來到旅程嘅最後一日，起身梳洗完執好晒嘢，check out前點都捉兩個小朋友同我哋房個東京鐵塔景影返張相留念，到底佢兩個點解咁合作笑得咁開心呢？艾菲已經唔係好記得，估係難得我哋畀佢哋坐喺個喼上面掛，kakaka...
壽司大，唔食都要路過望吓條人龍有幾長，想當年艾菲同米高第一次拍拖來東京，天未光就來排隊等食好嘢，宜家真係有心無力啦，派燒腩仔影返張相當食咗算。
之後去行新大樓，感覺同場外差好遠，但就真係乾淨D好行D嘅，然後米高一見到條Kinki即念念不忘，艾菲已經估到佢想點...
行完就出去場外市場掃街，之前睇《築地100》已經流晒口水，不過實情係帶住兩個細過來，你唔係入餐廳坐低食都食唔到D咩好嘢，所以都係睇咗當食咗算，至於練仙嘅燒腩仔更加係除咗玉子燒乜都話唔食，最後為免佢餓親就請佢食咗杯期間限定蜜瓜雪糕。
咁BB豆豬呢，今次都有份一齊食㗎，煮足十二日BB餐嘅艾菲今日終於無煮嘢佢食，專登買咗個三文魚飯糰畀佢，諗住應該都啱佢食無乜問題，點知食完佢就由回程嘅飛機開始肚痾，返到香港都仲痾多幾日先正常返，估係佢D腸胃未食慣咁油嘅嘢（但明明喺香港都食過三文魚），唉...妹妹此行真係多災多難。
掃完街，米高仲係覺得差D嘢咁，於是艾菲鼓勵佢返轉頭去搵返條Kinki，但因為溝通上嘅錯誤，原來間鋪係無工具燒魚，咁我哋只好改做刺身，好味係好味嘅，不過咁樣食感覺有D浪費咗條魚囉...
食飽就返酒店拎返行李坐車去機場啦，此行半個喼去，兩個爆喼加兩大袋返，都唔係好過份姐，嘻嘻...咁當然畀地勤姐姐落heavy tag係走唔甩㗎啦，但我哋有三個半人quota未使加錢，又其實艾菲到底係點樣用兩個鐘將堆滿半間房嘅嘢塞晒入去？重點係所有易碎易爆物品返到來都仲完好無缺，自覺pack嘢技巧越來越高呀﹗哈哈哈...
專登提早來機場，目的當然係為咗繼續shopping，入閘前居然畀艾菲喺Rootote買到個背囊，個設計好正好方便拎嘢，而且呢個色同款都好易襯衫，唔使再好似之前吓吓要sporty look先揹到背囊，重點係仲要有得免稅，超開心呀﹗
行完街我哋就入閘，過完關以為仲有嘢可以買，點知羽田機場呢邊無想像中多嘢行，仲要間間手信鋪都大排長龍先畀到錢，所以最後衝刺只係買咗幾盒限定Pocky同Pretz做手信，然後臨上機前畀艾菲喺閘口隔離間shop買到本小學館出嘅兒童雜誌喎，入面有勁多小遊戲同靚靚卡通貼紙送，仲跟一套麵包超人紙質pizza玩具（雖然係紙製但唔易爛嘅），啱晒燒腩仔呢個年紀上機玩，艾菲真心推介呀﹗
來日本玩咗十三日，終於都要走啦...第一次喺咁大雨嘅情況下起飛，不過真心好彩個天喺我哋上火車去機場先開始落雨，否則拖住兩個細又拎住咁多行李，真係會好狼狽，亦好感恩今次旅程雖然出咗D意外，但我哋都能夠平平安安齊齊整整咁返到屋企。
上機無耐，飛機餐就出場，左邊係燒腩仔嘅兒童餐，繼續好唔吸引，燒腩仔只係食咗個包就唔食，至於大人個牛肉飯，正常味道入得口嘅。
BB豆豬照舊上機無耐就畀艾菲用媽媽奶迷暈咗，估唔到之前兩程機都唔肯瞓嘅燒腩仔，今次居然食完個包就瞓咗，終於無人搞搞震可以安心食住雪糕睇晒成套《29+1》啦﹗YEAH﹗
不過喺飛機到睇埋日落，艾菲就要返去現實世界啦，而現實世界係殘酷嘅，之前提過BB豆豬食完飯糰唔舒服，所以佢呢覺瞓醒之後已經率先畀咗D好嘢艾菲，搞到爆晒片要喺飛機上面換衫，嚴重到連同坐嘅艾菲都污糟埋，返到屋企當然仲有一大堆家務同行李要艾菲清啦...啦...啦...
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
九州東京之旅~Day9 宮崎>東京part2
九州東京之旅~Day10 鐵道博物館>上野>秋葉原part1
九州東京之旅~Day10 鐵道博物館>上野>秋葉原part2
九州東京之旅~Day11 Sky Tree>親水公園>錦系町>涉谷part1
九州東京之旅~Day11 Sky Tree>親水公園>錦系町>涉谷part2
九州東京之旅~Day12 藤子F不二雄博物館>自由之丘>秋葉原part1
九州東京之旅~Day12 藤子F不二雄博物館>自由之丘>秋葉原part2
沒有留言:
張貼留言