Day 6 15/10/2014
同之前一日一樣，去到學校門口就變臉爆喊攬實艾菲唔肯入學校，但艾菲都係好狠咁講低句我會準時來接放學就將佢交畀老師，然後老師放學時話佢入咗課室無耐已經收聲無事，咁見到自己個仔喊成咁又點會唔心酸吖，於是放學時就專登帶咗盒維他奶仔去打吓氣，點知...燒腩仔一見到就堅持要艾菲即刻開畀佢飲，仲要飲完之後話畀艾菲知佢唔返屋企，同佢去圖書閣借埋書都唔肯換鞋離開學校，要學校D嬸嬸埋來幫手氹佢先肯換鞋走，沿路行返屋企都行到有氣無力咁，唉...麻煩友現形啦﹗
不過呢日都有樣嘢開心嘅，就係嬸嬸埋來氹佢換鞋時，都不忙話畀艾菲知燒腩仔好醒目，每日食茶點時都有主動舉手要求添食，仲話佢係全班唯一一個會要求添食嘅學生，艾菲聽到呢番說話真係忍唔住笑出來，然後解釋畀嬸嬸知佢之前返playgroup慣咗食完茶點可以舉手添食，所以佢呢個為食貓有得食實無執輸。
Day 7 16/10/2014
呢日米高請咗假，前一日燒腩仔已經話想爸爸陪佢返學，點知米高病咗要休息，唯有艾菲自己湊返學，而佢去到學校前半條街已經開始喊定先，意圖及企圖唔肯行，不過艾菲唔理堅持要佢繼續向前行，再將佢交畀老師就走。
放學時因為艾菲有事要做，接完燒腩仔就要即刻出去處理，咁米高就同艾菲一齊接放學，以為燒腩仔見到爸爸會好開心，點知佢勁心急老師未叫就想自己衝出課室，畀老師叫停就即喊，老師話佢返學時入課室無耐已經收聲，但到放學時間就又有D情緒，艾菲唯有解釋燒腩仔知放學嘅流程，等佢明白要等老師叫先可以走。
之後換鞋離開學校尚算順利，不過行咗陣燒腩仔已經扭米高抱，無論艾菲點氹佢都唔肯妥協，最終米高敵唔過燒腩仔抱咗，但當佢知道艾菲準備走時，就即刻撲過來要攬實艾菲，可惜講極佢都唔肯畀艾菲走，最後畀佢送到地鐵站，然後米高就話自己好似拐子佬捉咗人哋個仔咁，抱住個爆喊勁掙扎嘅燒腩仔返屋企囉﹗kakaka...
Day 8 17/10/2014
為咗有多D時間安撫佢情緒先入學校，艾菲決定早十分鐘同佢出門口返學等佢輕鬆D，由著校服到出門口佢D情緒都OK，沿路仲同艾菲有講有笑添，但開始到學校附近佢就變咗靜音mode，十問九唔應仲越行越慢，去到學校前半條街就唔肯行，本來想行埋一邊join其他早到而未入得學校嘅同學仔，不過燒腩仔死都唔畀艾菲過去，甚至同學仔主動埋來想拖佢都唔得，艾菲唯有指住學校門口嘅相，逐張睇逐張講咁呃佢向前行，但去到學校門口都係爆喊收場。
到放學接佢，佢終於肯坐定定玩住玩具等艾菲，老師話佢入學校門口無耐已經收聲，見燒腩仔換咗後備衫就順口問吓咩事，以為係爆片搞到校服污糟咗，點知老師話佢係vee vee時唔記得拎起件衫，聽到呢句艾菲真係十萬個問號，乜燒腩仔識自己vee vee咩？艾菲同佢喺屋企試咗成個夏天，都從來無成功vee過一次喎﹗艾菲追問落去老師先話喺佢堅持要燒腩仔試vee嘅情況下，原來燒腩仔第一日返學已經成功vee到，學校每日三次排洗時間，都總有一次係成功﹗wow...聽到呢個消息，艾菲真係勁興奮呀﹗果然返N班對小朋友戒片係有幫助㗎﹗
正當艾菲懷著滿心歡喜，邊行邊讚燒腩仔自己vee vee好叻仔之際，燒腩仔就忽然喺上返放學必經嘅天橋前放軟手腳唔肯行，之前已經同佢講過好多次著咗校服唔會抱嘅艾菲當然堅持唔抱，亦喺心入面怨緊米高之前一日抱佢做壞規矩，結果兩母子拖拖拉拉上到天橋，燒腩仔繼續堅持唔肯上樓梯，艾菲都堅持唔肯抱佢， 好彩喺艾菲都唔知點算嘅時候，返學時想拖燒腩仔嘅同學仔同媽咪就路過，同學仔主動埋來拖燒腩仔上樓梯，燒腩仔起初有D唔願意但都肯畀人拖，然後兩個好開心咁拖住上樓梯再追追逐逐咁，燒腩仔嘅情緒先終於回復正常肯自己行。
Day 9 20/10/2014
又一個要返學嘅星期一，觀乎佢上星期嘅情緒，艾菲都估佢無咁快OK，果然畀Ice媽媽講中，終於輪到唔肯換學習褲同著校服﹗
根據之前一星期嘅觀察，返學之後嘅燒腩仔成日叫住唔換片，仲會好激動咁拉住條褲唔畀我哋除，就算老師話佢喺學校三次有一次vee到，我哋喺屋企叫佢去vee依然係零收獲，艾菲直覺覺得佢係因為vee vee呢件事覺得有壓力，即佢個心其實唔想vee，但返到學校老師叫又唔敢唔vee，所以個人有D不安咁啦，不過佢既然喺老師嘅管教下vee到，艾菲又無理由叫老師唔好同佢train㗎嘛，唯有喺佢拒絕換校服時嘗試輔導吓佢，終於講咗一輪道理都叫做好D，肯乖乖著校服出門口返學，但去到學校門口當然又係爆喊啦﹗
送咗燒腩仔返學之後打畀燒腩仔婆婆傾，佢第一句就同艾菲講好心痛，話從來未見過燒腩仔咁心神恍忽同失魂落魄嘅樣（燒腩仔上星期五放學返婆婆到係扭到癲咗，同佢沖涼係勁掙扎唔肯畀我哋同佢除衫除褲，又唔畀艾菲抱表妹），估佢係壓力大夜晚瞓唔好（自從返學之後又再成日半夜喊醒），所以日頭D脾氣特別煩燥失控，建議我哋同佢睇中醫調理，但艾菲深知米高唔會支持，亦怕燒腩仔好似睇西醫咁扭兼未必肯食中藥，所以未去到最後都唔想出呢招住。
之後趕頭趕命買餸返屋企煲湯，諗住等燒腩仔飲多D湯水潤吓個人無咁燥，然後夠鐘就去接佢放學，呢日艾菲決定試吓行第二條路上天橋（其實仲多樓梯），燒腩仔又好似好受落咁喎，總算順利返到屋企（不過實情係佢返到屋企又發作，為咗D小事喊咗成粒幾鐘都唔收聲，疲勞轟炸到艾菲勁想扑暈佢囉﹗）。
Day 10 21/10/2014
呢日係燒腩仔返學咁多日以來艾菲最痛苦嘅一日，夜晚瞓得唔好又晨早就醒咗，要艾菲逼先肯瞓多陣，然後瞓醒又送一條屎底褲畀艾菲歎（明明識話去廁所poo好耐，出意外率向來都唔高，完全無諗過呢朝試著戒片褲佢就咁益我），再食飯食到家嘈屋閉，到換校服時終於大爆發，好似上身咁喺playmat到狂典，無論艾菲點氹都唔肯就範，眼見時間無多唯有打畀米高商量，喺佢同意下決定武力對待，點都要捉佢返學唔可以畀佢奸計得呈﹗
艾菲夾硬同佢換片換衫，但佢雖然人仔細細，D蠻力一D都唔弱，用盡全力拉實D衫褲唔畀艾菲除，到成功剝咗佢光豬要著返套校服，又出盡力咁踢同扯走D衫褲，真係千辛萬苦先成功著晒成套校服連鞋襪上身，之後仲要好似拖屍咁拖佢出platmay再抱上身，全程抱實佢跑返學校，好彩佢出咗屋企門口都終於肯收聲，期間艾菲只係好堅定咁同佢講咗句「無論發生乜事你都一定要返學」，直至返到學校門口就話畀老師知佢發緊脾氣，老師都好理解即時過來接手抱佢入學校。
送咗燒腩仔入學校之後艾菲即時打畀燒腩仔婆婆呻，婆婆當然重提睇中醫調理呢個建議，勸艾菲就算唔睇中醫，至少都要畀D涼茶之類嘅嘢佢飲幫佢清吓熱毒，於是艾菲決定唔理米高反對（我明米高唔想個仔亂食中藥，但燒腩仔煩燥不安極不合作，最受罪個係艾菲唔係佢呀﹗），衝咗入萬寧買咗盒余仁生七星茶鎮宅﹗
因為返學前上身唔著校服呢件事，同埋之前無數次無厘頭亂發脾氣喪喊唔收聲，真係搞到艾菲勁唔想去接放學，但無辦法之下都係要硬住頭皮去學校，去到仲要若無其事扮失憶唔再喺燒腩仔面前提起，好彩老師話佢入課室無耐已經無事，同佢去借書時仲識主動叫校長同校長傾偈，真係人前人後兩個樣到呢...
之後同佢行返尋日條路返屋企，佢上到天橋又喺到扭抱唔上第二條樓梯，艾菲同佢彊持咗一段時間之後，諗住打畀米高以第三者身份勸吓佢，點知佢一句「唔要爸爸講」就推開個電話，但最神奇係收線之後無耐又忽然肯行喎﹗
N班開學回顧：
Week 1
沒有留言:
張貼留言