終於都忙完哥哥開學同升小一嘅嘢，宜家總算心中有數大概知條路點走，又可以回歸努力追blog﹗呢朝係星期日，米高知道呢邊有個呼子朝市想去睇吓，我哋就全家齊齊早起（其實都係七點幾八點，唔算好早姐...），喺樓下hea食個酒店早餐就出發啦﹗
呢日算係咁多日以來比較好天嘅一日，至少仲睇到藍天白雲（呢邊D空氣keep住麻麻，個天經常都有層煙霞咁），不過九洲嘅公路唔係山就係隧道，真係好令人懷念北海道嘅海闊天空，而且呢邊亦相對多車過北海道，度假feel即時大減。
坐咗唔係好耐車，我哋就到呼子港，泊好車就行去呼子朝市到睇，一入去見到呢個影相板，即叫燒腩仔同米高埋去扮魷魚。
呢個朝市係星期日朝先會開，全條街都係賣當地嘅海產同農產品，D公公婆婆喺街嘅兩邊擺檔，你啱就可以埋去幫襯，我哋先喺到行咗一轉，大概瑣定目標就行咗出去海邊睇吓。
海邊呢到有墨魚型嘅觀光船可以坐，另一邊亦泊晒D釣墨魚嘅船喺到。
曬墨魚陣同風乾魷魚風車亦係隨處可見。
行咗一陣見無咩特別，我哋就返入去呼子朝市搵食﹗第一round先來個即開海膽﹗放低400yen麻煩拎隻手出來，婆婆就會當住你面開隻海膽，再慢慢挑D海膽肉落你隻手到，你可以選擇一啖食晒，或者細細啖歎，食完婆婆會送你一張紙巾抹手，然後bye bye﹗
艾菲咁大個女，都未試過食即開即食海膽，又老實講向來對海膽都唔算特別大興趣，但今次只係試咗一啖咁大把，個鮮味到宜家呢一刻仲好記得，原來新鮮海膽係咁正㗎﹗而且個婆婆係超級好，如果佢開隻海膽唔靚，會立即開過第二隻俾你，等你唔好食到差嘢失望，呢D良心行為真係日本人先會咁做﹗
食完海膽見到有架賣墨魚漢堡包嘅van，睇落幾好味咁又排隊買返個來食，墨魚漢堡扒加埋個微酸嘅醬汁，都幾醒胃幾特別，絕對係值得一試﹗
食完漢堡包見隔離燒魷魚好香咁，忍唔住又買咗串汁燒魷魚來食，以為會好難咬，點知又唔係喎，仲要係好juicy，正呀﹗
至於燒腩仔啦...我哋食嘅嘢都唔太啱佢口味，再加埋呢朝大概35度嘅氣溫，堅係熱到佢人都癲，為免有人失控，廿四孝爸爸米高話買杯冰過佢冷靜吓，自己排隊仲要自己揀蜜瓜味，滿心期待嘅拎到手，竟然...黑黑地面咁同我哋講唔識食﹗怪只怪我哋從來無畀過佢食思樂冰﹗姨姨又將條飲管一早插咗喺冰入面，佢唔知飲管嘅另一邊係匙可以用來筆，我哋拎咗枝管出來後佢好似發現新大陸咁，先終於識笑咋﹗
我哋喺呼子朝市同個婆婆買埋魚乾仔畀BB豆豬（可以即食又可以撈落D飯仔到食），跟住就拎返車出去搵食，漫無目的咁喺公路到見到有間壽司郎就泊低架車入去食（自駕遊行到邊食到邊理應就係咁㗎嘛，嘻...），不過等位時有個成朝齋熱無份食嘅小妹妹呆咗，點氹都唔肯笑一個。
等咗十幾分鐘左右就有位，有個小朋友一坐低乜都唔理，自己拎咗碟蛋壽司食，艾菲就顧住餵BB豆豬，所以都無乜點理自己食咗咩，睇返相先發現自己食咗唔少好嘢，但實際味道只屬一般，當然100yen壽司店來講唔好太高要求就係啦。
又咁啱遇著鋪頭做緊《Cars3》嘅promote，凡小朋友去幫襯，食完會有一張車王貼紙派，貼紙角有個位可以抽奬，中咗會有Tomica新出嘅McQueen，小薑或黑旋風送，我哋當然無咁好彩抽得中，但燒腩仔就因為咁，之後問親食咩都話去食壽司勁煩囉﹗>.<
九州東京之旅~Day1 HK>福岡
九州東京之旅~Day2 福岡 part1
九州東京之旅~Day2 福岡 part2
九洲東京之旅~Day3 由布院>佐賀
沒有留言:
張貼留言