呢朝喺酒店樓下便利店買個早餐，我哋就開車出發去日南海岸啦﹗呢日天氣好到你驚，超級熱加超級曬，一離開冷氣地方完全覺得自己喺個蒸爐入面咁，而好可惜嘅係咁好天霧霾依然強勁，藍天白雲依舊欠奉。
來咗九州八日，睇住BB豆豬D膚色一日比一日黑（艾菲同燒腩仔都易曬黑，但我哋轉頭會自然白返，BB豆豬呢應該係似米高就難白D），呢日一聽到米高話戶外地方多，仲話黃昏時份會去沙灘玩，點都同佢落重防曬同帶帽，前一晚Daiso買條Hello Kitty夾帽帶更加係即買即用。
千里迢迢咁走來日南Sun Messe為咗乜？之唔係為咗相後面七舊彷復活島摩艾石像，睇返資料就話呢到係世界上唯一一個地方擺放咗呢七個完整嘅彷摩艾石像，都算係好珍貴同難得一見，但呢D石像對小朋友來講...堅係零興趣同有D得人驚囉...
可能係天氣太熱嘅關係，我哋又無當地車牌租唔到golf cart上山，行到上去呢個位堅係熱到全身濕晒，已經即時同燒腩仔行入冷氣房抖抖，亦難以控制佢嘅燥意，再加上BB豆豬不停走佬唔肯行埋D石像，呢張相堅係氹咗勁耐先氹到佢兩個埋位..影到米高都炆炆地...
為求快手影完走人，艾菲決定喺石像側邊影速戰速決，結果就太大意分錯左右，以為燒腩仔企呢個係代表學業up，後尾睇返先知呢個係財運up囉，kakaka...
一場來到點都影返張一家四口到此一遊，不過要避過周圍嘅遊人，只可以影clsoe up，影唔晒七個石像。
影完石像，我哋仲好堅咁喺無遮無掩嘅情況下，行咗上太陽之丘，其實燒腩仔點解肯行艾菲已經唔記得，只記得睇見D日本人坐golf cart上山勁羨慕，同艾菲揹住BB豆豬行上山，行到尾段真係覺得頭暈暈勁驚自己中暑囉﹗
放大張相畀大家睇吓我哋上咗幾高，堅係去旅行都行山勁健康囉（曲），不過呢到風景係靚嘅，成個日南海岸一覽無遺，如果有埋藍天白雲會更震撼，不過呢D地方真係來一次就夠，拍拖都OK多影相位幾浪漫，但艾菲唔會推介畀有小朋友嘅family。
上到山頂有間餐廳同有個蝴蝶博物館，我哋涼咗陣冷氣睇吓風景就落返山，沿路有唔少呢D石像喺到曬太陽，艾菲都唔忍心要埋去遮遮佢哋，嘻...
落山中途搵到個涼亭，可以影返頭先影唔到嘅石像，遠就遠咗D細粒咗D，但唔使曬小朋友先有返D笑容。
行完山當然要食返D好嘢補充吓體力，米高又係睇Yahoo Japan介紹搵到呢間餐廳，貪佢有宮崎最出名嘅南蠻雞食。
中午時份餐廳唔算多人，而且四周環境布置得好舒服，我哋被安排坐tatami位，等開飯時影返張男女子組相先，大家睇吓BB豆豬個樣幾不屑，佢心諗媽媽你影乜鬼，拿拿聲餵我食烏冬好過。
話咁快就有得食，燒腩仔當然係食兒童餐，有吉列豚肉芝士卷同薯條，仲有橙汁一大杯，睇到艾菲流晒口水，不過呢位練仙的小朋友又係食半份都無就話唔食...
左邊嘅係米高嘅正宗南蠻雞，艾菲唔好雞嘅就食吉列豬扒，無論係配菜定主菜都係咁好味，連BB豆豬都食咗唔少，讚呀﹗
食飽我哋又去餐廳對面街嘅西松屋行，借育嬰室幫BB豆豬換片，順便望吓呢日開始七折減價有無寶尋，好好彩地我哋又掃咗兩對碎花布鞋，兌返港紙都係三十蚊左右一對，抵抵抵呀﹗另外見佢D卡通蚊貼同蚊帶都齊款又掃咗堆，另外買多兩盒卡通膠布留返氹仔用。
最後不得不介紹嘅係BB豆豬手上個玩具電話，話說BB豆豬係個好鐘意講電話嘅女仔 ，平日見到艾菲同米高嘅電話即雙眼發光去搶，一拎上手就放耳邊扮講電話，然後有日行完西松屋等米高找數時，艾菲隨手拎咗個扮iphone玩具電話畀佢玩，佢係罕有地鐘意到唔肯畀返艾菲，但由於當時趕住走就無返轉頭買畀佢，事後艾菲係極後悔無買，尤其佢喺car seat坐到悶發脾氣時，所以發誓再見到一定要買返，點知搵咗好幾日都搵唔返，最後畀艾菲喺呢間西松屋搵到呢個摺機款，見佢都係爆like就唔理咁多照殺，然後一上車佢就狂㩒個電話，燒腩仔一搶即爆喊鬧哥哥，直至瞓著都仲係緊緊咁拎住唔放手。
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
九州東京之旅~Day4 佐賀>鳥棲 part1
九州東京之旅~Day4 佐賀>鳥棲 part2
九州東京之旅~Day5 福岡>鹿兒島 part1
九州東京之旅~Day5 福岡>鹿兒島 part2
九州東京之旅~Day6 鹿兒島 part1
九州東京之旅~Day6 鹿兒島 part2
九州東京之旅~Day7 鹿兒島>宮崎part1
九州東京之旅~Day7 鹿兒島>宮崎part2
沒有留言:
張貼留言