2018年3月9日 星期五

20-21個月



恭喜發財﹗大吉大利﹗雖然新年都過咗好一段日子,不過話晒都係狗年第一次出來講進度,恭賀說話點都要講吓嘅,媽媽教落禮多人不怪嘛,唔...講起媽媽就連爸爸都問佢係唔係放棄寫blog,佢話唔係不過實在太忙啦,又新年又忽然停課又要忙私務,我又成日夜瞓搞到佢無晒私人時間,實在分唔到身返來清blog,不過佢會繼續努力㗎﹗



今次雙月記,都係由強項食開始講起,繼續一日三奶四固密密食,媽媽奶只係安撫作用已經可食可唔食,至於早餐下午茶就食餅乾麵包水果乳酪之類食物,午餐晚餐食一大碗有菜有肉嘅飯仔,食飽再搶住同大人一齊食佢哋D飯餸(個肚好似有黑洞咁唔識飽),全程自己食唔使人餵,亦開始識用水杯飲水(飲水會玩倒水,飲湯就一滴不漏),有見我食得咁叻叻,媽媽終於買咗張新Tripp Trapp畀我埋枱食飯,以後可以同哥哥平起平坐爭嘢食啦﹗



瞓依然係我弱項,成日貪玩唔願瞓兼越瞓越少,晏覺頂多瞓個半鐘媽媽就會叫醒我,否則夜晚飲完奶實唔願瞓,好多時明明拖到十一點先飲最後一餐奶,飲完仲勁精神喺大人床上搞搞震,玩到點幾兩點媽媽發火先肯瞓,亦由於已經識講嘢,出街會要求媽媽抱住瞓(艾菲:抱到手都軟),又會點名要媽媽R背脊陪瞓(艾菲:但成日R到手痺都未瞓呢)。



性格同脾氣相當明顯,trouble 2情況未至於失控,好有主見會主動同大人講想點,唔啱我心水時會一哭二鬧同趴地,已經有好幾次被夾去冷靜區企嘅經驗,咁冷靜完後我都受教, 模仿性好高成日留意住哥哥做乜跟住去做,哥哥睇書我又一齊睇仲自己拎枝筆扮點讀筆,哥哥四圍影相我又拎部相機對住媽媽講「笑吖」,哥哥拎本琴書彈玩具琴我又拎本圖書去扮睇譜彈琴,依然慢熱怕陌生人,但相對之前已經進步咗好多,喺媽媽同哥哥鼓勵下會叫樓下保安姨姨同哥哥嘅校車姨姨叔叔。



活動能力keep住A++以上級別,電力無限日日喺屋企四圍行同擒,跌親已經係家常便飯,呢頭喊完轉頭又擒,出街會扭落地自己行唔畀抱,去到玩具店會扭睇玩具唔願走猛話「未得呀」,不過知道爸爸媽媽真係走都會即時追返出去拖實,去到公園已經係自動波玩,不停喺樓梯同滑梯之間上上落落,完全唔使大人跟同扶(艾菲:當然仲要喺下面金睛火眼望實),仲大膽到學哥哥玩攀爬架,但爬咗一級就發現唔對路要落返地,韆鞦繼續玩親就喊咁口要落地。



小手肌發展良好,疊積木切煮飯仔食物開衣夾玩泥膠呢D完全零難度,拉拉鏈開密實袋都搞得掂,最近連水樽蓋都扭到,日日打開媽媽樽cream亂咁搽,激到佢彈吓彈吓,自理都算係幾好,返屋企會自己除外套除鞋除襪,一話出街都會自己去著鞋著襪仲拎埋畀哥哥著(艾菲:真係著到不過著得鬆D姐),可以自己除褲著褲著外套(艾菲:都係堅著到只係慢D同著得唔靚),會自己揹手袋,玩完玩具會幫手執(艾菲:呢個要篤住先做),換完片會幫手丟去垃圾桶,換出來D衫會放去洗衣籃,沖涼會幫手拎毛巾,唯一係potty仲未肯坐但已經講到想poo。



講嘢已經由單字進化到講全句句子,已經可以同哥哥傾到偈,唱到歌仲講得出全屋四個人嘅中文全名,最叻跟哥哥講埋D無聊嘢,會忽然話「我痾屎呀」同「我放屁呀呠」引大家笑,「大笨象」「小明」同「太陽伯伯」都識講識唱,數1-10無難度,掉轉數都仲得,仲認得兼講得出ORT入面D主角名(艾菲:連Mrs May都識講,而我哋係完全無教佢,只係平日陪哥哥睇得多),成日爆D爸爸媽媽無教過嘅字出來,例如開唔到門會同媽媽講「唔夠高呀」,夾親手會喊住行去媽媽到話「夾到呀,呢到痛呀」,整到媽媽叫痛會識話「對住媽媽」(艾菲:個唔字發音仲係差DD),心水好清知道自己去咗邊同之後要做乜,仲會講出來問返大人,「接哥哥放學,去婆婆到?」,「睇完電視食飯?」



同哥哥感情越來越好,最鐘意跟住哥哥尾去玩,當佢偶像咁佢做乜我就做乜(艾菲:最死係連D衰嘢都學埋), 都好肯聽哥哥指令會聽佢點,出街會拖實哥哥行(艾菲:尤其只得媽媽一拖二時,哥哥會好緊張咁拖實個妹,不過都試過顧住玩拖拖吓丟低咗個妹),有時見佢同媽媽嘈到好彊時,我會出聲叫佢「快D食飯啦」,一句KO呢個為啖氣乜都唔做但又趕時間返學嘅哥哥,見佢出門口慢吞吞又會拎鞋拎外套拎名牌畀佢帶,咁一屋兩個小朋友衝突就一定有,宜家我學精㗎啦,佢一話我或者搶我D玩具我就會大叫兇返佢,亦會趁媽媽望唔到郁手推佢,媽媽話佢盡量唔介入我哋嘅爭執,就算要話都一定係一齊話一齊罰,我哋不知罰企得幾開心。



最後媽媽話要講返呢個月最難忘嘅急症室記喎,話說呢排流感嚴重,有過上年一家四口輪住病燒咗成星期嘅經驗後,媽媽今年已經決心要我同哥哥打流感針,好不容易終於喺農曆新年前同我打埋最後一針(艾菲:好彩搶針前已經打咗第一針,醫生叔叔先逼住留第二針畀我哋),點知我就喺初一晚開始發燒,無任何病徵下燒咗成日仲要越燒越高,到初三凌晨燒到39.5,爸爸媽媽就即刻漏夜帶我去仁安睇急症,例牌見醫生同做流感測試,但最離奇係搞完一輪返到屋企即退燒,只係隔一日體溫又忽然偏高又未算燒,然後初五朝起身終於出到全身疹,證實係出玫瑰疹後媽媽先敢鬆一口氣呀﹗