8/11/2014
第三回合：觀塘浸信會幼稚園 11:30
呢間學校係上年同燒腩仔上游水班時同學仔媽咪推介，話佢學校好大設備齊，用咗學券之後唔使交學費好抵，之後艾菲上baby kingdom睇吓comment，發現佢原來係區內「名幼」，咁今年嘅open day就專登帶燒腩仔去玩順便拎表，點知...人多樣樣嘢都要排隊等好耐係艾菲意料中事，但玩遊戲期間忽然傳教（艾菲唔係唔鐘意佢嘅教會背景，只係覺得唔需要呢D時候咁aggressive地呃人入班房傳教，小朋友入咗來讀有三年時間你想點傳都得啦），加上老師處理燒腩仔唔敢玩遊戲嘅手法，都令艾菲對呢間學校扣咗唔少分，而佢K3只得下午班呢個安排亦令艾菲卻步，不過既然都交咗表又無撞時間就即管來玩吓啦﹗
呢日只係得一場interview，仲要係11:30，兼夾唔係艾菲心水學校，所以真係零壓力，燒腩仔起身食完早餐就換衫出發，坐小巴20分鐘內都到算係方便，不過燒腩仔去到學校門口又話唔入，後尾艾菲將封面試信交畀佢，叫佢幫手拎入去畀老師，佢又OK肯自己行入去喎，之後我哋獲分配到一個籌號，老師叫我哋喺側邊嘅玩具區玩住等。
入到玩具區，絕對可以用人山人海來形容，來面試嘅真係咩人都有，有D講普通話，有D牛高馬大個樣睇落唔止3歲，入面分區放咗唔同種類嘅玩具，燒腩仔梗係去車區啦，但明顯D車係唔夠分，要鬥快拎先會有得玩，否則就只係可以企喺到望人哋玩（唔記得講呢到係無凳坐只可以企㗎），老師每隔一段時間就會出來打招呼同叫number，不過現場實在太嘈都唔係好聽到，總之等咗十五分鐘左右終於到我哋。
interview只可以由一個家長陪，咁呢D重任梗係艾菲負毒啦，入到去係兩個老師對四個小朋友，一個老師負責問，一個老師做觀察評分，首先老師就拎住個麵包超人手偶同燒腩仔打招呼問咩名，出動到至愛麵包超人喎，燒腩仔點會無反應吖，但就有D怕醜扭擰答到蚊滋咁嘅聲，要老師再問佢就笑住再答一次，但聲量係無提高到㗎，老師唯有讚佢「你笑得好開心喎」，kakaka...
等四個小朋友都坐定，老師就開始拎唔同物件出來問咩來，基本上除咗細聲同答得慢之外，燒腩仔都全部答到，唯獨係一個變咗啡色嘅假橙，燒腩仔真係答唔出（講真，個橙變咗色燒腩仔答唔到都好正常，但對面兩個女仔竟然答到就即刻顯得佢好唔醒啦），跟住老師就每人畀咗套杯碟同玩具餅乾出來考佢哋聽指令，燒腩仔上幼潛時經過多次茶點訓練，所以艾菲好有信心佢會做到，最後就輪到玩情景遊戲問問題，燒腩仔慢半拍咁都有答到，但艾菲真係好頂其中一個媽媽唔住，全程喺後面用英文大聲提水，佢個女就講返中文出來，真係好disturb。
之後拎埋小禮物就同老師講bye bye，基本上燒腩仔表現算唔差，但明顯無第一個星期咁好，所以艾菲都無咩期望，不過今次interview都令艾菲發現燒腩仔係適合個人interview多過group interview，因為一有其他小朋友在場，佢好容易就會畀人影響咗分心，顧住望人哋做咩而唔記得畀反應老師>.<...離開學校之後我哋就直接坐小巴返屋企附近食飯，食飽仲專登買咗件蛋糕來奬勵佢順便幫佢打吓氣，因為下星期將會一日內見四間勁辛苦呀﹗
沒有留言:
張貼留言