離開鐵道博物館後，我哋去咗上野尋寶，呢到係我哋每次去東京都必到之地，去多慶屋買吓手信，幫襯水果店食吓平靚正水果，慢慢行吓D鋪頭仔，搵吓D平價波鞋（當然唔會係新款）運動衫，陪米高睇吓golf用品，今次我哋都抱住同樣嘅心情過來，點知...遇著燒腩仔瞓未醒屎面一張，再加上突然其來嘅一場大雨，我哋團火即時被淋熄晒。
六年後重遊舊地，米高話呢到好多嘢都變咗，主要係覺得呢邊旅遊區味道重咗，遊客多咗連帶明搵遊客錢嘅鋪頭都多咗，反而以前幫襯開嘅地道小鋪所剩無幾，我哋冒住雨行咗一大條街後都無mood再行落去，米高求其買咗兩串水果氹返個仔開心就放棄。
然後我哋循例去多慶屋買咗D手信，平呢其實就唔算特別平，不過一場來到又勝在夠集中，點都掃返D零食，送禮自用都好。
買完零食D雨都仲係未有停嘅意思，我哋就去咗yamashiroya睇玩具，最開心當然係艾菲同燒腩仔，艾菲主要去睇咪露嘢格吓價，燒腩仔就喪玩Cars新出個賽車場同小薑搖控車，由於知道呢到D玩具唔特別平，所以乜都無買就走。
行咗一輪見D雨細咗，我哋就急急腳返車站坐車返酒店，放低D嘢換過件乾淨衫順便準備埋BB豆豬嘅晚餐，跟住就出發去秋葉原搵食，其實呢到艾菲同米高都係第一次來，見今朝咁早起身大家都攰，來呢到相對去新宿涉谷車程無咁耐，所以試吓過來呢邊行等燒腩仔無咁辛苦。
出站後求其上咗車站隔離Yodobashi樓上嘅餐廳層搵食，見呢間食定食嘅餐廳好似幾好味又坐得舒服就入去，好好彩咁有得坐細房tatami位自成一角，兩個小朋友嘈D都唔怕，呢晚艾菲食sukiyaki，米高就又食魚生飯，食物質素好OK呀﹗
另外我哋叫咗唐揚炸雞set畀燒腩仔，真係睇樣都覺得好正，艾菲偷食咗一件堅係又脆又香口喎﹗
食飽就落返去行Yodobashi，估唔到係咁大咁好行，玩具層仲要勁多嘢玩，重點係佢嘅產品mark價畀出面平，退稅安排超好，唔使等話咁快搞掂，相比之後一日喺Donki大排長龍等成個鐘真係差天共地﹗
由於呢日艾菲一早同燒腩仔講明，媽媽買唔到嘢嘅話係唔會返酒店，所以佢相對前一晚合作咗，無再搞搞震扭去洗手間，扭頸喝，扭食糖，扭乜扭物咁，而經過一輪嘅作戰，艾菲除咗喺藥妝層又掃咗袋免稅護膚品，仲掃咗兩件咪露衫（大概係香港正價六折），巧虎車仔，同兩個Thermos保溫飯盒畀燒腩仔來緊升小用（其實艾菲都唔知自己會唔會咁神心畀個仔帶飯，不過呢款飯盒香港無得買，而且只係二百幾蚊一個，一場來到掃咗先啦）。
買到人哋落閘閂鋪我哋先捨得走，拎住大包細包咁返酒店，個滿足感大到呢，返酒店搞掂兩個小朋友上床瞓覺，又係艾菲嘅宵夜時段，呢晚食酒店樓下Family Mart買嘅吉士布甸pancake，味道一般唔特別吸引，唯有寄望第二晚食到好西啦﹗
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
九州東京之旅~Day9 宮崎>東京part2
九州東京之旅~Day10 鐵道博物館>上野>秋葉原part1
沒有留言:
張貼留言