由於有過燒腩仔當年太早影嘅經驗，BB太細一舊飯咁唔太好睇，艾菲啱啱生完未去水腫又影到好肥，大家都同意等BB豆豬足一歲，識行識走最好玩時先去影，然後一拖就拖到上年八月，我哋一家去完旅行返來先得閒影，咁啱Sens又做團購於是打去問價，跟住就join咗另一個唔係團購嘅十人plan，加多一位錢全家總動員11人影足90分鐘。
由於知道燒腩仔婆婆同姨媽都唔鐘意揀相，實係好豪咁加錢全部相買走，所以事前都有考慮過其他有得全包嘅studio，不過有過上年燒腩仔超失控嘅經驗，艾菲覺得studio環境同攝影師質素真係好緊要，加上我哋人太多，真係唔敢隨便試其他studio， 結果我哋今次拍攝基本上可以用一片混亂來形容，三個小朋友完全係你有你講佢有佢搞事，但出來嘅相又出奇地好OK喎，唔信？去相睇吓啦﹗
一埋位大家先同攝影師哥哥自我介紹，艾菲都未同攝影師哥哥講老人家想要咩，影慣影熟嘅佢已經好醒目，自動波叫公公婆婆同三個孫影咗先（上次去另一間無同攝影師講明，公公婆婆影唔到同孫仔孫女嘅單獨合照囉），跟住就係我哋各自嘅全家福，佢哋總有辦法令小朋友笑得開心，唔講唔知影呢張四萬咁口嘅相前，BB豆豬係零表情呆呆豬緊㗎囉﹗
等埋燒腩仔姨媽一家同燒腩仔舅父影，我哋就換第二套衫繼續，又係先影公公婆婆，再影公公婆婆同三個孫，跟住就各自小家庭影全家福，最後單獨影三個小朋友。
要燒腩仔正正經經影相，難度係屬於十級超級難，但佢勝在搞事時永遠笑笑口，所以影出來效果一定唔差，右邊張跳起相，仲影到佢好型添﹗
哥哥屬於十級妹妹亦一D都唔弱，全程唔係走咗去就係不停呃星星餅食，好彩無扭到眼紅紅，氹吓氹吓都肯笑。
跟住攝影師助手拎咗D道具出來畀幾個小朋友玩，場面就更加失控，三個走來走去又唔聽指令，好似燒腩仔呢個滑水look，堅係激到攝影師哥哥燥燥地先影到。
之後轉房換衫影另一個景，搖搖馬係妹妹飛佛，自動波埋位，YEAH！
搖搖馬嘅另一邊係幸福摩天輪，有個多手嘅小朋友叫極佢唔好搞，隻手都係不自覺咁要去掂，又一次激到攝影師哥哥燥底咗...
最後出場係呢個帳幕，亦係影得最smooth嘅位，三個小朋友齊齊匿喺帳幕入面玩，再輪流叫佢哋跑出來嚇我哋，呢D嘢佢哋最啱玩啦，kakaka...
有樣學樣嘅BB豆豬，跑出來見到我哋咁好反應，笑到勁開心﹗
呢張哥哥拖住妹妹跑出來嘅相，有動感得來都好sweet呀，艾菲大愛﹗
沒有留言:
張貼留言