17個月

O...YEAH!!!雖然媽媽D遊記追到氣咳都未寫完，不過唔覺唔覺我又大一個月，佢話要讓一讓路畀我出場先呀﹗聽到呢個消息真係開心到我不得了，大家就暫且畀我不顧儀態笑一陣啦﹗kakaka...



先講我強項食，宜家一日三餐固體食得非常好，午餐晚餐座底一大碗有菜有肉嘅飯，大人一話開餐就會自動埋位上high chair，搶住自己拎起枝匙起勢咁食，有時媽媽唔得閒理我，真係放低碗飯我就自己搞掂， 有時會筆到枱面同口水肩都係飯（艾菲：佢每匙都對準目標放入口，基本上係無乜跌落地），但我好企理會出手執返晒，到最後媽媽埋來清理時一定係佢可以接受嘅污糟程度。

食飽自己碗飯到大人開餐，我又會用好誠懇嘅眼神不停叫大人畀D我食，有時都成功呃多成碗飯返來，尤其有麵或烏冬我多多都食得落，個個同過我一齊食飯嘅大人都讚我好食得㗎﹗亦之所以我宜家個肚腩越來越圓碌碌，同得返排骨嘅哥哥真係好大對比﹗

不過我雖然為食，但唔係你餵我就食㗎，好多時都要媽媽放喺碗畀餐具我自己筆或用手執先食，同一件食物你用大人筷子餵我，我好多時會耍手擰頭推開唔要，至於下午茶就更加會望清楚哥哥食咩先食，如果眼見哥哥D嘢好味過自己D，我會唔食示意媽媽畀返同哥哥一樣嘅嘢我食，但媽媽解釋完我唔食得我多數都會乖乖合作，咁麵包餅乾乳酪cereal都係我飛佛來嘅。

至於媽媽奶依然熱愛，宜家早晚一餐埋身飲無走雞，下午茶奶就視乎喺屋企定喺街，喺街無都唔會搵，喺屋企眼瞓就會搵，一夠鐘我就會拖媽媽入房示意佢餵奶畀我瞓，如果佢扮唔明我會好嬲爆喊，喊到佢畀我食我先會收聲。



至於瞓覺，媽媽就話我好咗D，媽媽宜家十一點左右就同我入房餵奶瞓覺，基本上無事無幹，我飲完奶都會自動暈低，簡中未瞓得熟有時會凌晨一點幾醒一醒，不過媽媽拍吓我都好快會瞓返，然後一覺就瞓到第二朝十點幾十一點，跟哥哥一齊起身呃媽媽畀多少少早餐我食。

晏覺就繼續自由放任政策，喺屋企就兩點飲完下午茶奶開始瞓，可以一直瞓到四點左右先醒，但出街的話就好心野，知道有得玩就攰到眼都垂晒，都仲要撐到最後一秒先肯瞓，而且好容易醒瞓唔得耐。



越來越有自己嘅性格同脾氣，有咩唔鐘意會學哥哥大叫爆喊同發脾氣掟嘢，不過媽媽一no我就會收聲唔再做，好識睇人眉頭眼額，媽媽話緊哥哥時會即刻變乖唔再搞搞震，出街見到陌生人會識怕醜，擰歪面捱喺媽媽個身到扮嗲豬，但見到熟口熟面嘅保安姨姨又會好熱情咁跟住哥哥揮手say hello同bye bye。



活動能力keep住A++以上級別，電力無限日日喺屋企四圍行同擒，出街會扭落地要自己行唔畀抱，最鐘意拖住哥哥蒲公園，就算哥哥超級粗魯眼見我跌低都繼續扯我走，我依然熱愛跟住佢四圍跑，已經識自己扶住上樓梯，又識自己坐低sir滑梯，但有樣嘢我好唔鐘意就係玩韆鞦，次次媽媽抱我上去我都會掙扎一輪，再畀返個勁唔enjoy嘅樣佢睇。



小手肌發展幾好，開始識得自己入形狀（艾菲：要畀貼士先知入邊個，但佢可以轉到啱返個位先入窿），畀BB顏色筆我都識得喺畫紙到畫畫畫，亦識得將D顏色筆當積木咁疊高，哥哥砌lego時又會埋去搞破壞，偷偷地將哥哥架車拆散（激到哥哥彈吓彈吓），又會跟住哥哥亂彈個玩具琴。



今個月總算肯開金口，BB話多咗亦開始肯望實媽媽口形學發音，宜家除咗爸爸媽媽外仲識叫阿嫲，姐同阿婆，亦識得講得，謝，bye，波，車，鼻，襪同鞋，認知能力亦大有進步，終於學識眼耳口鼻手腳肚腩同pat pat喺邊，叫佢錫錫米露會拎起米露扮攬同卜一聲咁錫（識得唔貼個咀埋去假錫），知道襪係著喺腳，換完片會自己拎去垃圾桶丟，換出來D衫又識放去洗衣籃，出電梯後認得路返屋企，一話同婆婆玩line會衝埋來搶鏡。

好鐘意模仿大人，媽媽無教過我，但我憑觀察就知道鎖鑰係用來開門會拎媽媽抽鎖鑰去大門到篤，聽得媽媽問哥哥幾點多又知大廳個鐘可以睇時間，跟得媽媽摺衫多就識幫佢拎D摺好嘅衫去唔同人嘅櫃桶到收埋，見到哥哥幫手收衫夾又自己跟住拎個兜埋去收（艾菲：佢係個好鐘意做家務嘅妹仔﹗）。



繼續同哥哥做難兄難妹，一時糖黐豆攬頭攬頸笑到咔咔聲，一時水溝油搶玩具we嘩鬼叫，雖然暫時都係哥哥整鬼我多（艾菲：哥哥間中會發作唔滿意妹妹呢樣嗰樣），但我有時都會借頭借路蝦返佢，明明哥哥一遍好心埋來同我玩，我就怕佢搶我D嘢喊定先等媽媽話佢（艾菲：基本上妹妹一喊大人實第一時間問咩事，不過考慮到妹妹宜家有時都明蝦哥哥，艾菲會調整吓自己D語氣，免得錯怪哥哥） ，但總括來講我哋嘅感情都係穩步上揚中嘅。



最後又係時候update最強小三嘅狀況，雖然我好愛媽媽D奶，亦好䅻媽媽嗲媽媽，但我最愛嘅依然係爸爸，每晚佢放工開門入屋，我必定大大聲咁叫爸爸，食飽飯又會跟住佢尾四圍行，再用冧爆嘅聲線呼叫「爸爸...爸爸...爸爸...」，爸到媽媽都無我咁好氣，到夜晚媽媽一話night night爸爸，我又會九秒九咁衝去爸爸到揮手講bye bye再畀個情深的一吻，但有一晚我錫完爸爸唔肯錫媽媽，媽媽真係嬲咗我囉，結果爸爸第二晚叫我一定要錫埋媽媽，唉...睇在佢D媽媽奶份上我唯有應酬吓佢啦﹗