坐咗個半鐘飛機，話都無咁快我哋就到咗東京啦啦啦啦啦...數數手指原來已經有成六年無來，對於以前幾乎一年來一次嘅米高同艾菲來講，呢六年實在係好漫長，其實今次book機票前都猶豫咗陣，始終帶住兩個小朋友，東京太急趕嘅食買玩行程未必啱佢哋，不過米高一句「錯過咗今次唔知下次幾時」，唔...辛苦D就辛苦D啦﹗東京﹗我哋來啦﹗
推住兩個大行李（其中一個仲已經畀人落咗heavy tag）加一架BB車，再拖住兩個都未太懂性嘅小朋友，為咗避免拎住咁多嘢逼山手線咁狼狽，再喺JR站嘅樓梯搬行李搬到手殘，米高決定今次住喺濱松町站附近，羽田機場坐monorail可以直達兼有電梯到出口，一上車同燒腩仔講呢架係東京嘅機鐵，車迷燒腩仔即開心到V晒手任艾菲影。
出站後推住行李行咗十分鐘左右，就到我哋今次喺東京住嘅酒店濱松町Hotel Mystays，間房係就係細咗D，仲要無twin bed同BB床，要一家四口逼埋一齊瞓，不過勝在呢間房有東京鐵塔景，而且拍埋張床埋牆後，都夠位畀我哋開行李執吓D戰利品，以東京標準來講都算係咁㗎啦。
喺酒店放低D行李，再準備好BB豆豬嘅晚餐，我哋就出發去新宿啦﹗雖則艾菲係去shopping為實，但帶燒腩仔去坐佢恨咗坐好耐嘅山手線都係是日重點節目來㗎﹗第一次坐嘅佢又興奮到把口合唔埋，全程不停講講講，喺寧靜嘅車廂入面，艾菲真心覺得自己會被歧視囉...
一場來到東京，去Tokyu Hands朝聖係必須嘅，正所謂唔買都去睇吓摸吓玩吓，尤其係呢到咁多DIY用品同新奇嘅廚具賣，真係行一日艾菲都唔會覺悶，只可惜燒腩仔並唔係咁諗，滿足完佢坐山手線嘅願望，轉過頭已經有人喺側邊嘈嘈閉，一時話要去洗手間，一時又話眼瞓要走，好彩艾菲身邊有個好鼓勵消費嘅米高，心甘情願地招呼個搞事燒腩仔等艾菲專心睇嘢，又行行吓遇著叮噹先好少少。
經過一輪與時間競賽（要趕喺收鋪前行晒咁多層）同內心掙扎後，最終艾菲都唔係買咗好多嘢，不過係買咗條冰涼頸帶畀燒腩仔，買咗個ziploc Minnie密實盒，四個雪櫃夾，仲有香港難買D嘅梳乎厘pancake粉同白神酵母。
行完Tokyu Hands，另一樣重要任務，係去小田急百貨嘅化妝品專櫃，幫朋友買化妝品，朋友話呢個牌子好用又唔貴，好多人推介但香港無專櫃（最近發現開咗啦），見咁多年好姊妹幾唔順路都搵搵啦，點知...搵到個專櫃但遇著個極無禮貌講普通話嘅大陸化妝品姐姐（應該嫌我哋幫襯得少），認真來咁多次東京都未試過咁受氣囉﹗唔係要幫朋友買嘢艾菲真係調頭就走廢事益佢開單﹗
買完化妝品再上樓上搞退稅，路過見到有Peter Rabbit 150周年展，好似好靚就飛甩米高同燒腩仔去睇（佢去搞退稅我哋睇展覽，善用時間嘛），雖然全部日文艾菲都唔係好睇得明，不過單睇畫同公仔已經大飽眼福，展覽外面仲有好多Peter Rabbit嘅精品賣，不過艾菲本身唔係fans就乜都無買到。
行到咁上下，我哋就去搵地方開餐，基本上帶住小朋友來到東京，都唔好期望食到D咩特別好嘅嘢，但求唔使點等位坐得舒舒服服味道入得口就算，而當艾菲同米高仲喺堆餐廳門口猶豫緊食咩時，燒腩仔就喺餐廳門口D凳瞓著咗﹗千辛萬苦我哋先拖咗佢入去餐廳坐低，跟住唔使一秒佢又再瞓過﹗直至佢個兒童餐到都仲唔肯起身，最後都唔記得點整醒佢，只記得被夾硬叫醒嘅燒腩仔心情極差，全靠米高之前幫佢喺堆兒童餐禮物到揀架跑車，先肯冷靜落來開餐食嘢。
小朋友有兒童餐，大人都唔可以待薄自己，米高就叫咗個刺身set，個樣邪惡到呢...好似好好味咁，不過由於當時環境有D混亂（又要餵BB豆豬，又要平伏燒腩仔D情緒），艾菲居然唔記得影自己個餐，而事後亦都記唔返自己到底食咗咩，只記得有呢到主打嘅蕎麥麵同食物嘅味道唔差囉。
見燒腩仔呢晚狀態麻麻地，第二朝我哋又要早起，所以食飽後都唔敢再四圍逛，即刻坐返山手線返濱松町，再去車站另一邊嘅超市，只係買定D食材畀BB豆豬來緊幾日用，同買個蜜瓜返酒店宵夜，我哋就急急腳返酒店沖涼休息。
等到兩個小朋友都乖乖瞓晒，艾菲先可以靜靜地去影吓窗外個東京鐵塔，著咗燈嘅東京鐵塔果然靚過朝早乜都無嘅好多，相對新開嘅Sky Tree，艾菲始終覺得東京鐵塔有氣質D浪漫D有情調D。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
沒有留言:
張貼留言