話都無咁快就來到九州最後一日，呢日嘅行程只得兩個，第一個係去食燒肉，第二個就係飛東京，我哋一早起身check out酒店，行晒宮崎站嘅手信鋪都未夠鐘去開餐，無無聊聊就去咗燒肉店附近一間超市停低架車，見BB豆豬瞓咗艾菲就自己同燒腩仔落車逛，漫無目的嘅兩母子喺間超市到亂行，唔覺唔覺又行到去薯片蝦條陣前面，忽然叮一聲畀艾菲見到包卡樂B春夏限定嘅櫻花蝦蝦條，記憶中來咗咁多日行咗咁多間超市都未見過，即刻拎包去收銀畀錢，直至返來香港開來食即後悔買得一包咁少，因為佢真係好香櫻花蝦味好好味呀﹗
等到人哋夠鐘開鋪我哋即殺入去開餐﹗最近睇《森美旅行團》，聽到佢講去日本一家大細又想食好嘢，要揀午餐時段皆因價錢平晚餐一大截又唔使點等位，艾菲聽完即刻會心微笑，皆因米高一向都係咁嘅作風，呢餐佢話要帶艾菲食好嘢，去咗呢間喺宮崎好多分店好出名嘅夾竹園燒肉店。
嘩嘩嘩﹗宮崎牛呀﹗終於都畀我哋食到你啦﹗D牛肉嘅雪花靚到呢...睇見都流口水呀﹗
開餐前點都影返張全家幅﹗不過唔知係日本人對影相無乜要求定艾菲部機真係咁難用呢？好幾次叫佢哋幫我哋影相都係out focus...
開餐啦﹗上次喺牧場食嘅燒肉已經覺得好好味，呢到簡直係好味到離晒大譜﹗D牛入到口係即溶㗎﹗好過份囉﹗
套餐連麵豉湯前菜蔬菜同白飯，已經食到我哋攬住個肚，飯後仲有甜品一人一杯雪糕，重點係食到咁高質素嘅牛，又食到我哋咁飽埋單都係三百幾蚊咋﹗呢個價喺香港一家四口食個最basic嘅涮涮鍋都唔得啦﹗
食飽飽我哋就出發去機場還車準備去東京，因為坐內陸機，基本上放低行李，做個簡單安檢就OK，所以搞掂晒所有嘢當然又係shopping time，作戰到最後一刻嘅艾菲喺機場買咗包九州pancake粉，另外買咗本九州交通圖𨰹，又好彩艾菲掙扎一輪後有買，因為本書去到東京已經搵唔返，車迷燒腩仔返香港後係日睇夜睇囉﹗（至於京都Yojuya就係去到東京落機，知道回程唔會經過所以買定先）
行完買完終於捨得埋閘口，bye bye九州﹗有緣再來玩過啦﹗
至於同BB豆豬一個坐嘅艾菲，都慶幸隔離位唔係日本大叔而係個好人日本姨姨，佢一上機就大覺瞓到落機完全無理過我哋，艾菲亦好順利咁未起飛就用媽媽奶扑暈咗BB豆豬，嘻...母乳就係有呢個好處，艾菲難得可以有半個鐘嘅寧靜，雖然BB豆豬半個鐘後就醒跟住開始扭，要我哋出盡發寶去令佢收聲，不過對比起機上其他小朋友，佢兩個坐飛機算係好合作。
而坐JAL另一好處係，就算只係內陸短程機，佢哋都會有小禮物送畀每位小朋友，今次我哋揀咗飛機公仔，佢個尾可以拉出來跟住個公仔會震好過癮，另外空姐會派post card畀有需要嘅客人，為求分散BB豆豬嘅注意力，我哋又拎咗張畀佢玩。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
沒有留言:
張貼留言