出發前無意中發現Sky Tree對面馬路有個大橫川親水公園好正，見燒腩仔都算合作畀艾菲shop咗咁耐，就放棄原定嘅Akachan加插個行程帶佢去玩，點知去到門口叔叔話仲有五分鐘閂門﹗﹗﹗艾菲聽完堅係晴天pig pig囉﹗﹗﹗乜公園都會閂門㗎咩﹗﹗﹗（香港公園24小時㗎嘛...真係無諗過日本公園會閂五點...）真心諗住黃昏時間無咁熱可以慢慢玩㗎喎﹗﹗﹗
一場來到，乜都唔理啦﹗應咗叔叔知道後就直衝入去，玩到一分鐘得一分鐘﹗好彩公園唔算好大，即叫燒腩仔跑上去玩呢條超長滾輪滑梯，快快手我哋都成功玩到兩次呀﹗又可能呢到已經揚咗，眼見都唔少遊客帶小朋友來玩，日本小朋友反而唔多。
除咗超長滾輪滑梯，仲有條低階版嘅超斜滑梯同搖搖馬，燒腩仔自動波玩完長滑梯就衝去玩直至畀叔叔趕走，本來艾菲都想放BB豆豬出來一齊玩，相入面位日本媽媽仲喺艾菲手忙腳亂時幫艾菲手抱佢上去添，不過佢應該係驚唔肯玩。
玩得五分鐘，小朋友到喉唔到肺，當然好不滿發晒脾氣，怪只怪艾菲事前無做好功課，好彩有米高幫忙收拾殘局，帶佢去便利店任揀一枝雪條順返條氣。
想玩無得玩，米高就建議去返原定行程，坐的士過去錦系町行Akachan，一心以為坐的士返酒店嘅燒腩仔，見到我哋喺一個陌生車站落車，再知道媽媽又要去shopping係即時崩潰咗囉﹗問咗好多次做咩喺到落車﹗路過商場見到Daiso時更大叫唔准艾菲再行（已經認得個招牌），好彩去到Akachan畀架BB車佢坐吓休息吓就無再嘈，艾菲就快快手行咗一個圈，掃咗條減價裙畀BB豆豬，另外買咗新幹線同Hello Kitty立體口罩，巧虎膠布（開盒後先知入面係無巧虎樣），順手買過個新嘅車車衣架畀燒腩仔出年升小用。
喺Akachan到抖咗陣之後，燒腩仔心情明顯好返D，由於呢晚我哋打算殺落涉谷，所以襯呢邊無咁多人喺到食咗晚飯先，去咗我哋去日本必到嘅和幸，叫咗個兒童餐畀燒腩仔，跟餐又有玩具送，但明明有成籃玩具任佢揀，佢都係要揀返同之前架差不多款嘅賽車...
艾菲例牌食吉列豬扒set，麵豉湯，白飯，沙律菜依然係任裝，但艾菲至愛個柚子沙律汁居然無咗﹗﹗﹗又一晴天pig pig呀﹗﹗﹗呢日到底發生乜事﹗﹗﹗
食飽就出發去涉谷啦﹗事前都畀定心理準備燒腩仔呢晚會夜，可能係之前喺Akachan抖咗陣好少少，又咁啱喺路程上畀我哋遇到呢架好靚嘅小新火車，出站後又見到班人玩真人版Mario go kart，佢覺得好過癮又好少少。
今次來東京無安排去Disneyland，但點都係要去Disney Store睇吓有無D咩好嘢，趕喺閂門前去到，掃晒咁多層之後只係買咗個新水樽畀燒腩仔同一套Chip n Dale碟畀自己，畀錢時見個Cars環保袋幾靚又買咗返來，打算用來hand carry D易碎零食返香港。
之後轉戰Donki，一路行一路睇吓無聊嘢，玩吓日本一帽再睇吓芫茜架，燒腩仔都頂得住無乜扭，呼~
明明都已經買咗兩袋免稅化妝品，前一晚先同米高講無乜嘢要買㗎啦，點知又畀艾菲喺到買到成車嘢，但呢到原來搞退稅要排兩次隊，條龍仲要長到打晒蛇餅，我哋由十點排到十一點幾先搞掂，而佢哋D職員仲要驗屍咁驗你D貨，肯定全部都係藥妝部嘅貨先有得退，真係同前一晚喺Yodobashi嘅極速係天同地比囉﹗所以今次以後我哋決定blacklist佢唔再幫襯﹗
又由於呢晚實在搞到太夜，我哋呢晚嘅宵夜係要排住隊食，米高同燒腩仔排隊，艾菲就揹住BB豆豬落超市買，Mochi雪糕基本上都唔會難食得去邊，食完搞掂退稅就極速衝去坐車返酒店，返到去都成十二點，先搞掂兩個小朋友沖涼，再餵奶同自己沖涼已經差不多點幾兩點，好彩仲有一晚唔使執行李住，不過第二朝又要早起趕行程囉﹗
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
九州東京之旅~Day9 宮崎>東京part2
九州東京之旅~Day10 鐵道博物館>上野>秋葉原part1
九州東京之旅~Day10 鐵道博物館>上野>秋葉原part2
九州東京之旅~Day11 Sky Tree>親水公園>錦系町>涉谷part1
沒有留言:
張貼留言