作為前叮噹粉絲，艾菲今次去東京其中一個好想去嘅地方就係藤子F不二雄博物館，我哋第一晚到福岡米高已經去Lawson買飛，但由於佢相當受歡迎又限人數限時間入場，我哋早十日買都只可以買到星期一朝早十點嘅飛，唯有捱眼瞓早D起身趕車過去（個地點其實都幾唔方便），又我哋準時十點前到門口，眼前出現嘅係一條長長嘅人龍，大家嘅熱情真係超乎艾菲想像﹗
一入場職員會一人畀一部機你聽展品導賞（有日文，英文同普通話揀），同再三提醒展覽廳入面係唔可以影相，好多展出嘅藤子F不二雄手稿都係相當珍貴，當然燒腩仔呢個年紀係未識欣賞，但我哋喺側邊簡單講介吓佢都似明非明咁，睇完展覽就可以憑入場時派嘅飛仔出去睇套小電影，內容簡單易明，唔使識日文都OK，至少燒腩仔今次無喊驚仲識笑。
睇完展覽同小電影，大家可以好似BB豆豬咁同叮噹一齊坐低慢慢睇漫畫，或者去後面Kids area玩吓（for小BBonly）。
亦可以玩吓呢兩部藤子F不二雄限定作品扭蛋機，同前面D touch screen嘅小遊戲。
涼夠冷氣可以出去室外搵呢個浸完溫泉變咗靚仔嘅技安。
同埋叮噹妹妹叮鈴。
仲有同樣係藤子F不二雄作品嘅Q太郎。
之後可以行返出大草地搵大雄的恐龍，好開心我哋喺呢個位遇到個日本太太主動話幫我哋影全家福，重點係影得靚，嘻...
至於隨意門同公園水渠都係唔少得必影嘅，其實同場仲有藤子F不二雄其他作品，不過艾菲只識叮噹嘅嘢同認得Q太郎一個...
如果有心影，呢到基本上處處都係沙龍位，無奈兩位小model唔多合作仲越叫越走，艾菲就決定趁早收隊去餐廳搵位食飯好過，叫咗個叮噹意粉同叮噹飯，真係睇見都開心，而且味道都OK幾好食。
食完正餐再行返出去大草地買甜品食，先來一個記憶麵包同叮噹銅鑼燒雪糕，估唔到平日粗心大意嘅燒腩仔，居然留意到塊記憶麵包D字調轉咗（佢無乜睇叮噹所以唔太知呢個係咩來，更加唔明D字點解會調轉）。
嘻...我哋唔客氣啦﹗另一估唔到係之前唔肯食雪糕嘅BB豆豬竟然加入戰團同哥哥一齊爭食。
食飽再去行埋手信鋪先走，眼見好多人都帶住個竹蜻蜓頭夾真係好想好想好想買個畀燒腩仔玩，好彩艾菲花盡口水後終於氹到佢帶，另外再買咗隻比較特別嘅牛仔布叮噹同一隻叮噹碟畀自己。
喺到玩咗一個朝早，係時候同叮噹講bye bye啦﹗
走同來嘅時候一樣，坐返叮噹專車返火車站，車身印晒藤子F不二雄嘅卡通作品，就連車入面落車鐘同扶手都係佢嘅作品都幾靚，而燒腩仔就專登揀坐司機隔離個單丁位，話要睇吓司機叔叔點揸車喎，果然係個超級車迷呀﹗
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
九州東京之旅~Day9 宮崎>東京part2
九州東京之旅~Day10 鐵道博物館>上野>秋葉原part1
九州東京之旅~Day10 鐵道博物館>上野>秋葉原part2
九州東京之旅~Day11 Sky Tree>親水公園>錦系町>涉谷part1
九州東京之旅~Day11 Sky Tree>親水公園>錦系町>涉谷part2
沒有留言:
張貼留言