電車媽媽

之前寫遊記時都提過，艾菲係有D電車迷嘅傾向，唔知點解好鐘意日本D火車，去親日本旅行都會影D火車相，甚至想當年仲有時間打機時，唔怕悶專登買隻電車Go嘅game來打，到燒腩仔宜家大個鐘意車，艾菲當然都不忘涂毒吓佢，出街成日叫佢睇火車地鐵，終於令佢越來越有電車媽媽之風，坐親火車都會好開心。



燒腩仔生日時，艾菲專登叫姨媽送套東鐵Plarail畀佢做禮物，等我哋兩母子都有得一齊玩，之後朋友見燒腩仔咁鐘意火車，又買多咗兩架Plarail火車送畀佢，咁艾菲見朋友咁有心送大禮，忍唔到手又敗多套路軌套裝來襯返兩架日本火車，唔...原來Plarail毒同Tomica毒一樣咁毒，開始咗第一架Plarail，你自自然然就會買第二架第三架同無限條路軌...



不過當你睇見個製成品，見到燒腩仔自己揀嘅山手線鬆弛熊紀念版，路過呢個艾菲新買嘅踏切裝置，成個setting實在太有風味啦﹗（唔好意思，電車媽媽自我感覺良好中:P）

  

其實...艾菲堅持買過set路軌，除咗因為覺得山手線同蒸氣火車停喺羅湖站嘅感覺太騎呢，亦係為咗呢個可以畀燒腩仔玩火車捐山窿嘅隧道，艾菲好好好肯定佢會爆like﹗



呠﹗呠﹗蒸氣火車人吉號埋站啦﹗



燒腩仔星期日瞓醒起身就玩咗成朝火車，喺爸爸嘅教導下仲識得拎D Tomica車仔橫過踏切嘅地方添﹗叻叻﹗



玩玩吓仲畀佢發現架山手線係可以手動開門㗎﹗



燒腩仔：我真係好鐘意睇D火車行來行去，睇極都唔厭㗎﹗