暖壺嘅情況下，個Thermos燜燒杯都keep到喎。
食飽行埋shop，買咗個水族館限定嘅Hello Kitty頭飾畀BB豆豬，再睇埋門口隻懶洋洋嘅水獺，我哋就去第二個目的地海之中道公園。
離開水族館，我哋又要沿之前條超空曠嘅路行返去車站，再去車站另一邊嘅海之中道公園，入場後仲要繼續頂住大太陽行一大段路先到遊樂場（個公園有成個山頭咁大），艾菲到埗後第一件事係衝入food court啪返杯冰水，同喺明知唔特別好味嘅情況下都要買杯雪糕降吓溫。
其實遊樂場呢邊都幾多嘢玩，有噴水池，戶外彈床，各式機動遊戲，長滑梯同繩網，重點係人唔多可以任玩（眼見絕大部分都係香港小朋友），只要你頂得住熱同曬係完全無問題，而我哋就簡簡單單先玩吓扭蛋，再安排燒腩仔同米高揸高卡車，雖然未夠130cm高無得自己揸，但對車迷來講有得坐都好開心㗎啦﹗
跟住我哋鼓起勇氣出咗去玩長滑梯，堅係成個山咁高嘅滑梯，其實艾菲都好想試玩，但真係熱到完全唔願郁，所以只係派出有得玩就唔怕熱嘅燒腩仔同米高去試齊三條滑梯，艾菲求其喺下面影幾張相，就同BB豆豬搵個陰頂抖。
唔知係唔係熱得滯，呢日BB豆豬瞓醒晏覺後係咁喊（平時瞓醒好少喊），要出動BB餅先好少少，但個樣就keep住屎面，咁其實艾菲都熱到同佢差不多面口，所以當燒腩仔玩完滑梯後乜都話唔想玩，我哋就走人行一大段路去公園另一邊個出口，坐返火車返酒店沖涼換衫抖一抖。
呢晚米高話想帶艾菲去中洲川端商店街shopping同食飯，不過去到發現D鋪頭開始閂門無嘢行，見勢色唔對就求其入咗一間拉麵鋪開餐，又我哋入去後無耐餐廳個姐姐即棟個休息牌出去，即行遲半步都無得食﹗我哋今餐試咗九州好興嘅炒麵，感覺同我哋嘅乾燒伊麵差不多，至於艾菲碗牛油叉燒拉麵就又香又彈牙，正呀﹗
食飽後出返去大街行吓Daiso同Donki我哋就走，而有個廿四孝爸爸仲專登安排我哋坐巴士返博多， 等車迷燒腩仔可以試吓坐日本巴士，咁燒腩仔當然好滿意呢個安排，又全程講唔停口，真係失禮死人啦﹗（日本人坐車好靜，佢堅係嘈得過份﹗）
返到博多，我哋再去前一晚嘅超市買多少少料for第二日煮畀BB豆豬食，跟住就快手返酒店休息，先安排兩個小朋友沖涼，然後就係我哋嘅宵夜時段，呢晚宵夜係食迷你西瓜仔，又甜又多汁都係298yen咋﹗超級抵食﹗不過...艾菲同米高食嘅一半就係喊住口咁食㗎囉...原因下篇開估...
九州東京之旅~Day1 HK>福岡
沒有留言:
張貼留言