三點式妹妹@清水灣

繼續回到八月時，去完十幾日旅行返來，米高D大假仲未清完，所以放多個星期陪我哋，艾菲當然要抓緊暑假嘅尾巴，叫佢再帶我哋去沙灘玩，皆因上次喺日本沙灘實在玩得唔夠喉，重點係妹妹套三點式水著仲未有機會出場，上次去泳池怕佢凍所以著一件頭泳衣，去日本又怕麻煩懶得換無著到，今次再唔著分分鐘要等多年㗎啦﹗



本身有諗過再去半月灣，但諗起入到西貢仲要轉船，帶住兩個細又大包細包咁，都係唔好咁辛苦，近近地去清水灣算，食飽午餐再慢慢執嘢出發，去到都係兩點幾三點仲有大把時間玩，然後我哋set好帳蓬開好地蓆就放BB豆豬出來，以為佢有過上次日本沙灘嘅經驗應該OK，點知都係要D時間warm up。



花咗D時間終於適應咗個質感，但都係keep住呆呆豬樣。



至於燒腩仔當然係自動波埋位玩，仲不停拉米高陪佢出去打水。



直至搞事哥哥，將BB豆豬隻腳埋咗入沙，估佢會反抗大喊，竟然又無喎仲好enjoy咁嘅樣。



趁住BB豆豬心情好，艾菲即刻叫佢個前世情人米高幫手呼喚吓佢，嘩﹗有人即刻冧冧豬咁抬頭望鏡頭笑囉﹗



之後兩兄妹好相親相愛咁一齊玩沙玩水。



然後有個為食妹妹試完食沙又偷飲海水囉﹗差D想試食埋手上執到個果實添﹗真係望少眼都出事﹗



走之前帶BB豆豬出去玩吓水，起初都有少少驚叫咗兩聲，但拖住佢衝咗兩次浪就開始識笑，仲越衝越前超大膽，最後梗係跌咗落水全身濕晒啦﹗kakaka...