粟米收成時

六月時寫嘅《小小農夫》提過我哋住嘅屋苑有種植計劃，我哋種咗一棵粟米，起初喺艾菲呢個種植邪神嘅照料下，種到佢只係得返半塊葉，後來我哋改由米高負責淋水施肥，粟米BB居然奇蹟地生存到，仲一直健健康康咁快高長大，到八月初已經生得高過燒腩仔，月尾時仲卒之生咗條粟米出來﹗



可惜九月中一個颱風海鷗，粟米BB畀風吹到彎晒，米高第二晚一個人落去淋水時，聽完其他一齊種粟米嘅街坊意見，就決定提早將未完全成熟嘅粟米BB收割落來，拿拿聲上樓拉埋燒腩仔同艾菲落去進行收割儀式，起初燒腩仔見到米高用力扯粟米BB落來都有D驚，似係擔心爸爸傷害佢棵粟米BB咁嘅樣，後尾艾菲同佢解釋完就好開心，雙手捧住粟米BB跑返屋企，仲情不自禁咁一口咬落去以為可以即刻食添﹗



艾菲解釋佢知粟米係唔可以連葉食，再喺佢面前拆開D粟米葉，不過艾菲都係今次種完粟米先知，D粟米原來係一粒一粒咁生出來，由於我哋棵粟米BB未成熟，就只係得極少粟米粒。



即刻將粟米BB蒸咗來畀燒腩仔做宵夜，佢食得好滋味仲話咁快食完，不過艾菲偷食過一粒就覺得好難食囉...



經過今次種粟米嘅經驗，艾菲發現燒腩仔不知不覺間已經培養咗照顧植物嘅責任感，每晚食完飯都會主動同我哋講落去搵粟米BB，見到艾菲留起D洗米水會識得話畀粟米BB飲，落到去又會同粟米BB say hello同搶住淋水，所以見到屋苑通告有第二輪種植計劃，艾菲又第一時間報名參加，而今次我哋種嘅就係燒腩仔都好鐘意食嘅蘿蔔（無記錯應該係日本大根種來），仲一次過可以種六個添﹗



種蘿蔔嘅感覺好似容易過粟米咁，只係一個月左右已經由一粒種子變到咁大棵，希望你哋喺米高同燒腩仔嘅悉心照料下會快高長大，等燒腩仔可以一嚐自家種蘿蔔嘅味道啦﹗