Day 16 29/10/2014
呢日keep住都係扭計mode，由朝早起身就事事不滿咩都扭一餐，仲要唔停手咁周身R（呢個係由細到大嘅壞習慣來，一眼瞓同個人忟就會周圍R），結果繼手跤位，頸，小腿同心口都紅同損晒後，連額頭同眼嘅四周都開始出D一粒粒嘅紅點，搞到返學時畀老師問係唔係出疹，艾菲只好同老師解釋紅點點來，只要佢心情平伏落來就會退，唔會惹到其他小朋友。
之後去接放學，吸收咗之前嘅經驗，同米高商量過後，決定唔再帶任何嘢食畀佢，廢事畀佢剩機扭計，只係同佢講快D返屋企有咩好嘢食，但佢似乎都唔係好受，依舊去到天橋中間就唔行扭抱，同佢彊持咗成十五分鐘，無論艾菲點氹佢都唔肯行仲開始喊唔停，直至有輪椅坐專用電梯落來，佢聽到D alarm聲先忽然清醒，終於肯跟艾菲行埋最後一層樓梯，不過之後都係邊行邊喊住咁大叫自己嘅訴求，一時話自己要食麵包，一時話要媽媽攬，一時就話自己要瞓覺，最絕係返到屋企連艾菲換件衫，都會畀佢話「唔要媽媽換衫」，唉...
Day 17 30/10/2014
又係一早起身已經喪扭唔停，誇張到艾菲不過話幫佢抹咗D鼻水（D鼻水由Week 3開始起，到宜家都仲未停過），都發晒脾氣咁嘈成半個鐘先肯收聲，再加上額頭D紅點持續唔散（佢keep住忟其實都好難退），艾菲已經決定等燒腩仔星期五放學後帶佢去去婆婆屋企附近睇中醫。
繼續返到學校門口就話「我唔返學」，不情不願咁嘅樣入學校但無喊，到接放學時艾菲忽然心血來潮袋定架玩具的士喺袋， 到佢去到天橋底開始想扭唔行時，艾菲就拎出來叫佢帶的士上天橋，估唔到呢招都幾work喎，拎住的士乖乖上晒全部樓梯，之後仲有時間奬佢去超市坐一陣車仔添﹗
Day 18 31/10/2014
之前一日瞓醒晏覺後燒腩仔隻眼忽然腫咗，本來都有諗過要唔要同佢去睇急症，但觀察咗幾個鐘之後見D腫已經開始退，估佢應該係轉天氣敏感，再加上瞓覺時發夢喊過，同起身前狂捽眼所至，所以決定呢日請病假提早返去婆婆到睇中醫，不過呢日星期五派功課，我哋出發前要先返學校拎功課袋，明明去到學校附近都仲叫住「我唔返學」㗎，不過艾菲拎功課時喺學校門口同校長傾多幾句，燒腩仔就忽然擰轉身同艾菲講bye bye，之後仲唔願跟艾菲走添，well...其實佢都唔係唔鐘意返學吖﹗
Day 19 3/11/2014
返學尚算順利嘅一日，但到放學又係扭唔停，車仔呢招已經唔work，最終都係keep住彊持加喊唔停咁拖佢返屋企，再加上艾菲D感冒開始發出來，實在無精神同佢嘈，入到屋為咗唔除鞋又瞓咗喺地下喊，艾菲就決定唔理佢由佢扭，終於喊吓喊吓就咁瞓著，睇見此情此景，真係都唔知好嬲定好笑啦﹗
Day 20 4/11/2014
艾菲又係朝早有事出咗去，要燒腩仔爺爺嫲嫲過來幫手照顧燒腩仔同湊返學，之前一晚已經提燒腩仔唔可以蝦佢哋，講完之後好似好咗D合作過上星期，但送完返學之後嫲嫲就話佢入學校時叫住「我唔返學」同爆喊，聽見佢又喊返艾菲已經feel到佢呢日嘅情緒應該唔多OK。
到接放學時間，老師就話佢之前排洗時著褲唔小心差錯腳跌親喊，艾菲接完佢當然都慰問一番啦，但佢對艾菲嘅關心唔多在乎，之後同佢去圖書閣借書仲忽然發脾氣摞地唔起身，艾菲講到口水乾都唔理，但隔離班老師經過叫佢起身就即起，借完書就輪到唔肯換鞋，仲大大聲話「唔返屋企」，要嬸嬸過來幫手先終於搞掂出到學校門口（又係艾菲講一百句都唔夠人哋講一句有用）。
離開學校之後當然又係keep住同艾菲彊持話唔行啦，其實艾菲都唔係唔理解佢放學好攰唔想行，就算真係抱唔到佢行足全程，都有諗過抱佢行一段路，不過佢呢日嘅態度實在太惡劣，所以艾菲選擇堅持唔可以蹤容佢呢D行為，明明之前夾硬拖佢走都會跟住行，但呢日連夾硬拖都唔肯行，終於兩母子喺條街到拖拖拉拉，艾菲要好似拖屍咁夾佢返屋企，一段明明二十分鐘就行完嘅路，我哋搞咗一個鐘先返到屋企。
返到屋企艾菲已經攰到散咗咁滯，只係想快D幫燒腩仔換好衫就掟佢上床瞓晏覺，點知佢今次就為咗唔肯擺返好對鞋而扭，終於又係趴喺地下瞓著咗，而艾菲望住佢都終於忍唔住喊咗出來，已經返咗一個月學，燒腩仔D壞情緒毫無改善仲變本加厲，仲要好明顯係對住艾菲先會特別扭特別唔合作，無論用咩方法氹都無用，到底艾菲一直堅持唔蹤燒腩仔嘅教仔方法到底啱唔啱呢？係平日太強硬導致宜家呢個反效果吖？還是佢不過未適應返學嘅生活因不安而剩機發難？艾菲真係覺得好氣餒，甚至有一刻閃過退學唔讀嘅念頭（因為已經有另一間幼稚園收咗佢讀K）。
後記：
之後米高放咗一日假負責湊燒腩仔返學放學，燒腩仔爺爺嫲嫲都過來湊多一次燒腩仔返學，佢都開始對住佢哋狂扭同發脾氣，或者...佢唔係只針對艾菲一個，可能只係知道艾菲最錫佢，所以發脾氣都發得毫無保留掛...
而艾菲同其他有經驗嘅媽媽級朋友交流後，知道大家嘅小朋友初返學時都有唔多唔少嘅情緒問題，有D會係咁喊同叫住唔返學，有D就放學之後狂嗲爸爸媽媽，不過燒腩仔就用發脾氣同搞對抗嘅方式來發洩姐，只要艾菲能夠堅持落去，終有一日燒腩腩仔係會回復正常㗎！
N班開學回顧：
Week 1
Week 2
Week 3
沒有留言:
張貼留言