25個月

 

原來我上星期五已經25個月大啦，但無心肝嘅媽媽完全無咗件事咁，佢話日日都畀我搞到佢好忙好亂所以唔記得咗喎，咁都得？咁媽媽你會唔會有一日唔記得咗來湊我放學㗎？我會喊㗎喎﹗（艾菲：真係唔係講笑，你日日放學都咁扭計，我幾乎每日都有唔去湊放學嘅衝動囉:P）

呢個月嘅飲食狀況有好大嘅變化呀，都係一日食足四餐，不過媽媽就無再煮BB餐畀我，而係畀我埋枱同佢哋一齊食大人飯，雖然大人餐好好味，但我宜家越來越唔鐘意食正餐，餐餐都食到誓願咁，有時會食晒D餸唔食飯，仲會按心情來揀飲擇食（trouble 2不合作運動嘅一部分來，即除咗例必唔食嘅菜之外，就連南瓜，蘿蔔同水餃都會忽然話唔食，但明明之前一日都仲好鐘意食㗎喎），每次都搞到媽媽好勞氣，宜家直情要扣起D餸，要我食兩啖飯先畀一樣餸。

四隻犬齒終於有生出來嘅跡像，但咬嘢依然唔叻，D肉要咬好耐先咬得爛，繼續唔食軟糖會lur，但其他零食都可以食唔停口，至愛食水果同蛋糕雪糕，一見到佢哋就會發晒狂咁話要食，另一最叻食嘅係藥水，次次都食到嗒嗒聲，中藥都吞到但要有山渣餅送先得。



瞓覺都瞓得差咗，媽媽估係返學壓力大，所以又成日半夜瞓醒大叫，但飲咗七星茶同開始習慣返學之後又好似好咗D， 每晚十點半入房，瞓到第二朝九點半先起身，好多時都會七點幾就醒，但媽媽過來陪我一齊瞓都會瞓多陣，宜家只要媽媽話入房講故事（艾菲：一定唔可以話入房瞓覺，唔係佢實會話唔瞓同扭來扭去都唔入房），我就會聽話收玩具入房㗎啦，間中仲會畀媽媽講完故事就走然後自己瞓添（艾菲：終於還我自由﹗唔使再晚晚坐定定做陪瞓專員啦﹗），至於晏覺就一個月內調節咗好幾次，由於我唔係瞓醒晏覺大發脾氣唔起身，就係瞓三個鐘瞓到自然醒之後夜晚唔肯瞓，所以媽媽最終都係決定放學返來瞓一個鐘就要我起身食飯。



活動能力方面跳明顯叻咗，返學後終於學識做握拳頭揼揼嘅動作，大人問幾歲時又會試整V字手勢，試十次都簡中有一次半次整到㗎，最鐘意就係sir滑梯，喺學校出晒名有咩唔開心，sir兩吓就即刻開心返，亦終於唔使爸爸媽媽陪玩，去到公園會自己玩，等爸爸媽媽可以坐低休息吓，至於入字腳問題都好似有DD好轉，大個仔識得慢慢行（之前出親街都只係顧住跑唔肯慢行），只要專心望住前面行就好少會行行吓跌低。



返學後亦學識咗同其他小朋友相處，無大人睇住嘅情況吓都識得對表妹要溫柔，就算係專登蝦佢R佢腳板都係細細力咁R就算， 唔會主動搶小朋友嘅玩具，但畀人搶時都識拎實件玩具反抗示意NO，就算畀人搶走咗件玩具都只會扁扁咀唔會打人or喊，轉頭大人叫我同返小朋友一齊玩都OK無問題唔記仇。



就連自理能力都有進步，教一次就學識自己除褲同著褲，仲會主動幫手抹嘢，有晚就忽然拎住張濕紙巾跟媽媽尾入咗廁所抹來抹去（艾菲：成個《孤男寡女》入面個Kinki咁囉﹗kakaka...），至於一直停滯不前嘅potty training都終於有突破，喺學校老師嘅教導下我終於成功喺廁所wee到，而自從Ice姨姨轉贈咗個青蛙仔尿兜畀我之後，我連喺屋企wee wee都積極咗，宜家除咗瞓覺同出街之外，其餘時間都唔使著片，一日最多整濕三條底褲仔左右。



把口好似唔識收咁，由起身就講到瞓著先停，早晨，午安，hello，bye bye都識講好耐，但叫人都仲會扭扭擰擰同唔望人，返到學校會主動叫老師同校長，認叻認唔切咁同校長講「我今日無喊好叻呀」 ，對話已經全部係句子，表達自己諗法無難度，媽媽見我咁鐘意講嘢同記嘢咁叻，隔咗成個月無講《氹氹轉》都仲記得兼講得返出來，所以今個月就教咗我講《大笨象渣枝槍》，來緊佢話會開始教我講《三字經》喎，哈哈...有無人知係乜來㗎？宜家除咗1-10同A-Z之外，我仲識講幾個數目字嘅英文（我哋無特登教，只係佢玩玩具電話學），形狀同顏色嘅名都識得越來越多啦﹗



最後又到講情感發展啦，媽媽話我呢個月將touble 2呢樣嘢發揮得淋漓盡致，特別係返學之後，每日都有無窮無盡嘅嘢扭，最絕係一扭可以喊成粒幾兩粒鐘都唔收聲（艾菲：勁想扑暈佢囉），每日都喺屋企進行「不合作運動」同爸爸媽媽搞對抗，佢哋講親咩都話唔好唔做唔要，仲學識駁咀激到佢哋彈吓彈吓，有時畀爸爸媽媽訓話，除咗識應「唔答問題」之外，佢哋講嘢唔啱聽仲會話「唔要媽媽講」/「唔要爸爸講」（艾菲：真係諗起都覺得好頭痛﹗）。

至於安全意識就開始無咁高，去其他學校interview都仲會企定定話唔入課室，但媽媽氹多兩氹都OK肯跟住行，而且只要媽媽話講嘢個係老師，我就會肯答佢問題同佢傾偈（艾菲：呢個真係艾菲事前估唔到），仲會附送燦爛笑容畀老師添，搞到個個老師都話我好鐘意笑，仲順利咁呃到個K1 offer返來，不過媽媽話呢個PM位唔係佢嘅首選，所以來緊嘅interview大戰我仍然要繼續加油先得啦﹗