呢一朝起身我哋去酒店餐廳食埋早餐先慢慢check out，雖然前一日BB豆豬都已經無乜嘢好正常，但始終仲係觀察期間，睇見佢個呆樣艾菲始終有D擔心，直至呢朝起身見佢開始識笑，開始不停問我哋拎嘢食，又開始四圍走無時停，我哋估佢應該回復正常，艾菲個心總算定返D。
由於我哋之前同BB豆豬入醫院時係星期六凌晨，所以走嘅時候醫生同護士就提我哋星期一下午打電話返醫院找數，雖然佢哋話會計部嘅人識講英文，不過為免喺電話到雞同鴨講找唔到數拎唔到單claim唔到保險，米高都係決定改行程，返福岡走一轉親身去醫院找數，於是成朝無嘢好做我哋就去咗行醫院隔離間AEON Mall。
有得shopping，艾菲當然努力地尋寶，依然主攻童裝同玩具文具，一忍唔住手就跌錢，不過又買得好開心喎，個麵包超人夾可以寫名，可以用來夾佢兩個D學校通告文件之類，亦終於幫燒腩仔買到件casual得來都見得吓人嘅裇衫，來緊面試總算有件戰衣傍身。
之後行吓行吓就去咗睇手作材料同布，作為一個閒來鐘意整手作嘅人，呢到D布真係多款同靚到艾菲嘩嘩聲，但考慮到自己實在無乜車衣嘅才華，再加上屋企仲有幾塊布等緊自己，所以影咗當買咗算。
行到差不多時間，我哋就喺呢到嘅food court hea食，話就話hea食但食物質素唔差㗎，艾菲叫咗碗天婦羅蝦併牛肉烏冬，未去到好好味嘅level，至少係正常餐廳應有水準，至於練仙嘅燒腩仔，食咗一個飯糰就收工，以為唔好食啦，點知我哋打包做下午茶再食，發現係好好食㗎喎﹗
食飽經過汽水機，發現有Disney X AEON嘅飲品賣，明知無謂都係忍唔住買咗枝米奇綠茶來飲，跟住我哋就出車去是日目的地：福岡市立兒童醫院。
出事當晚，我哋坐救護車來直入急症室，走時又等到有車來即跳上的士走，基本上連間醫院係點艾菲都望唔清，今次來先發現間醫院都幾靚，不過呢D地方真係以後唔好再來，甚至連福岡艾菲都同米高講如非必要唔好再來...
畢竟係醫院地方怕有病菌，艾菲同米高再三商量後，決定由米高自己一個去醫院找數，艾菲留喺車到睇住兩個小朋友，順便畀BB豆豬好好瞓個晏覺（佢成日有嘢玩就唔瞓，呢朝就由八點起身頂到一點上車即暈低），等咗四十五分鐘左右米高就出返來，可以正式同福岡講bye bye啦﹗
搞掂醫院嘅嘢，艾菲同米高都鬆一口氣，成件事總算告一段落，可以安安樂樂繼續餘下嘅行程，即刻起行趕車去鹿兒島，期間路過熊本，出發前我哋都諗過去唔去，但始終帶住兩個小朋友，都係避過呢D高危地方比較好。
由福岡去鹿兒島要三個幾鐘車程，見大家都瞓醒就去休息站抖抖，落車去個洗手間行吓鬆吓。
Tea Time! 最愛逛便利店嘅艾菲，當然又入咗Family Mart逛，尋唔到寶不過買咗個包同杯Frappe畀自己，完全想像唔到便利店都會有Frappe飲，畀咗錢店員就會畀杯抹茶冰你，你再去汽水機加D熱奶落去就飲得﹗呢邊天氣咁熱飲返杯Frappe消暑一流呀﹗
另外仲買咗盒桃味嘅大人之紅茶同柚子鹽味嘅jagabee來做車上零食，其實艾菲個肚係咩構造㗎呢？點解來到日本之後可以keep住無時無刻都喺到食㗎呢？
來到鹿兒島已經差不多六點，即刻去酒店check in，呢晚我哋住天文館Plaza Hotel，照舊訂twin bed房加BB網床，照舊一入房艾菲就進行乾坤大挪移，將兩張床合拼成一張大床，留返好大個空間放行李同畀大家走動，然後有個大BB話佢想瞓網床，亦好堅持佢瞓到咁細張床，所以呢兩晚我哋就安排平日瞓到打晒風嘅燒腩仔瞓網床，我哋同BB豆豬就舒舒服服咁瞓大床。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
沒有留言:
張貼留言