1/11/2014
由於燒腩仔間學校一直都話無得直升（實情係唔夠位直升），就算直升都一定要轉全日，兼夾艾菲覺得呢間學校好一般，所以今年報K1艾菲要特別認真...根據上一年報N嘅情況，細B報四間得三間有得interview，最終兩間waiting一間PM offer，再加上燒腩仔九月去學校交報名表時間間學校都唔肯入，老師職員撩佢講嘢又十問九唔應，艾菲對佢真係無乜信心，最終好怪獸咁同佢報咗13間學校（一講個總數出來即刻畀米高話囉...），有自己區內嘅學校亦有相對就腳嘅九龍城區學校，絕大部分都係半日班，只有兩間係全日，全部都係有學券同happy school，唔特別催谷燒腩仔係艾菲同米高嘅原則，要做讀書機器真係唔怕將來無機會，何苦咁細個就逼佢令佢失去快樂童年呢...
第一回合：觀塘循道幼稚園 9:30
上年搵幼稚園資料時，呢間學校已經on list係艾菲要報嘅學校之一，因為佢同米高母校藍田循道衛理小學有聯繫，雖然無得直升但大抽奬出意外的話，校長嘅推薦信相信都會有用，而且之前去佢哋open day參觀過，學校環境唔錯燒腩仔都like，交表時亦覺得D老師同staff好有愛心，重點係屋企樓下有小巴直達，唔使十分鐘已經到學校門口，仲快過行去燒腩仔宜家讀緊間學校﹗
呢日一早叫醒燒腩仔食早餐換衫，但大少明顯有D鬧情緒死都唔肯著新買嘅裇衫，好彩艾菲熨定件舊裇衫做後備，換好衫就帶佢坐小巴出發，去到學校門口要排一陣隊先入得，見佢排隊期間都有D失控，入到學校門口仲開始扭唔肯入去，要艾菲出盡法寶先氹到佢行入去，見佢咁嘅狀況艾菲都估係兇多吉少㗎啦﹗
點知佢入到學校見到學校D靚靚嘅擺設即刻好興奮，之後仲好乖咁跟其餘五個family一齊排隊入課室，入到課室係六個小朋友平排坐，小朋友坐前面父母坐後面，一個老師負責in兩個小朋友，每個小朋友面前都有一份玩具，燒腩仔份係佢好鐘意嘅積木，老師先問另一個小朋友問題，但小朋友唔多識答，搞到燒腩仔等咗好耐，起初艾菲都驚佢等得耐會出事，好彩佢又OK喎，仲玩玩吓識得回頭望吓我哋笑。
等咗陣終於到佢，老師先問佢叫咩名，邊個同佢來，燒腩仔居然好開心咁有開金口答，之後叫佢砌積木都有照做，再拎三張實物相出來問佢咩來，其中一張係巴士，隔離個小朋友只係答到車，但燒腩仔就答到巴士，於是老師問佢頭先有無坐巴士來，燒腩仔竟然識同老師講「坐小巴巴來」，呢個答案艾菲係完全估佢唔到，之後老師要燒腩仔砌圖卡，輕易砌到但其中一個係警察燒腩仔唔識答（皆因艾菲無教過佢乜嘢係警察啦），另一個係媽媽佢就答咗女孩子，媽媽又的確係女人喎。
考完小朋友就輪到group in家長啦，主考老師問咗幾條問題要家長搶答，其實艾菲好怕呢D場面，但為咗個仔都要硬住頭皮發表吓偉論，最激氣係坐隔離個米高真係可以唔出聲推艾菲去答囉﹗>.<
答完問題拎埋禮物我哋就走得，燒腩仔有同老師講謝謝同bye bye，表現算係好好好好驚喜，所以離開學校時艾菲都幾有信心，果然不出所料真係有offer，雖然只係PM位，但都叫做有粒定心丸，就算之後interview衰晒都唔怕無書讀先啦﹗
第二回合：德福幼稚園 11:30
上年已經考過佢哋嘅PN位，其實都唔預會成功，再加上感覺佢哋好商業，完全唔係艾菲杯茶，但話晒都係最近屋企嘅一間，學校地方又叫做大，都即管試吓有無機會啦﹗
由於呢日有另一間學校有簡介會，同interview時間撞咗期，所以離開循道後我哋就同米高bye bye，米高去簡介會艾菲就同燒腩仔去interview，去到德福見時間尚早就諗住帶佢去附近公園玩吓輕鬆吓，點知玩咗唔夠五分鐘就發現燒腩仔塊面D紅點開始現返出來，拿拿聲諗辦法想帶佢返入商場涼冷氣，點知燒腩仔點都唔肯就範，拖拖拉拉都搞咗成三個字先走到，見佢開始有D無電失控嘅情況，為免夜長夢多就決定提早帶佢去學校等。
去到學校要先入一間waiting room坐，燒腩仔又係唔肯入去，艾菲已經唔記得點氹佢入去，入到房就搵個角落位畀佢坐（唔想佢見到其他小朋友失控又跟住扭），學校無提供玩具玩要出動私伙車仔，後來有個差唔多大嘅男仔坐埋來，兩個互換咗架車仔玩咗陣，燒腩仔仲因為咁而學識咗咩叫跑車，總算消磨咗等候嘅時間。
夠鐘老師就叫大家排隊入課室interview，課室入面有兩組枱放住幾份玩具，叫小朋友自己揀位坐，燒腩仔原先想揀螺絲模個位來坐，但艾菲見到螺絲模就即刻拉佢走（佢扭嘢未係好叻），之後佢揀咗個類似砌釘板嘅玩具來玩，坐定之後老師就埋來同佢傾偈，問佢咩名同幾多歲都有答，仲送咗個燦爛笑容畀老師，氹到老師都要講句「你好鐘意笑喎」，之後問佢件玩具咩色都答到，但叫佢拎黃色嘅形狀出來，佢唔知點解拎咗紅色，不過再叫佢拎第二個又啱喎。
問咗幾句之後老師就問佢鐘唔鐘意玩煮飯仔，叫艾菲同燒腩仔出去玩煮飯仔，而同一時間隔離位個小朋友都係咁樣畀老師叫咗出去玩煮飯仔，然後負責見我哋嘅老師就去咗考另一個遲到嘅小朋友，出去玩煮飯仔時隔離位個老師都有問燒腩仔問題，但好多時燒腩仔未講個答案出來佢已經行開咗無聽到，後來再多兩個小朋友同家長出來，場面就更加混亂，所以艾菲絕對有理由相信佢哋根本無心收，純粹做樣咁見吓大家。
離開時老師差D連餅都派漏畀燒腩仔，艾菲唯有同燒腩仔企門口位到等老師埋來，叫燒腩仔講謝謝同bye bye先走，佢離開課室時都仲肯同走廊嘅老師打招呼㗎，但一出學校門口就即時發作喪扭，最終入到商場仲摞地堅持唔肯跟艾菲走，就算艾菲帶佢買蛋撻話係奬勵佢，佢都係堅持發難大叫「唔返屋企」， 好彩呢日只係得兩個interview，否則真係可以慳返唔使去見﹗
沒有留言:
張貼留言