話說燒腩仔未出世時，艾菲就買定張Aprica High Chair畀佢用，貪佢細時可以當床仔咁畀佢瞓廳，方便陪月姐姐照顧，到大個又可以用來食飯，培養佢坐定定食飯嘅好習慣，張high chair用咗兩年，除咗條安全帶拆唔到出來洗有D唔方便之外，其餘嘢艾菲都好滿意，不過隨住燒腩仔兩歲唔再食BB飯，可以同我哋一齊食大人餐，就開始覺得埋枱個位硬係唔多啱咁，推佢埋到枱都就唔啱個位食飯，而且每次都要將張high chair推來推去好麻煩，搞到燒腩仔兩歲前一直同我哋分枱食飯好無癮，於是艾菲就喺燒腩仔生日前鼓起勇氣，同米高講想買過張新high chair畀燒腩仔埋枱食飯，難得米高又無反對好支持喎，嘻嘻...
既然米高肯全力支持，艾菲當然都認真去研究啦，起初只係諗住cheap cheap地買呢張Ikea出品㗎咋，$400靚靚仔仔咁仲要係艾菲至愛嘅綠色，點知米高又嫌佢收唔埋同大個用唔返好浪費，咁艾菲唯有上偉大嘅淘寶搵啦，搵到同Stokke張Tripp Trapp差唔多款嘅價錢都唔係平，有平D摺得埋嘅米高又怕唔知穩唔穩陣，咁最後當然係唔淘啦﹗
其實慈父米高嫌三嫌四，皆因艾菲帶佢同燒腩仔去mother care睇過Stokke張Tripp Trapp，再加上佢嘅兄弟屋企都有一張兼大讚張凳好用，所以有人就一早心有所屬想買呢張，咁問心艾菲都好鐘意呢張high chair，但價錢真係好「實惠」囉，未計其他配件單買張凳已經要二千二百幾，艾菲又唔係好捨得，於是就決定上網再search。
跟住就畀艾菲搵到Tavolo有張類似嘅High Chair，$1480一張包埋個安全T，同樣有艾菲至愛青BB色，但呢張講明承重只係得60kg，我哋專登帶埋燒腩仔去睇實物，燒腩仔同試Stokke時一樣超級like，但一問之下發現綠色無貨，再加上米高好豪咁話買呢張不如買Sokke，咁艾菲唯有順佢意買Stokke啦﹗
因為mother care VIP買會有八折，米高就口痕問兄弟有無，點知兄弟知佢要買Stokke，即刻話識朋友做水貨，一張Tripp Trapp只賣$1500，就算想買埋安全帶之類一set配件都係加多三百幾蚊（因為燒腩仔已經大個唔使用），送貨都只係加多一百，即$1600唔使抬直接送到屋企﹗Good﹗
燒腩仔生日當天confirm order，Tripp Trapp第二朝就送到門口，本來想揀至愛青BB色，但無貨唯有轉natural色，等米高放工返來幫手睇實燒腩仔，艾菲就即刻開工砌凳（大家無睇錯，係艾菲等唔切叫極唔願郁嘅米高決定自己砌，咁其實艾菲都好鐘意做呢D簡單嘅木工嘢嘅），砌完之後燒腩仔已經急不及待要爬上去試坐，佢鐘意到就算唔係食飯時間，都會自己偷偷地爬上去坐，宜家埋枱食飯玩玩具同做功課都無難度，連書枱錢都可以暫時慳返，過幾年之後佢唔用艾菲仲可以將佢據為己有，搬佢入主人房變身成私家凳添（宜家放咗BB床間房係無凳用，艾菲要坐喺床用電腦），真係諗起都開心呀﹗kakaka...
沒有留言:
張貼留言