入返正題先，來到旅程嘅第11日，終於抽到時間去Sky Tree，本來想揀黃昏時間上來順便睇埋夜景，不過上網check咗呢晚會有花火大會暫停開放，咁唯有改朝早上來睇，又我哋無預先訂飛，來到walk in買，好彩都唔使點等，跟住人龍行大概十至十五分鐘已經上到去。
不過可惜嘅係，呢日一直天陰陰，由Sky Tree望返過去我哋住嘅東京鐵塔都仲望到，但只有好天先見到嘅富士山我哋就無緣見到，唔知點解每次來東京，見到富士山都會好開心，到宜家帶兩個小朋友來東京，都好有情意結想畀佢哋見識吓，或者...遲D...我哋再安排來多次東京啦...嘻...
唔知係唔係人多嘅關係，兩個小朋友呢朝都有D失控，燒腩仔未上去前猛話驚又呢又路咁，上到去就搞搞震亂咁走，就連平日緊跟大人嘅BB豆豬呢日都忽然唔要揹唔畀抱亦唔肯拖實大人，好彩喺混亂一片下艾菲仲記得捉實佢兩個影張相，亦記得攝影師朋友教呢D位要用閃燈，又全靠個閃燈成功引到BB豆豬笑。
Sky Tree上面有D touch screen畀遊客玩，用手指篤落去D建築物到可以放大D景點慢慢睇，啱晒燒腩仔呢D又好奇又手多嘅小朋友，至於無人理嘅艾菲就唯有四圍影吓相，仲第一次試玩相機嘅微縮效果，望返落雷門淺草。
我哋無加錢再上頂層，根據經驗再上嘅分別都不大，而且兩個小朋友都唔識欣賞就無謂晒錢，我哋沿路落返去下面睇玻璃層同行手信鋪，買咗兩張明信片就走。
喺Sky Tree上面落返來，無食早餐嘅艾菲超肚餓，所以呢餐求其食food court，又由於落來時出咗D意外，燒腩仔怒發脾氣艾菲就全程黑面，夾心人米高唯有hea買，咁銀築地章魚燒同天婦羅烏冬出事嘅機會都唔高嘅。
不過呢碗近期好hit嘅吉列牛扒飯就...well...艾菲同米高都一致認為浪費咗塊牛扒囉，又或者咁啱我哋幫襯呢間餐廳唔好食姐...
經過一餐飯嘅時間去冷靜，燒腩仔終於知錯同艾菲道歉，艾菲就梗係剩機同佢講數，要佢乖乖畀艾菲喺到行街唔可以扭啦。
一場來到，去Tomica shop朝聖係必須嘅，原先以為呢到無減價自己唔會買到嘢，點知日本D鋪頭真係好識做生意囉，艾菲又忍唔住手買咗D限定嘢破財啦﹗
睇完Tomica唔差在過埋隔離鋪Plarail見識，見到新出嘅巧虎火車超級靚，不過燒腩仔唔係超級fans艾菲就忍住手無買，基本上呢到同Tomica一樣，有個area放晒D火車路軌喺到任玩，成班車迷瘋狂到不得了，基本上每十分鐘就有一個仔喊住畀爸爸媽媽拖走，燒腩仔當然係其中一個，好彩佢喊咗陣就收聲畀艾菲繼續shopping。
經過兩個鐘嘅血拼，艾菲都唔係買咗好多嘢姐，只係買咗個日本製麵包超人背囊畀BB豆豬同一架Tomica大貨車畀燒腩仔（香港未見過，入面可以裝八架車仔仲有包曲奇餅），另外買咗架會發光嘅Sky Tree貨車同日本限定Hello Kitty X Waterfront縮骨遮畀自己。
然後行飽買夠我哋仲未捨得離開Sky Tree，由於睇到指示牌介紹呢到有間郵政博物館，我哋見有時間就走咗去參觀。
地方唔係好大，仲要畀入場費，不過我哋買完飛，職員就叫我哋抽奬，然後畀咗左面堆嘢我哋，入去後有個kids area，可以跟遊戲機玩小遊戲做運動，可以自己畫一張明信片，亦可以好似燒腩仔咁，影相DIY一張古代郵差嘅明信片寄返香港。
離開kids area後入場就會見到呢個古董郵筒，好有feel呢﹗
古代嘅郵車VS現代嘅電單車
除咗有歷代嘅郵政用品，亦有好多唔同國家嘅郵票睇，如果鐘意集郵的話應該睇一日都睇唔完，不過我哋帶住兩個坐唔定嘅小朋友，四圍參觀吓玩埋呢個扮郵差送信嘅game就走啦﹗
臨走喺手信店買埋郵票，再喺呢個Sky Tree郵筒寄埋D明信片返香港。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
九州東京之旅~Day9 宮崎>東京part2
九州東京之旅~Day10 鐵道博物館>上野>秋葉原part1
九州東京之旅~Day10 鐵道博物館>上野>秋葉原part2
沒有留言:
張貼留言