九州東京之旅~Day4 佐賀>鳥棲 part2

食飽飽我哋就出發去鳥棲行Tosu Premium Outlet﹗其實出發前都問過啱啱來完嘅朋友，話呢到D嘢唔算好平，所以入去前真係無乜期望﹗



不過無乜期望還無乜期望，個天似乎點都要艾菲放低D銀兩先得，好日都唔著涼鞋一次，點解次次都係去旅行先來爛涼鞋呢？今次仲要行到甩底，即唔買唔得﹗唯有求其殺入Gap，又求其揀一對稍為似樣，即買即剪牌即著...



搞掂對鞋之後以為可以專心shopping，點知...米高忽然好驚嚇咁話唔見咗張信用卡﹗吓﹗又搞D咁嘅驚喜？然後佢自己返去車到搵，艾菲一拖二行住Gap等佢，好彩佢返來後話張卡原來放咗喺褲袋，又就喺呢短短嘅十幾分鐘入面，艾菲睇中咗件童裝牛仔裙畀自己，價錢唔係好抵但著上身都幾修身，重點係BB line都有條類似款，可以買埋畀BB豆豬一齊母女裝，所以完全無理香港有無都照買。



搵返米高張信用卡，畀埋錢買衫之後，以為應該再無嘢煩啦，點知...又輪到燒腩仔詐晒型叫眼瞓，平日叫極都唔肯瞓，艾菲一shopping就話眼瞓，好明顯就係搞事mode，但為免壞咗呢個下午嘅大事，艾菲同米高決定放棄平日唔畀佢坐BB車嘅限制，返轉頭拎咗架BB車畀佢坐，等佢唔好再嘈嘈閉阻住晒﹗

之後我哋行咗入Global Work，行吓行吓又發現咗好嘢喎﹗有個架嘅童裝全部只係幾百yen件（實際幾多yen已經唔記得啦），艾菲即刻掃吓有咩啱我家燒腩仔同BB豆豬，然後行返出門口又揀多件衫畀自己，搞掂就交D衫畀米高埋單，艾菲推埋BB豆豬出去等（因為入面地方唔大，唔方便推住架BB車等），點知等咗好耐都唔見人，又返入去睇吓咩事，先發現我哋撞正限時減價大排長龍﹗全部貨品折完有得再九折超級抵呀﹗



跟住我哋四圍逛吓睇吓，陪米高買吓Golf衫買吓波鞋咁，終於都行到來LC嘅門口，唔知大家仲記唔記得艾菲上次喺名古屋outlet抬咗個Marmite返屋企嘅事，今次米高出發前已經力勸艾菲唔好再咁癲，咁呢D嘢如果價錢啱無理由唔買㗎嘛，不過艾菲都知再買煲實在係太重，太難為負責拎行李嘅佢，所以今次好克制只係買碟，買兩隻有折計返港紙大概$130一隻，抵過香港開倉價﹗



由一點幾行到差不多五點，大家都各自買到心頭好，滿載而歸準備出發去行一站啦﹗



離開outlet，兩個撐咗成個下午嘅小朋友一上車就瞓晒，但架車唔使半個鐘已經到咗下一站Frespo（shopping mall），為咗畀佢哋兩個瞓多陣，米高居然好大膽咁放咗艾菲一個落車，仲叫艾菲入去行陣兼探吓路睇吓有咩食，結果...艾菲行咗半個鐘都無就拎咗三對鞋出來囉...

原先想搵嘅西松屋艾菲搵唔到，但就誤打誤撞下去咗另一間精品鋪，而入面竟然有980yen一對迪士尼膠鞋賣﹗仲要有燒腩仔至愛嘅車王款兼有佢size﹗更離譜嘅係除咗膠鞋，仲有同樣標價980yen，但唔知點解有六折嘅迪士尼布鞋賣﹗艾菲猶豫咗半分鐘（猶豫主要係揀size同揀公仔，kakaka...），即掃咗對巴斯光年畀燒腩仔，再掃多對Chip N Dale畀BB豆豬﹗真心咁嘅價錢唔買對唔住自己呀﹗香港邊到搵咁抵又咁靚嘅鞋買先﹗


 
出返來，燒腩仔已經醒咗，因為想畀BB豆豬再瞓多陣，我哋就喺車到執吓D戰利品上吓網facebook吓咁，而為免無所事事嘅燒腩仔搞醒BB豆豬，米高仲放咗燒腩仔上來司機位到扮揸車添，即刻開心到佢四萬咁口﹗


 
等到差不多時間，我哋就抱起BB豆豬一齊入去逛，先去西松屋放低D銀兩，買咗條牛仔褲同tee畀BB豆豬，但想買畀燒腩仔嘅裇衫就依然睇唔啱。


 
買完見大家都餓，就去食個快飯叉吓電再戰，呢晚我哋揀咗食蛋包飯，燒腩仔例牌叫兒童餐，好吸引好好味嘅樣，但對練仙嘅燒腩仔來講，佢只係對幾條薯條同三個啫喱仔有興趣。


 
至於艾菲同米高，就分別叫咗紅酒牛肉汁漢堡扒蛋包飯同忌廉汁漢堡扒蛋包飯，好香好creamy好好味呀﹗


 
食飽我哋當然準備繼續血拼，但燒腩仔又喺到嘈嘈閉話唔想行，路過遊戲機鋪廿四孝米高再一次出手，要燒腩仔應承玩完畀艾菲繼續shop，嘩﹗呢D縱容老婆努力放血嘅老公真係邊到搵吖﹗真係要高度表揚一吓﹗


 
難得來到遊戲機鋪，小朋友點會咁順攤真係玩一樣就走，不過燒腩仔呢晚都算受氹，艾菲話影張相當玩咗佢都肯，真係上去坐一坐影張相就跟我哋行。



氹掂燒腩仔，艾菲又去血拼啦﹗但其實講到咁誇，都不過係去掃Daiso 100yen店之嘛，行慣行熟香港嘅12蚊店，大概都知乜嘢係香港無值得掃，而今次最值得推介嘅係幾副hello kitty / melody砌圖，同埋hello kitty頭飾，全部都係只限日本發售，仲要唔係間間Daiso有（東京行過幾間都無），所以行過見到啱就好買啦﹗



買到D鋪頭閂門，我哋就乖乖揸返車返酒店休息，吸收咗之前幾晚嘅經驗，艾菲覺得BB豆豬會整親，全因太攰太興奮，所以呢晚決定咩都唔做住，一返到酒店第一時間同佢沖涼飲奶瞓覺，順利扑暈兩個小朋友，艾菲就同米高一齊食宵夜歎芒果冰，再一齊執行李準備第二日check out。

九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀  
九州東京之旅~Day4 佐賀>鳥棲 part1