呢日我哋雖然要移動去宮崎，不過日間大部分時間都係繼續喺鹿兒島玩，喺酒店check out後就向住指宿方向進發，期間路過呢個錦江台展望公園，當時唔知行入去就可以睇到成個櫻島火山嘅靚景，只見有條橋幾靚幾特別，求其同燒腩仔睇吓橋底下D繡球花就走（好啦...艾菲認自己出發前係完全無做過功課，連每日會去邊做乜都唔知，仲要導遊米高當時留咗喺車睇住瞓咗嘅BB豆豬，所以miss咗個超靚影相位啦）。
之後我哋沿住指宿Skyline上山落山，沿路見到有靚景又停低影吓相，不過睇相都睇到呢日霧霾極嚴重，基本上D相係點影都唔會靚，可惜可惜...
跟住我哋路過池田湖，真係好大好清好靚，D山嘅倒影好似照鏡咁。
終於都到目的地，日本最南端火車站，西大山駅﹗又艾菲原來唔覺唔覺，已經跟住米高去咗日本最南同最東，唔知幾時先可以去埋最北同最西呢？
天氣唔好，影唔到藍天白雲，連有九州富士山之稱嘅開聞岳都影唔到頂，但扮等火車呢D呢D偽文青feel嘅相點都要影吓嘅，不過燒腩仔邊影邊嘈住要坐火車，大佬...一個鐘後先有車到，點陪你等呀...
返去火車站前敲吓個鐘算啦，而呢到係有個黃色郵筒畀遊客寄名信片，但...但...但...艾菲居然完全無咗件事，直至朋友事後喺facebook問先醒起﹗﹗﹗
我哋開車離開西大山駅嘅時候，BB豆豬先捨得起身，對於佢miss咗呢個景點，艾菲實在覺得有D可惜，然後不停叫米高搵個位畀我哋落車影吓開聞岳都好，兜咗陣終於畀我哋搵到個靚位，無乜車可以放心畀小朋友企喺路邊，又可以望多少少個山，亦好好彩佢哋兩個都好合作，手拖手再一齊望鏡頭笑，成就咗呢張picture of the trip。
影完相我哋就起程去唐船峽食流水麵，呢餐應該係艾菲同燒腩仔最期待嘅一餐，事源出發前某晚我哋睇電視旅遊節目，主持人介紹食流水麵，佢覺得好好玩艾菲就叫佢問米高今次旅行有無得食（其實艾菲一直恨食，但之前幾次去日本米高都無安排過），估唔到米高竟然話無問題，仲話要食就去流水麵發源地唐船峽食。
要食流水麵，就要先坐電梯或行樓梯落山腳，自己搵個靚位，再去同嬸嬸點餐，跟住佢哋就會拎一大兜麵過來，而跟餐嘅有燒魚，飯糰同一碗麵豉湯，另外我哋再叫咗個豚肉串怕燒腩仔唔夠飽，而有一點好值得留意嘅係呢到全戶外無冷氣，呢邊嘅夏天閒閒地都三十幾度，就算山腳位置有頂已經無咁熱，都一定要有食到大汗疊細汗嘅準備。
開餐啦﹗燒腩仔食到勁high﹗不停夾不停夾，玩到勁開心﹗不過呢到D流水麵又真係好好食喎，夠晒冰涼又夠彈牙﹗就連BB豆豬都食唔停口（佢堅係熱到成頭濕晒）﹗
夾吓夾吓燒腩仔都開始玩到悶，於是畀D嘢佢做，叫佢幫艾菲同米高影返張到此一遊相先，嘻...艾菲都唔知幾耐無同米高影過二人合照啦。
臨走喺餐廳門口嘅小庭園到影吓相，呢個view認真影的話可以好靚，但好可惜佢兩個無時停超唔合作，為免佢哋影到跌落水，艾菲只好無奈放棄。
食飽我哋就返去鹿兒島市，米高前一晚plan行程時問艾菲，想shopping定去櫻島行吓，作為一個為咗個仔乜都得嘅阿媽，艾菲最後揀咗去櫻島，點解肯咁大犧牲？因為shopping之後去到東京仲有大把時間shop，去櫻島就可以畀燒腩仔試吓坐汽車渡輪，又可以同佢兩個玩足湯，呢個機會錯過咗就好難先會再有。
一到碼頭就有船畀我哋直上，停定架車後可以落車四圍行吓，對於第一次坐汽車渡輪嘅交通控燒腩仔來講，樣樣嘢都係咁新奇好玩。
而船入面嘅環境都幾唔錯，有電梯，有餐廳，有梳化位，仲有紀念印章吸添，確係個唔錯嘅體驗。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
沒有留言:
張貼留言