18 & 19個月

Hello！Hello！大家有無好掛住我呀﹗媽媽話要同大家講聲sorry喎，由於呢個月實在發生咗太多突發事（哥哥忽然跌穿頭，小一安排又有D意料之外嘅變動），再加上佢私務繁忙，兼夾我哋兩母女又齊齊打敗仗病咗，所以我歲半成長進度要同19個月嘅合拼一齊出。



未講進度前先講吓我歲半去健康院打針嘅威水史，話說呢日係媽媽第一次單拖同我去打針，咁我亦只係度高磅重時有D扭擰，其餘媽媽見姑娘傾偈時我都無搞搞震，體重高度繼續keep住自己條成長線，講嘢進度亦啱啱好追到標準，唔使兩歲再返來，然後就到媽媽事後狂讚我嘅打針部分，事前媽媽有brief過我「涼浸浸抹一抹再桔一吓」，但去到聽到其他小朋友爆喊聲都不其然整咗個衰樣出來，不過到我打針時我真係一聲都無喊過呀，只係望住姑娘枝針皺咗一皺眉咋，媽媽見我咁叻女咁合作，出來當然係奬我星星餅放題任食啦﹗YEAH！



入返正題講進度，宜家一日四餐固體食得好好，早餐下午茶食餅乾水果乳酪之類食物，午餐晚餐照例一碗有菜有肉嘅飯仔，全程自己來唔畀大人幫，食到夠晒喉先肯畀大人收餐具，但BB餐開始無食咁多，有時出街食飯見大人飯餸到會唔肯食，識扭爸爸媽媽畀大人飯餸我食，所以媽媽話BB餐應該唔會維持到幾耐，宜家只係盡量拖延一日得一日。



至於媽媽奶仍然係最愛，早晚一餐埋身飲無得停（艾菲：夠鐘唔喂會畀佢慘叫住拖入房），至於下午茶奶就視乎喺屋企定喺街，喺街無都無所謂，喺屋企就一定要飲，宜家我識得講「謝謝媽媽畀奶奶味味（好味）」，不過有時急起上來都係直接喊住扯媽媽件衫就算，而媽媽見大家狀態都好穩定，佢又成年無泵過奶儲奶，就專登喺我歲半當日進行咗掉奶樽儀式，將屋企D奶樽拎晒出來當量杯同玩具咁畀我同哥哥玩，最搞笑係成年無飲過奶樽嘅我，要哥哥教先識得啜邊到囉﹗



講完食到講瞓，其實都係咁上下，每晚大概十一點左右入房餵奶瞓覺，無乜特別嘢的話我多數飲完奶就瞓，不過當日太遲瞓晏覺又或者瞓多咗的話就會眼光光，玩到差不多一點先肯瞓，然後一覺會瞓到第二朝十點幾，跟哥哥一齊起身呃多餐早餐食。

晏覺就繼續無得逼，喺屋企就兩點左右飲完下午茶奶開始瞓，有時都會拖到成三點先肯瞓，然後差不多四點就會醒，如果出街的話就更心野，永遠要撐到完全無電先肯瞓，而且每覺都唔瞓得耐。



性格同脾氣喜好越來越明顯，無執輸見到哥哥做乜都跟住去做，好鐘意睇書聽故事，極貪靚成日照鏡，唔鐘意執玩具，咩都以為自己識想自己來，開始會怕醜唔應或避開陌生人，亦慢慢有trouble 2跡象，會因為表達唔到而發炆，大人唔順我意會掟嘢或者爆喊趴地發難，但勝在有偈傾冷靜落來都肯聽人勸，會知自己唔啱有意去改。



活動能力keep住A++以上級別，電力無限日日喺屋企四圍行同擒，出街會扭落地要自己行唔畀抱，去到公園會好開心咁不停上樓梯sir滑梯，識自己坐上搖搖馬到搖，識原地踏腳，識轉圈，識扮跳，成功吹到泡泡，亦知道可以去追泡泡來拍，但就依然輪盡容易跌，一幕幕動魄驚心嘅意外場面，嚇到媽媽大叫驚驚。



小手肌發展唔錯，叠到積木，識入形狀，識得推車仔，識用顏色筆畫畫，識扮倒茶落水杯，識餵米露飲奶，識㩒個玩具電話扮影相自拍，拉拉鏈拎袋仔入面嘅物品亦無難度，呢個月仲試咗玩泥膠，好快已經識得搣粒粒，亦終於學識自己除鞋除襪，開始有意識自己除褲著褲，poo poo完有意識同大人講。



事實再一次證明，每個小朋友都有自己嘅時間表，媽媽想急都急唔來，之前媽媽一直擔心我唔講嘢pass唔到健康院要求，點知我呢兩個月忽然講多咗好多嘢，仲已經進化到咩人都識叫（只視乎開唔開口叫）， 單字越講越多，成日跟大人口水尾講嘢，有次媽媽喺電話到同婆婆講畀哥哥激死，我又跟住話「激死」，亦開始嘗試講簡單句子，例如「啤啤喺到」「哥哥影相」同「謝謝媽媽」。



同哥哥越來越friend，成日跟住哥哥尾去玩，佢玩公仔我玩公仔，佢玩衫夾我玩衫夾，佢玩車我玩車，佢睇書我睇書，肯聽哥哥指令畀佢點，出街又會主動伸手拖佢，當然哥哥間中都仲係會整鬼我，有時又忍唔住同我搶玩具甚至郁手，但我依然好愛好愛佢，每次佢畀爸爸媽媽鬧到好金時，我都會用盡方法出手去救佢，之所以哥哥宜家都錫多咗我啦﹗



最後媽媽話今次唔講最強小三，講返佢呢排嘅煩惱嘢，我到底讀唔讀N好呢？媽媽問咗我呢個問題無數次，我當然醒目地擰歪面唔應佢，而佢同爸爸商量完都係reject咗我個offer，除咗唔捨得我咁細個去返學，最主要考慮到哥哥出年升小一要適應，全家人都要嚴陣以待（艾菲：哥哥個底實在太花），如果仲要同時搞我適應嘅問題佢真係會癲（艾菲：哥哥當年嘅適應問題真係令我充滿陰影），雖然佢都好忐忑呢個決定啱唔啱，不過佢話寧願自己辛苦D，都唔想喺哥哥升小一呢年出任何意外喎。