終於等到燒腩仔放完復活節假happy完，都係時候回歸清一清D blog，就快快手寫返三月最後一個星期六去花展嘅嘢先，話說呢日我哋同燒腩仔去完學校興趣班，又過咗海處理D私務，然後搞到三點幾無嘢好做，就決定入場去睇吓花湊吓熱鬧。
仲記得前年帶燒腩仔來，張張相都不情不願咁畀艾菲捉埋位影，宜家真係大個仔開始識嘢，居然主動叫艾菲同佢影相，雖然仲係叫好耐先望鏡頭，但至少會企定定畀你影，又識話見到人哋砌咗個心心同有個人喺入面，唔...係有認真觀察喎﹗
艾菲見人企喺花前影叫佢跟佢又肯整個人比花嬌樣畀艾菲影，再主動走去排隊指定要艾菲同佢影呢隻咖啡杯話好得意。
遇到至愛火車，仲有好like嘅摩天輪當然又要影影影。
見到D花靚同D布置靚，又主動企埋去叫艾菲同佢影。
難得遇到咁多花，艾菲呢個偽龍友當然又喪影吓，不過身上揹住嘅BB豆豬就唔太like，幾乎每次舉機佢都會喺到嘈嘈閉，尤其當艾菲千辛萬苦地逼到入鬱金香花海，佢竟然扭眼瞓爆喊狂掙扎，搞到艾菲只可以求其影幾張就閃人，影完都唔係好知自己影緊咩呢﹗
行到成五點幾六點，出面展區D花都睇得七七八八，我哋就行咗入去另一個展區睇D花藝擺設，順便睇吓有咩食，居然喺呢到畀我哋撞到朋友仔，小朋友一齊玩咗陣米高就買咗兩枝好那些年嘅樽裝維他奶佢哋飲，亦係咁唔覺意地成就咗呢日嘅picture of the day啦﹗嘻...
沒有留言:
張貼留言