離開藤子F不二雄博物館後，我哋去咗好多年前艾菲一去即愛上嘅自由之丘，唔知由幾時開始去東京，唔再鐘意喺新宿涉谷流連同人逼，反而鐘意來呢邊行小店慢慢尋寶，今次帶住小朋友來就更加，雖然燒腩仔極唔鐘意陪艾菲shopping，不過有踏切睇佢即超級興奮。
喺香港無機會睇到踏切，所以路過時點都捉住佢停低影張相，但身為超級車迷嘅燒腩仔竟然表現得扭扭擰擰，到第二次再經過時佢忽然叫我唔好再影，艾菲先意會到佢應該係怕我哋過唔切去對面而火車又開會有危險，好窩心又好傻瓜呢﹗
要令燒腩仔心甘情願陪艾菲shopping，單靠睇踏切係唔夠嘅，食物同飲品攻勢都好緊要，一場來到點都跟杜如風去食返件人氣芝士撻先。
燒腩仔同米高share食一杯雪糕，單睇個樣就知好味啦﹗兩父子爭食爭到呢﹗至於艾菲就獨享一個芝士撻，不過無想像中咁芝士味，有D失望囉﹗
反而之後行吓行吓入咗間麵包店，貪得意買咗件焦糖布甸多士來食，堅係好似食緊焦糖布甸咁，個味令人一試難忘呀﹗
飲飽食醉就入返正題，來呢到艾菲其實有三個目標，第一個係買手袋，根據過往經驗所得，呢到買艾菲好鐘意嘅Rootote，價錢相對專門店會平D，不過代價就係一定唔齊款，雖然今次艾菲揀唔啱媽媽袋，只係求其買咗一個其他牌子嘅手袋作替換，但右邊個普通tote bag款Rootote只係1200yen一個咋，平日自己出街扮吓偽文青都OK㗎﹗
搞掂完買手袋，跟住第二個目標就係去Cuoca專門店掃麵包機預拌粉，雖則喺香港Citysuper都會買到佢哋嘅預拌粉，不過呢到會多好多味揀，絕對值得冒住行李超重嘅風險來入貨。
至於第三個目標，就係帶燒腩仔同BB豆豬去公園玩，記憶中想當年艾菲同米高曾經去過一個有搖搖熊貓玩，好日本舊式公園feel嘅公園仔，不過好可惜我哋行來行去都搵唔返，見Cuoca後面有個公園就入咗去，點知勁多沙蚤咬到一腳都係...
不過小朋友有得玩係唔會怕畀嘢咬，燒腩仔自動波滿場飛，韆鞦滑梯無限loop住玩，就連一直坐喺BB車嘅BB豆豬都不停掙扎，要我哋放佢出來一齊玩，騎上呢隻小鯨魚上超級high咁自己搖。
喺自由之丘行到日落就走，來到東京行程嘅最後一晚，已經無咩邊到特別想去想買同想食，於是返酒店放低D嘢之後，決定近近地又去秋葉原行吓，最後衝次行埋上次Yodobashi無行嘅低層，終於畀艾菲搵返三年前喺北海道買，噴飛滋好有效嘅口內炎噴霧，另外仲買咗把減價waterfront縮骨遮（已經唔記得幾錢，只記得係平到笑），同喉嚨痛飛滋兩用嘅噴霧（又係堅work，痛到唔想講嘢食嘢時噴一噴即時舒服好多）。
行完就上返餐廳層，又求其揀間餐廳就入去食，之前餐餐都就住BB豆豬揀食熟嘢，唔係飯就係烏冬，今晚終於輪到艾菲食魚生飯啦﹗
食飽就快手返酒店，皆因搞掂兩個細沖涼同餵奶瞓覺後，仲有大半間房嘅戰利品同行李等住艾菲執，基本上無兩三個鐘都唔會執得完，然後有個人不停喺隔離問艾菲呢晚想食咩宵夜，仲超級魔鬼咁問係唔係想食松屋（艾菲呢幾日講咗好幾次想食佬飯，不過湊住兩個細真係無可能入去食），之後真係凌晨一點半出去買外賣畀艾菲食，嘩﹗個飯甜到呢﹗
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
九州東京之旅~Day9 宮崎>東京part2
九州東京之旅~Day10 鐵道博物館>上野>秋葉原part1
九州東京之旅~Day10 鐵道博物館>上野>秋葉原part2
九州東京之旅~Day11 Sky Tree>親水公園>錦系町>涉谷part1
九州東京之旅~Day11 Sky Tree>親水公園>錦系町>涉谷part2
九州東京之旅~Day12 藤子F不二雄博物館>自由之丘>秋葉原part1
沒有留言:
張貼留言