秋遊山頂

雖然燒腩仔返學之後嘅情緒好難搞，不過平日要返學已經少咗帶佢出去玩，所以難得weekend米高一齊放假，艾菲梗係要爭取機會一家人四圍去，而上個月中嘅某個星期日，我哋就襯呢排佔中少咗自由行，帶咗燒腩仔去山頂玩。



其實燒腩仔喺艾菲肚入面時已經來過山頂一次，不過因為山頂之前畀自由人攻陷咗，所以我哋一直唔敢帶佢來，難得新聞話宜家少咗大陸團來香港，我哋就算明知星期日實多人都無畏無懼咁衝上來，果然係比上次來靜同好行好多，Good！



落車同燒腩仔喺山頂廣場出面影吓相之後，我哋就出發圍山頂行一圈，原先呢個小朋友未瞓晏覺，就快無電唔多願行㗎，不過我哋畀吓麵包同橙汁引佢都肯行一大半路，呢日天氣真係好好，望返落維港兩岸靚到呢...



見佢咁乖肯自己行咗咁耐，行完一圈後艾菲當然要奬勵吓佢啦，見大家都行到出晒汗，最好就係食返杯雪糕爽吓，不過Haagen Dazs坐滿人無位，最後去咗商場入面7-11涼住冷氣食甜筒，枝甜筒一落入燒腩仔手就無得拎返走，有人仲食到生鬍鬚添呀，kakaka...



之後好隨意咁喺商場逛咗個圈就走啦，燒腩仔見到呢架電車擺設就衝埋去話要艾菲影相，難得平日成日話「唔影」嘅燒腩仔主動話影相，艾菲當然樂意奉陪啦，不過呢位小model pose擺足，就係唔肯望鏡頭囉，激死﹗



難得過咗海，我哋就襯燒腩仔瞓著咗，走咗去灣仔玩具街入定貨啦，先補給返兩架畀燒腩仔玩爛咗嘅的士同小巴先，跟住再掃多三架Tomica車仔做存貨，$30一架仲平過日本Tomica專賣店呀﹗



之後食飽飯再好順路咁行咗去金鐘，其實由九月尾發生佔中開始，已經想帶燒腩仔來走一轉，無論係支持定反對，艾菲覺得都應該來望一望感受吓氣氛，到底呢班學生係唔係受人唆擺或者收咗錢出來搞事？又係唔係某D人口中嘅暴民呢？作為一個家長，艾菲覺得自己係有責任將真相話畀下一代知。