本來艾菲一心一早起身，同燒腩仔做完功課就即刻出發（題外話，其實N班點解個個星期都有功課㗎呢???仲要絕大部分都係要艾菲做...），爭取做第一批小朋友入場玩，點知...拖拖拉拉咁終於都搞到三點幾四點先到西九海濱長廊，得返個幾鐘時間玩，仲要撞正燒腩仔開始眼瞓無電，原先佢去到都有D鬧情緒，見到人多同嘈就乜都發晦氣話唔玩，好彩又有上次喺寶康公園玩過嘅敲敲打打玩意，成功令佢回心轉意仲越打越high添﹗
見燒腩仔OK就諗住拉佢玩吓新嘢學砌水管，點知唔夠D大哥哥爭，呢頭拎到一條，轉頭畀人拎走咗另一條，都係敲返D油桶算啦﹗
玩完呢D上次都玩過嘅敲打玩意，我哋就向住另一邊遊戲區出發，不過現場真係多人到震，單係排隊入場都等咗成十五分鐘，好彩入到去好多遊戲都唔使再排隊，亦無想像中咁人逼人，第一時間拉燒腩仔去試個絲帶陣，艾菲估佢會唔鐘意㗎，點知佢出乎意料咁enjoy，仲玩到失晒控咁喺入面跑來跑去，之後叫佢試吓執D布條貼上膠紙同魔術貼到都OK，Good!
跟住一直向前行，見到呢D唔係好知點玩嘅木框，同等極都等唔到個傳聲筒嘅水管。
路過有個位係扮買嘢，燒腩仔起初怕怕醜醜咁，之後負責睇檔嘅義工姐姐專登拎個籃出來畀佢裝嘢，佢就即刻好開心咁投入角色，努力咁喺雜物堆到揀嘢買啦﹗
艾菲見到扮買嘢嘅隔離坐咗D義工姐姐喺到玩face painting，就拉咗燒腩仔過去睇想畀佢試，佢以前畀陌生人掂吓隻手都唔得㗎，所以艾菲都估唔到問佢想唔想好似小朋友咁畫靚靚時佢會點頭話想，然後好勇敢咁畀義工姐姐喺手臂到畫粒大星星，果然係返學之後大膽咗肯試新嘢呀﹗
晝完手再行吓行吓就到禾稈草大戰嘅現場，艾菲二話不說就拎起D禾稈草掟落燒腩仔到，再教佢掟返艾菲還擊，之後仲叫埋米高一齊加入戰團（呢個爸爸成日都冷眼旁觀咁，只係負責睇袋睇BB車，唔會主動同我哋一齊玩>.<），玩到佢勁肉緊勁開心呀，kakaka...
玩到成身都係禾稈草， 好彩佢無嫌D禾稈草吉肉。
呢張相雖然blur咗D，但艾菲真係超超超鐘意，燒腩仔呢個笑得咁開心嘅樣，返學之後真係少咗見呀﹗
玩玩吓畀呢堆海棉吸引住，走咗埋去玩疊高唔理我哋...
行吓行吓發現有得玩拉紙箱，艾菲不知幾想同燒腩仔一齊玩，千辛萬苦咁去撲個紙箱返來，點知燒腩仔打死都唔肯坐入去。
之後見時間差唔多，諗住快手帶佢玩埋其他勁嘢，不過水份突襲同大戰污糟貓呢兩個game實在太污糟，艾菲好奸咁帶咗佢去玩番挸泡就算，燒腩仔爆like呢個game，伸手落去搞完D泡再拍手將D泡彈走，中間仲差D玩到成個人跌咗落D番挸水到添呀﹗
玩到五點散場都賴死唔肯走，終於喺同佢換衫時開始發作勁扭，之後放佢上BB車好快已經瞓著，到夜晚食buffet時仲叫極都唔起肯起身添﹗
話晒呢日都係米高嘅生日，要佢陪燒腩仔玩咗大半日，點都要慰勞吓佢嘅，難得佢今年主動話想食buffet，艾菲即刻四圍搵吓有邊到抵&好食啦，後尾搵到呢間Cafe East好似幾好，匯豐信用卡仲做緊七折優惠，折咗都係四百幾蚊一個人，冷盤有米高至愛龍蝦同長腳蟹，無艾菲至愛生蠔但有另一至愛原粒帶子刺身，仲要熱盤同甜品都好OK，讚﹗
一早同燒腩仔講過今晚有好多蛋糕食，所以佢瞓醒第一句就話要食蛋糕，艾菲當然唔理即刻拎個菠菜麵同D熱食畀佢打個底先。
蛋糕怪食飽就開始勁掃甜品，一個人仔食咗差唔多三件蛋糕都話唔夠喉，後尾艾菲試froyo又搶住要食﹗佢似乎遺傳到甜品怪米高嘅風範，食甜品個肚幾時都仲有位﹗
為免佢食太多會滯，艾菲唯有帶佢出去問姐姐拎個碟來畫來分散吓注意力（畀小朋友畫碟係呢到特色來，畫得靚仲有得貼堂添㗎），之前畫親畫佢都講唔到自己畫緊咩，但呢次居然主動話畀艾菲知幅畫入面個係佢自己來，唔...又真係有D似係一個人來喎，叻叻﹗
沒有留言:
張貼留言