Day 11 22/10/2014
經過之前一日嘅惡劣戰況，艾菲呢朝直情誇張到唔想燒腩仔瞓醒起身，不過事實又點會有呢個可能吖，好彩呢個世界都仲有奇蹟發生，之前一晚飲咗七星茶後，燒腩仔呢日終於可以一覺瞓天光，瞓醒之後心情明顯唔差，雖然都有扭扭擰擰唔多合作，但氹吓氹吓咁都順利食飯換校服出門口，返到學校門口都仲有喊，但入到去坐低換鞋已經收聲。
到放學艾菲去接佢時，仲玩玩具玩到唔知艾菲已經來咗，之後換鞋離開學校都算順利，係去到天橋底又開始扭抱唔行，上咗一半樓梯之後企咗喺到同艾菲拉扯，好彩同學仔同媽咪喺另一邊上天橋時見到佢唔肯行，專登過來鼓勵佢幾句叫佢繼續行，結果佢又好開心咁追住同學仔行，唉...明明自己行到但硬要扭艾菲抱，艾菲講一百句都唔夠人哋講一句咁有效，連同學仔媽咪都話佢係明蝦艾菲，但既然佢都係自己行返屋企就算啦﹗
Day 12 23/10/2014
見佢之前一日飲完七星茶有效，就決定畀佢飲多一次，呢晚都係順利咁一覺瞓天光，朝早起身尚算合作，只係食飯時同佢開咗場大戰，最終都係狠心由佢餓，由佢食半碗薯蓉都無就去返學，呢日去到學校門口都想喊想喊咁，但同學仔媽咪鼓勵咗佢幾句之後就無喊到，好平靜咁跟老師入咗學校。
由於之前一星期實在畀燒腩仔搞到好stress，所以的起心肝決定要畀自己鬆一鬆，湊咗燒腩仔返學之後就一個人去咗又一城食tea行街，咁啱見到pageone減價就買咗本tomica磁石貼遊戲書畀燒腩仔大個D玩，唔...唔係話要放自己幾個鐘假㗎咩？點解最終都係買嘢畀個仔？
之後準時去學校接佢放學，仲預先準備咗盒維他奶仔喺身，諗住必要時用來鼓勵佢行上天橋，而今次艾菲都專登等到出咗學校門口先畀佢，但佢都係顧住飲唔多肯行，結果未到天橋位已經畀佢飲晒，好彩佢啜住個已經飲完嘅維他奶盒都叫做勉強肯行（行得勁慢），如果唔係艾菲就真係偷雞唔到蝕渣米啦﹗
Day 13 24/10/2014
一早起身同返學都算順利，把口雖然仲提住話唔返學，但去到學校門口都無喊，好乖咁跟老師入學校，見到佢情緒終於平伏返，艾菲真係覺得鬆一口氣放心好多，然後買定件蛋糕去接燒腩仔放學，明明返學前講好上完天橋先有得食，但到放學就乜都唔記得，未上天橋已經嘈住要即刻食，艾菲唯有畀佢食住一啖先，然後一唔肯行又畀佢食一啖，最終都成功呃到佢行晒成條天橋，不過返到屋企又即刻發難乜都話唔好囉﹗唉...
Day 14 27/10/2014
又一個weekend過後嘅星期一，好叻仔咁返學無喊無扭，於是放學時艾菲就諗住拎枝益力多去奬佢，點知...無耐性嘅燒腩仔死都唔肯等到上完天橋先飲，一出學校門口就發脾氣唔肯行想逼艾菲即刻畀佢飲，仲要過過吓馬路忽然停咗喺路中間扭，見到佢咁過份嘅行為，艾菲當然堅持唔畀住，再拉佢埋一邊解釋佢知喺馬路扭計有幾危險，但發難中嘅燒腩仔完全當艾菲無到，仲一句「唔要媽媽講」叫艾菲收聲，嬲到艾菲即刻收返埋枝益力多，然後一句嘢都無再同佢講，就咁拉佢返屋企。
燒腩仔大概都feel到艾菲係堅嬲，所以唔敢出聲默默咁跟住艾菲行，但行到後段可能真係攰就越行越慢，仲開始眼濕濕行到想喊想喊咁，但艾菲都堅持唔理唔同佢講嘢，返到入屋就即刻爆喊，喊咗足足一個鐘都唔肯收聲，亦唔會主動同艾菲道歉，最終都要艾菲埋去安撫返再講道理先收到科。
Day 15 28/10/2014
呢日艾菲一早有嘢做出咗去，由燒腩仔爺爺嫲嫲負責照顧燒腩仔同湊返學，事前艾菲都估燒腩仔實會蝦佢哋，不過都叫做順利換校服出門口返學，去到學校門口仲識得主動叫同學仔媽咪添，醒到呢...
由於星期四嘅tea實在太爽，所以呢日都決定畀自己抖吓氣，做完嘢無即刻趕返屋企，反而走咗去試阿坤，再整返杯smoothie，等自己都可以鬆一鬆。
之後見時間尚早，心血來潮專登提早去學校門口呆等半個鐘，同D姐姐鬥快排隊接放學，終於成功排到第一諗住可以畀個驚喜燒腩仔，點知佢唔領情不特止，同佢換鞋時已經扭扭擰擰，問多兩句又講「唔要媽媽講」，一出學校門口就話「唔返屋企」，千辛萬苦氹佢行咗一段路，跟住忽然話唔行平時行開條路上天橋，不過去到另一邊天橋底都係話唔行，結果要行回頭路去返原先條路上天橋，然後上到一半又係唔行，同佢講道理唔啱聽就講「唔要媽媽講」，終於逼到艾菲發火，又係唔出聲夾硬拉佢返屋企就算﹗
N班開學回顧：
Week 1
Week 2
沒有留言:
張貼留言