作為一個超級車迷，來到東京點可能唔去鐵道博物館，而為咗可以趕喺十點博物館開門時到，幫燒腩仔拎揸小火車張籌，我哋只好七點幾就爬起身出發（艾菲同米高真係廿四孝到呢...）。
我哋坐火車過去，沿路要轉兩程車，電車男當然把握機會霸個頭位睇司機叔叔揸車，而喺轉車時忽然見到好多途人向住對面月台架火車影相，我哋望過去見到有班記者之類嘅人不停喺車入面影相，車廂入面嘅設計亦好似好豪華咁，估計係新車落地要對外介紹，我哋都無執輪影返張相先。
匆匆忙忙咁趕到去大宮站，有個心急嘅爸爸因為怕遲到拎唔到籌，猛催我哋行快D，不過一見到鋪頭就分晒心嘅艾菲，再加上未瞓醒嘅燒腩仔，基本上係佢急我哋唔急，然後行到去轉車站附近，忽然見到有個姐姐拎住個宣傳牌介紹呢張紀念飛，雖然艾菲唔識日文但都feel到應該係著數嘢，及時叫停準備㩒飛嘅米高望一望，同樣價錢嘅紀念飛，坐完可以自己keep返，㩒飛仔就要交返入閘機，作為遊客梗係買紀念飛留念啦﹗
轉咗一大輪車後，我哋十點半左右到博物館，唔知係唔係星期六嘅原故，門口已經排咗一大堆同道中人，大概等咗十五分鐘先入到場，然後一早做好資料搜集嘅米高，即帶我哋行去拎揸小火車嘅籌，當時已經派到兩點半，基本上再遲多半個鐘到，應該都唔會有機會玩。
拎完揸小火車嘅籌，穿過超邪惡嘅plarail場，我哋入返場後又見到好多條人龍，原來係排揸模疑火車，基本上條條都差不多，我哋就揀咗排艾菲鐘情嘅山手線，都等咗差不多半個鐘先有得玩，形式有D似玩《電車Go》，喺模疑駕駛室入面對住螢幕揸一個站，燒腩仔就負責品川去田町呢段路。
揸完車之後終於可以入場去睇吓D舊火車，不過一心係來揸車嘅燒腩仔，明顯興趣不大...
行吓行吓，艾菲又見到D火車隔離有條人龍，原來有兩部車開放咗駕駛室可以畀遊客上去參觀，今次有得扮揸車喎，燒腩仔當然喜歡啦﹗
排完一架就搶住去排第二架，艾菲只好同BB豆豬乖乖喺下面等佢影相。
跟住艾菲又見到有幾個義工叔叔企咗喺架火車隔離，仲見到有遊客帶住火車司機嘅帽影相，嘩﹗呢D型仔嘅玩意嘢梗係拉燒腩仔埋去玩，不過燒腩仔向來唔like呢D扮乜扮物嘅嘢，艾菲唯有呃佢要帶咗呢頂帽影相，一陣先有得出去揸小火車，天真嘅佢即刻好合作咁帶住頂帽任我哋影，kakaka...
其實博物館好大，但我哋只係行咗一層，睇吓唔同款嘅車廂同舊時嘅火車精品，話咁快已經十二點，米高話不如食嘢先，仲叫我哋行出去戶外間便當鋪睇吓啱唔啱食，唔知頭唔知路嘅我哋於是照做。
一行出去即見到條人龍排隊買便當，又見到一卡舊車廂放咗喺到，原來喺呢邊買便當，可以上火車到食，嘩﹗乜咁有風味呀﹗啱晒我哋呢對電車母子啦﹗米高你早講清楚嘛﹗
佢呢到有幾款便當，有D係普通便當飯盒食完即棄，亦有貴少少嘅火車便當，食完可以拎返個火車飯盒返去留念，咁一場來到梗係買火車便當，燒腩仔揀咗北海道新幹線，艾菲就揀咗蒸氣火車，以為呢D便當應該好睇唔好食，不過食落又OK入得口喎，而由於呢D便當係售完即止，所以想試嘅一定要早D去搵位食飯，我哋食完落返車睇已經有好幾款售罄。
食飽仲未夠鐘揸火車，又繼續四圍參觀吓，行吓行吓去咗新幹線區，燒腩仔喺呢次行程入面不停話要坐新幹線，幾乎每日都講幾次，但今次九州自駕遊加東京市區內參觀，真係安排唔到你坐新幹線，就坐住呢D史前新幹線先啦﹗
之後米高守諾言，喺燒腩仔揸小火車之前，安排咗成個鐘時間畀燒腩仔入去邪惡嘅plarail場到玩火車，點解艾菲話邪惡？皆因呢到係plarail火車路軌配件任玩，對於小車迷來講實在好難抗拒，一放咗佢哋入去基本上係好難拉返佢哋出來，亦好容易興奮到乜嘢規矩禮貌都唔使守。
燒腩仔去玩火車，BB豆豬就喺場外瞓晏覺，艾菲可以專心陪仔玩，呢到每一段路軌每卡火車都要靠自己去搵，要瞄準邊個小朋友就走或放手唔玩，即跟住尾去拎先有得玩，我哋堅係幾經辛苦先霸到個地盤，又玩咗一陣燒腩仔話想要架識郁仲有電嘅火車頭，要知道D火車就咁放喺到畀小朋友任玩，火車頭已經買少見少，仲有電識郁嘅簡直係稀有物種，為搏個仔一笑乜都得嘅艾菲係搞咗勁耐先終於搵到囉﹗
由於事前都有同燒腩仔講明，玩完plarail夠鐘就要出去揸小火車，否則過時就無得再玩，所以米高話夠鐘佢都好合作即放低D plarail跟我哋行，排咗一陣隊就輪到我哋畀錢入場玩，呢架小火車係專為小朋友而設，想當年艾菲同米高兩個大人拍拖來係唔玩得㗎，小朋友真係可以自己控制架火車前進加速定停低，亦有風笛制可以響安，中途亦會有紅綠燈超逼真，之所以艾菲出發前已經同米高講明呢個係必玩，要佢做好資料搜集唔可以錯過。
然後揸完一次小火車，有個車迷表示唔夠喉，開始扭扭擰擰話要揸多一次，咁其實有個好醒目嘅爸爸都估到個仔會扭，入場時一早打咗個眼色叫艾菲去拎多張同時段嘅籌（一個大人只可以拎一張），見揸完第一轉都仲未過時，我哋就再去排隊畀佢玩第二轉，不過就講明只此一次，因為妹妹未夠年齡玩，佢先會有多一次機會玩，所以玩完要心足唔可以再扭啦﹗
揸完小火車我哋都差不多夠鐘要走，所以帶燒腩仔行咗一round手信鋪，叫佢自己揀咗隻火車襪畀自己，我哋就結束呢次鐵道之旅。
臨走要還返張車飛入場卷，還之前影返張相留念啦﹗
又入場時匆匆忙忙，完全無機會影門口嘅影相位，臨走前去補影返。
仲有呢個到此一遊嘅打卡位，想當年艾菲都有一張㗎﹗嘻...
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
九州東京之旅~Day8 宮崎part1
九州東京之旅~Day8 宮崎part2
九州東京之旅~Day9 宮崎>東京part1
九州東京之旅~Day9 宮崎>東京part2
沒有留言:
張貼留言