一落船，我哋就向住足湯嘅地方進發，雖然呢日天氣唔好keep住天陰陰，不過呢到環境真係好唔錯好relax，有一望無際嘅無敵大海景。
可以睇返頭先坐過來嘅汽車渡輪，又有D奇形怪狀嘅火山溶岩睇。
講返個足湯，由於帶住小朋友嘅關係，米高今次無特別安排我哋浸溫泉，但原來燒腩仔係好期待㗎，應該係同學仔同佢講過掛，當我哋話帶佢去浸腳時，佢係異常咁興奮，仲話要剝衫剝褲乜都除晒咁浸，幾乎笑到艾菲標眼水，然後一坐低即伸隻腳入水，不過就嫌D水熱縮返上來，後尾適應咗就開始勁踢勁玩，叫極都唔識停咁，實在失禮死人﹗
至於BB豆豬呢，有過哥哥第一次喺北海道玩足湯嘅反應，艾菲一廂情願地以為佢會enjoy，點知佢係驚到走夾唔抖，一掂水即縮即呱呱嘈唔肯浸，但玩咗陣又心思思自己伸隻腳想玩D水，不過試咗兩吓之後依然係唔OK，所以我哋都無逼佢浸啦。
喺足湯場玩咗半個鐘都無，忽然個雷打到來，唯有急急腳著返鞋上車走人，然後開車去另一邊遊客中心同BB豆豬換片順便買手信，買咗盒卡樂B蕃薯片，兩包鹿兒島蕃薯片，白熊啫喱，同柚子味鹽麴。
臨走艾菲仲買咗杯柚子雪糕食，好味到唔食凍嘢嘅BB豆豬都食咗佢人生第一啖雪糕囉﹗
之後我哋就喺風雨下離開鹿兒島向住宮崎進發，沿途見到休息站環境又幾靚，見停咗雨又落車去行吓，仲畀我哋見到呢部咁可愛嘅麵包超人汽水機。
是日爸爸媽媽嘅下午茶﹗喺鋪頭入面行吓行吓，見呢包就到期嘅炸薯片減價我哋又幫襯吓，原本應承咗同燒腩仔一齊食，不過佢上車無耐就同BB豆豬一齊瞓著咗，艾菲於是好衰咁決定同米高兩個食咗去，米高有問過艾菲得唔得驚畀個仔鬧，但實情係艾菲太了解個仔，呢D嘢佢根本唔上心轉頭就唔記得，快D食咗去毀屍滅跡就OK，而事實亦係佢之後咁多日都無記得返起呢包薯片...
經過兩個幾鐘車程，我哋終於到JR九州宮崎酒店check in，呢間係我哋喺九州住嘅最後一間酒店，米高見價錢唔係太貴，就揀咗呢間比較grand同大嘅酒店等我哋住得舒服D。
除咗有開揚靚view，洗手間仲大到有個風呂，間房又有個大廳相當闊落，雖然呢到無twin bed揀，我哋將BB豆豬張BB床泊埋大人床隔離之後，一家四口一齊瞓都好OK唔會太逼。
安頓好後我哋就開車出去食飯，呢晚我哋食扭蛋壽司，去到拎完飛見仲要等20分鐘，於是艾菲同米高就爭取時間，兵分兩路去後面D shop行街，燒腩仔好醒目咁揀咗跟米高，艾菲就可以舒舒服服咁推住BB豆豬去掃Daiso，係...又掃Daiso...好大好好行好多嘢睇，然後只係用咗十五分鐘，艾菲就掃咗呢堆嘢出來，有貼紙簿，有日本限定hello kitty頭夾，同D香港買唔到嘅hello kitty同Thomas杯杯碟碟，就連小朋友夾住頂帽個夾，同小朋友學習筷子個托佢哋都有，另外艾菲再掃咗D hello kitty磁石夾，除咗兩個浴室鐘全部都係100yen件，抵抵抵﹗
準時廿分鐘後我哋就返到餐廳，然後等多一陣就有位入啦﹗真係好欣賞日本嘅餐廳，永遠都咁baby friendly，連迴轉壽司都有專門設計畀小朋友用嘅BB凳，可以夾喺枱到等小朋友同大人一齊食，唔似香港元氣又話呢個位唔放得BB凳嗰個位又唔放得，焗小朋友喺卡位到自己坐，跟住當然係無可能坐得定會爬來爬去，搞到大人要看牛咁睇實驚佢跌。
同樣係100yen壽司，相對上次間呢間D食物質素明顯好D，不過由於燒腩仔要扭蛋關係，我哋全程不停畀佢催住食快D（但佢自己又唔見得食快D喎）...
扭蛋壽司嘅每張枱都有個位畀你將食完嘅碟sir落去，當我哋一夾起舊壽司，燒腩仔即九秒九將隻碟sir落去，每儲夠5隻就可以抽一次奬，但我哋抽咗三次先中到一次，中奬後就會有隻扭蛋sir落來，呢D玩意氹小朋友實在一流。
至於無份抽奬嘅BB豆豬都不愁寂寞，只要我哋準備定一碗烏冬畀佢，佢就會好滿足咁坐定定逐條啜入口㗎啦﹗
食飽又到超市shopping時間，呢晚去咗距離酒店五分鐘路程嘅AEON，為食嘅艾菲當然又忍唔住手掃咗堆零食，而米高就好豪咁買咗個1200yen嘅宮崎芒果返來試，佢話香港買一個最平都要$300，一場來到又啱季節一定要試，然後行吓行吓仲畀艾菲搵到包蒸野菜，用炆燒罐焗返熱就可以畀BB豆豬食，絕對係繼沙律菜後帶BB旅行又一推介食材。
至於呢晚嘅宵夜，艾菲只係簡簡單單買咗條芝士卷同日向夏果汁，芝士卷只可以話味道正常，但日向夏果汁就係艾菲喜歡嘅果汁味，不過就唔係周圍都買得到，之後想買都買唔返啦。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
沒有留言:
張貼留言