放電＠西貢

十一月係燒腩仔嘅interview月，由第一個星期六開始in到十二月初先完，不過艾菲其實無同燒腩仔操過，in完又唔會怪佢答得唔夠好之類，所以佢除咗要早起身之外，應該真係當玩無咩壓力，唯一可惜係密集式嘅interview搞到佢少咗去玩去放電嘅時間，所以每個星期日我哋都盡可能帶佢出吓去，而前一個星期日我哋就去咗西貢。



去西貢無咩特別原因，純粹艾菲話想帶燒腩仔去公園放電，米高又忽然好掛住D fish & chips就去，艾菲仲求其到相機無帶，連吹泡泡都唔醒起帶（屋企都唔知已經收埋咗幾多枝用到一半嘅泡泡），落車之後我哋先行海邊，順便喺D檔攤到買咗枝只賣$10嘅吹泡泡（出面D街鋪好似要十幾蚊枝），燒腩仔仲好搞笑咁當佢係士的篤住地下行，笑死艾菲...



由於燒腩仔已經大個仔，坐底褲韆鞦明顯有D逼同上落唔方便，所以我哋轉咗去海邊個公園玩正常韆鞦， 呢邊自然比底褲韆鞦嗰邊多人啦，好彩有枝泡泡可以同佢消磨吓時間，艾菲同燒腩仔喺側邊玩吹泡泡，慈父米高就去排隊等玩。

玩完韆鞦就玩其他嘢，轉轉轉玩意依然係佢鐘意嘅item之一，無論其他嘢幾吸引都係要埋去轉吓先安樂，但佢今次就畀咗兩個驚喜艾菲，先係左邊個配對game，之前一日interview前去公園玩先教佢狗係鐘意骨頭，估唔到佢第二日都仲記得會配得啱，而等玩軚盤時因為有個女仔玩到唔肯放手，艾菲唯有叫佢喺側邊排隊等候，以前從來唔肯排隊一定衝埋去搶住玩嘅佢，居然真係企定定喺側邊等，就算個女仔點扭都無畀佢影響到，叻叻﹗



不過佢越大個就越多古靈精怪嘢，千辛萬苦爬咗上去，但玩滑梯時居然係咁sir﹗見無人喺後面等就由佢啦，笑吓講兩句卡住落唔到來就算，之後都仲唔甘心再試多次咁sir， 發現真係落唔到來先心息。



最後當然唔少得吹泡泡環節啦﹗吹泡泡喺公園係好吸引嘅物體，只要你肯吹自然有小朋友撲埋來拍，燒腩仔雖然已經行動自如，但面對住D大佢成個頭嘅哥哥姐姐，基本上都無乜幾多個泡拍剩畀佢拍，難得佢又好enjoy可以同D哥哥姐姐一齊玩喎，仲突然好開心咁爆咗句「同其他小朋友一齊玩嘛」，艾菲實在好難想像呢句說話係出自自己個霸王仔把口囉﹗



離開公園之後帶咗佢去碼頭到睇船睇海鮮，不過星期日實在太多人加上佢開始有D不受控想甩我哋手，所以都係睇一陣就拉佢走啦﹗



搞咗大半日，終於等到米高最期待嘅fish & chips出場啦﹗今次燒腩仔終於有份食，但佢食咗兩啖魚就唔再食，只係狂掃粟米同薯條，有個慈父為咗氹個仔開心，仲特登買咗包Qoo仔畀燒腩仔飲添﹗



食飽再四圍逛吓就走啦，臨走前見到巴士站附近有個叔叔放咗D鼓出來畀小朋友玩，燒腩仔見到個姐姐跟叔叔打節奏表現得好好奇，於是艾菲就畀佢去同其他小朋友玩吓打鼓，唔...玩到似模似樣咁喎，等艾菲得閒都train吓你D節奏感先。

離開西貢之後我哋近近地去咗Popcorn行街，諗唔到食咩就去咗Food Republic開飯，星期日當然係要搭枱啦，同我哋同枱嘅有一個三歲女仔，燒腩仔一坐低就已經猛撩人哋哥哥（十幾歲大）玩，仲故意將架車仔推去人哋到要人哋推返畀佢，咁坐對面嘅女仔見到有車玩又示意想玩，艾菲就即管問吓燒腩仔肯唔肯借架車畀小朋友玩，估唔到佢即刻將架車推畀個女仔，仲講咗句「要分享玩具呀」，就算個女仔唔肯還返架車畀佢都無發嬲，艾菲真係覺得自己個仔喺不知不覺間大個仔咗好多，懂性咗好多，超勁感動呀﹗