九州東京之旅~Day6 鹿兒島 part2

離開牧場後，我哋就起程去對面山，有成個山頭咁大嘅霧島高原遊樂場，但上到山頂只見一大片滑草場同餐廳，燒腩爸話想玩嘅電動車同高卡車完全唔見影，睇返遊樂場地圖先發現呢D設施喺山腰位置，所以即刻揸返車落山搵，然後一落車就見到呢個龍貓巴士站，好靚好真呀﹗



講好呢日行程係專為燒腩仔而設，揸高卡車係少不免嘅，出發啦﹗



好欣賞佢呢個雙軚盤嘅設計，燒腩仔真係以為自己有份揸㗎，開心到震﹗



哈哈...呢個就真係任佢揸啦﹗



本身諗住畀佢兩兄妹自己浪漫吓，點知BB豆豬坐咗半程車之後，副面口越來越難睇，唯有艾菲都座鎮抱住佢一齊玩，燒腩仔玩完麵包超人車再揸電單車同火車，玩完又玩玩完又玩都唔知玩咗幾多轉，都話呢邊D車好過對面山牧場啦﹗今次大滿足啦﹗



忽然伍生話想玩Kart仔，艾菲應咗佢一聲哦佢就畀錢上車，職員要佢戴晒頭盔手套先准開車，佢喺短短五分鐘就圍住個場行咗五個圈，個速度係快到我都捕咗兩個圈到第三個圈先影到佢呢張我是車手相囉﹗事後都有朋友問點解艾菲敢畀佢玩，well...其實邊有得話唔畀佢玩姐，識佢咁耐都聽過好幾次佢話想玩，咁喺日本玩點都安全過喺大陸玩掛，家陣總算了咗佢個心願啦﹗



咁無份玩嘅燒腩仔同BB豆豬有咩做？咪就係企場邊聽聲搵爸爸囉，睇見佢哋難得一致嘅動作同反應，真係好搞笑﹗



玩埋Kart仔我哋就沿路走返去出口準備去下個場玩，然後行到返來電動車場呢個位時，BB豆豬竟然甩開我哋手，自己衝咗入去仲爬咗上隻鴨仔到扭軚盤喎﹗嘩﹗真係唔可以睇小呢個小妹妹嘅接收能力呀﹗見佢頭先玩時全程發呆，以為佢唔係咁鐘意，點知原來我哋估錯晒囉﹗


 
下一站，米高本來話帶我哋去另一個遊樂場，畀燒腩仔試吓玩要坐滑雪D吊車上山，再自己滑返落山嗰種滑草，點知一上車就遇著落大雨...我哋喺遊客中心同停車場都分別等咗一陣，見終於停雨諗住濕都繼續去玩，好可惜嘅係因天雨關係個遊樂場提早閂門，噢...


 
無得玩唯有提早返酒店，諗住喺附近行吓hea吓順便食吓呢到好出名嘅白熊或黃熊刨冰，跟住行吓行吓行咗去天文館公園，有得玩燒腩仔當然第一時間衝入去玩，嘩﹗個旋轉滑梯好正咁呀﹗


 
BB豆豬都開始識玩，自己喺個搖搖馬上un吓un吓再偷笑，燒腩仔就更加係唔使教自動波埋位。


 
難得兩個坐定定背景又無乜人，剩機幫自己影返張靚相做facebook cover photo先。


 
臨走睇埋噴水池，睇佢兩兄妹D反應真係好正，D水一噴出來妹妹嚇到呆咗有D驚，哥哥就笑到咔咔聲。



玩完行返出去步行街搵食。



見白熊要等位之前有晚宵夜又試咗，所以行咗去街尾試埋黃熊，wow﹗個刨冰睇見都透心涼呀﹗另外叫多個雪糕窩夫畀BB豆豬（佢當然係食剩窩夫），好好味但傍晚六點先食呢兩個甜品，真係飽到唔使食夜晚囉﹗


 
話就話唔使食，但帶住小朋友點都要正正經經坐低食個晚餐嘅，hea到七點幾八點我哋就返酒店出車，去咗附近住宅區嘅一間Big Boy食飯，呢間平民扒餐我哋上次去北海道時都食過，價錢極抵但質素唔差，重點係遠離旅遊區避開人潮唔使等位就有得食，左邊係艾菲嘅輕量級牛扒，右邊係米高嘅芝士漢堡，至於練仙嘅燒腩仔今餐食咩呢？係完全估你唔到嘅無限添飲粟米湯﹗佢成晚乜都無再食，只食刨冰同飲粟米湯就話飽，仲真係咁就頂到第二朝﹗


 
食飽又去咗餐廳附近嘅一間超市行吓，嘻...我哋正正係去日本唔行超市一日都唔安樂嗰種人，呢晚唔使買BB豆豬嘅餸，艾菲可以專心掃零食，左邊包卡樂B燒烤味薯格上網見人介紹專登買來試，點知原來同細個食嘅牛仔片差不多味全無驚喜，隔離包芝士片又略嫌唔夠濃，反而右邊包檸檬脆脆真係好得，感覺勁似食緊西檸雞咁，而隔離包蝦乾仔用來蒸蛋都好香口。


 
呢晚見有D時間，艾菲亦終於出手掃藥妝，仲成功買到此行第一袋退稅化妝品添，然後返到酒店又要同兩個大小寶貝沖涼餵奶陪瞓，跟手仲要pack行李準備第二日chek out，搞掂又係宵夜時段啦﹗呢晚艾菲就揀咗食用熊本牛奶整嘅牛奶撻，以示對熊本地震復原嘅一點支持﹗

九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀  
九州東京之旅~Day4 佐賀>鳥棲 part1  
九州東京之旅~Day4 佐賀>鳥棲 part2 
九州東京之旅~Day5 福岡>鹿兒島 part1 
九州東京之旅~Day5 福岡>鹿兒島 part2
九州東京之旅~Day6 鹿兒島 part1