上年搞完生日會之後，艾菲誓神劈願咁話今年要訂一批有特色D嘅餐具同佈置㗎，點知...隨住燒腩仔越來越大，瞓晏覺嘅時間越來越少，連帶艾菲淘寶嘅時間都越來越少，結果拖到九月中先得閒淘，為免訂造期間出意外又唔夠時間改，最穩陣方法都係揀返現貨，唯一堅持係揀D相對少人用嘅款，最後揀咗呢個白底彩色星星嘅款，襯咩色布置都可以。
買完餐具再喺同一間鋪頭買埋生日蠟燭，紅色2字只係兩蚊人仔一個，黃色大D嘅2字都係5.5人仔一個，最抵係套車車蠟燭，成套只賣5.5人仔，香港就咁一個2字都至少要十幾蚊啦，之後貪得意再用7.5人仔買個Happy Birthday太陽眼鏡，諗住燒腩仔唔帶艾菲可以帶來玩嘛，呢到連埋上面嘅餐具同佈置嘅汽球都不過係100人仔咋﹗抵﹗
因為今年生日會有諗住做回禮曲奇，專登買咗D數字，字母同麵包超人模，買埋包裝袋仔同cup cake紙架方便擺出來，另外貪得意買咗四個雪糕杯，順手買埋pizza刀同電子溫度計，咁多嘢加埋都係110人仔左右。
一直都想喺燒腩仔生日前買個生日蛋糕畀佢玩吹蠟燭同切蛋糕，有考慮過買mother garden㗎，但單買一個細size蛋糕都六十幾蚊人仔，後來見到呢個膠蛋糕都幾似樣同多配件，重點係連運費都係13.8人仔咋﹗雖然實物質素確係好一般，放水果D位有時會卡唔實好易甩，不過燒腩仔都玩得好開心，日日拎住蛋糕唱happy birthday，真係...呢個價錢仲想點吖...只係呢間鋪艾菲十萬個唔推介，因為佢默認物流居然係出名差嘅百世匯通，運貨期間睇住物流訊息話佢到咗廣州，但等極都未到集運公司，最終喺艾菲一追再追之下佢哋先話百世匯通爆咗倉，轉咗畀中國郵政派，最後足足等咗成個星期，件貨先由廣州送到廣州嘅集運公司﹗搞到艾菲成批淘寶差D趕唔切喺燒腩仔生日會前到香港﹗
燒腩仔一直都好鐘意聽《一閃一閃小星星》，仲好早已經認得星形，記得之前睇《愛我請留言》入面都有呢個投影燈出現過，艾菲估燒腩仔應該會好鐘意，見香港嘅團購網賣七十幾蚊，於是就上淘寶搵，超亮版可以用普通電芯都係32.9人仔一個，每晚陪燒腩仔入房瞓時就拎出來睇同唱《一閃一閃小星星》 ，夜晚佢瞓咗艾菲入佢房又可以當夜燈，開一開望吓佢OK就走，唔使怕開大燈會整醒佢，Good﹗
除咗買嘢畀燒腩仔，艾菲今次都心血來潮買咗D碗碗碟碟畀自己個廚房，事關我哋入伙時燒腩仔嫲嫲畀咗好多珍藏碗碟我哋，咁艾菲都好乖咁用咗幾年，到呢年幾正式回歸廚房就一直心思思，想買過D自己style嘅碗碟返來，不過諗起要抬返屋企就怕怕，無意中喺淘寶搵到呢D碗碟，除返開大概十蚊人仔一隻左右，唔使抬有人送到屋企門口梗係即買啦﹗
今次淘寶，艾菲仲幫燒腩仔姨媽買咗個hip seat，都要238人仔一個㗎，不過姨媽話係朋友推介，佢自己用完都話OK，咁艾菲就覺得hip seat呢D嘢，其實咩牌子正版定老翻都係咁嘅效果，都係用完會攰同覺得頂住個肚唔舒服，所以自己都係鐘意用揹帶多D囉。
一次過淘咗咁多嘢，艾菲梗係用集運送返香港啦，但之前用開間集運轉咗公司名又無咗自家配送，加咗價兼舊客戶都要重新登記，於是決定搵過另一間集運，然後喺Baby Kingdom見到有人介紹一間新集運有自家配送送住宅唔加錢，仲大讚佢有交帶跟得好足，咁艾菲就決定試吓新嘢啦，點知...畀錢後無耐，米高就同艾菲講報紙話大陸關扣淘寶集運貨嘅新聞，再來就係集運突然通知因成本關係取消自家配送，所有貨都要地鐵站交收﹗﹗﹗
聽到呢個壞消息艾菲即刻灰咗﹗一心諗住有得送到屋企門口，先淘成堆碗碗碟碟返來，結果竟然係要自己上地鐵站拎...雖然集運嗰邊都好好，話真係拎唔到可以幫手送到屋企樓下，但最後因為個玩具蛋糕拖咗好耐，同其中一箱碗碟嘅packing有問題，再加上艾菲confirm order前一日遇上海關查車後成車退返轉頭嘅case，艾菲已經煩咗集運嗰邊好多次，最後為咗D貨儘快到手都廢事再煩集運幫手送貨，膽粗粗一個人帶住燒腩仔上地鐵站收貨，見到箱貨真係眼都凸（其實D嘢唔重，但唔知點解pack到咁大舊），仲要應承咗收完貨帶燒腩仔去附近屋邨個公園玩，結果艾菲就要抬住呢箱貨兜咗個大圈先可以返屋企，好彩燒腩仔都好乖肯拉實艾菲衫尾行，唔係艾菲真係唔知點算好啦﹗
後記：收晒貨之後嘅兩星期，艾菲就收到呢間集運公司whatsapp話佢哋決定執笠唔做，睇來宜家D集運都真係好難做，又大家有無用開嘅集運公司係好&價錢合理推介呢？宜家艾菲淘寶都要送屋企（米高公司唔方便收貨），明明住工商區附近但焗畀$20-30住宅費真係好唔抵囉﹗
沒有留言:
張貼留言