呢日我哋終於可以遠離煩囂去郊野玩，但好可惜嘅係天氣keep住麻麻地，時晴時雨咁好估佢唔到，不過都無損我哋去玩嘅雅慶，我哋呢朝起身喺酒店房食D嘢就出發去霧島，話咁快就到咗第一個目的地高千穗牧場，一到埗泊好架車米高居然話呢到環境咁靚，放燒腩仔上車頭影相留念，艾菲仲以為佢講笑，點知佢堅認真兼即刻抱咗個仔上車，難得燒腩仔又唔抗拒喎，艾菲唯有滴住汗咁配合影相交差。
未行入牧場，燒腩仔已經指住側邊D羊話要餵小動物，所以入去前先捉住狀態仍然OK嘅兩個小朋友喺大門口影返張到此一遊。
入口側邊就係餵羊餵牛嘅地方，入去前有人勁興奮，V晒手畀艾菲影相，搶住要我哋畀佢去餵動物。
米高一畀錢佢，第一時間就去扭糧草餵羊，呢個moment佢仲也文也武咁㗎﹗
然後我哋一行入去，羊咩咩們即刻衝過來，堅係零距離接觸，熱情到爆炸。
BB豆豬率先被嚇親爆喊，跟住點都唔肯自己落地行，死命咁攬住我哋隻腳，再偷偷裝D羊有無埋來。
咁入去前係烕係勢嘅燒腩仔呢？唔...你D眼神同身體語言出賣咗你喎，kakaka...
燒腩仔：畀啦...畀啦...（個樣嫌棄到呢...）
跟住就係又要驚又要餵，餵餵吓又想走，佢走隻羊又追，隻羊追佢就更驚，無限loop呢個過程直至所有糧草無晒...
離開呢個範圍前，米高嘗試令BB豆豬接受返D羊，結果當然係無可能，一入去就直衝埋來，就連艾菲都畀佢哋嚇到驚驚地，正常人都唔會咁快接受返佢哋啦。
餵完羊我哋就沿住條大斜路行上山，行到上去索晒氣大汗疊細汗之際，先見到呢架觀光車...
然後行吓行吓就行咗去睇乳牛，仲咁啱撞正揸牛奶時間，排隊時燒腩仔耍手擰頭話唔玩㗎，但排到去又好勇敢出手揸喎（掌聲鼓勵），每個人可以揸幾吓， 不過亮點係上面工作人員隻手，有佢幫忙人人都可變揸牛奶高手﹗嘻...
揸完牛奶我哋行咗入去睇馬仔，騎馬未夠鐘開始，我哋亦相信燒腩仔唔會夠膽騎，所以睇吓望吓就走。
之後有個小朋友喺到扭話要玩D電動車，解釋咗無數次下午會去另一個遊樂場，有好多款仲靚嘅電動車任佢揀任佢玩都唔聽，艾菲唯有捉BB豆豬影吓靚相順便畀大家冷靜吓。
玩咗成朝大家都肚餓，傾掂數就行返出去餐廳到食飯，為咗彌補返喺佐賀食唔到餐燒肉，所以一見到呢間餐廳有燒肉食就衝咗入去，仲要畀我哋坐到張窗邊大枱，可以望住靚靚嘅牧場景開飯，正呀﹗
由於燒腩仔練開仙，再加上佢向來唔多鐘意咬肉，我哋只係叫咗牛肋骨加黑豚set，另外加碟香腸，喺日本食燒肉，D肉好食係一D都唔意外嘅事，不過好驚喜嘅係連個香腸都超香口同好味，而且個餐除咗燒肉，仲有炸雞，意粉，白飯，沙律，飲品畀你任飲任食，wow...真係諗返起都流口水呀﹗
食到勁飽咁離開餐廳，不過行過隔離手信鋪，又忍唔住買雪糕食，咁話晒都係牧場嘅乳製品，質素有返咁上下保證嘛，帶唔到返香港係都要食返杯先安樂。
食夠玩夠就走啦，bye bye羊咩咩，多謝你哋畀咗一個好開心好舒服嘅早上我哋﹗
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
沒有留言:
張貼留言