22/11/2014
第八回合：香港創價幼稚園 9:00
呢間係艾菲第二心儀嘅學校，皆因艾菲未生燒腩仔前，已經喺前上司嘅口中認識到呢間學校，佢嘅一對孖仔喺到讀得好開心，唔多功課唔多節日慶祝扮嘢活動（簡單D講係唔會難為家長），課程有別於傳統名校，唔一定要小朋友坐定定先叫乖，再加上教育局評核報告都對學校有讚無彈，所以明知呢間學校有好多人報（好似話上年都五千幾個application，今年龍B就更加唔止呢個數啦），艾菲都要試一試睇吓會唔會咁好彩入到。
唔知係唔係艾菲早報名呢，我哋獲安排第一日第一個time slot in，可惜呢日燒腩仔因為咳而成晚瞓吓醒吓，而艾菲就為咗準備呢日interview而搞到好夜先瞓（因為明知呢間會問家長，亦比較著重家長嘅諗法，所以有D壓力啦），所以呢朝我哋成家都明顯呆滯mode。
坐的士去到見學校仲未開門，唯有去對面公園玩陣畀佢warm up吓，學校準時8:45畀小朋友入，因為我哋趕住有下場interview，就拿拿聲排隊入學校，上到二樓課室未九點已經見緊第一個，我哋排第三個要坐出面等陣，期間坐唔定嘅燒腩仔睇完地下D跳飛機公仔，又走去撩靚女miss傾偈，艾菲都真係不得不讚吓呢間學校嘅校長同老師，全部都好靚女同nice，睇到我哋一家好賞心悅目呢﹗kakaka...
可能佢哋年年都咁多人報名啦，所以老師控制時間方面都幾OK，真係如BK媽媽講5分鐘一個，所以我哋9:10入去，9:15已經出返來，入到課室燒腩仔笑晒口咁叫老師早晨，氹到老師都要講句「你笑得好開心喎」，然後自動波坐埋枱，老師問佢咩名即答，跟住仲快過老師叫已經玩緊個手抓板，玩完老師就拎咗張圖出來，考佢圖入面D小朋友做緊咩，答得慢但大部分都答到，不過佢再一次衰喺隻狗到答唔到（艾菲自從in完培道之後，已經keep住成星期教佢woo woo係叫woo woo狗，點知都係唔work...），同將個紥辮嘅女仔講咗做男仔。
考完燒腩仔，老師就轉問艾菲同米高問題，首先係問艾菲覺得燒腩仔有咩優點，因為有準備過都叫做答得到，然後轉向米高問對燒腩仔嘅幼稚園有咩期望，咁艾菲事前已經下令叫佢做定功課，佢都成功答到，到最後老師就問返艾菲創價係唔係佢哋首選，嘩﹗呢條嘅答案梗係點都話係首選啦﹗但唔知做咩嗰一刻嘅艾菲唔識爭取機會答吓對佢哋理念嘅睇法，而走去講咗其他嘢，事後諗返就覺得自己答得唔好，激死﹗
問完我哋之後interview都結束，燒腩仔有好乖咁同老師講bye bye，亦有幫手拍自己同艾菲張凳，本身佢哋三樓禮堂有得玩可以剩機參觀吓，但礙於我哋真係趕住要走，所以離開課室後第一時間就衝出學校，見校長個樣好似覺得我哋走得太快咁，都唔知我哋係唔係呢日第一個走嘅家庭呢，嘻...
第九回合：九龍靈糧堂幼稚園 9:30
口碑好同受歡迎嘅happy school（簡介會時校長話今年數到二千個application，但佢哋只得180個位），見屋企坐巴士過來都唔使十五分鐘，就同燒腩仔報埋碰吓運氣，本來以為撞咗創價個interview要放棄，不過唔心息嘅艾菲喺BK見D媽媽話創價只in 5分鐘，而我哋又係第一批見唔會搞太耐，再加上兩間學校嘅距離其實唔遠，諗住只要唔遲太多都來試一試，所以全部文件一早帶齊喺身，結果我哋9:15離開創價，抱住燒腩仔急步行過來，準時9:30到學校大堂。
喺大堂登記同對完文件之後，就可以入去玩具房到玩，玩具房坐滿小朋友，家長同工人姐姐（其實...艾菲唔係好明面試點解要帶埋姐姐來囉...），標準車迷燒腩仔當然係勁想玩車啦，但D車一直畀另一個小朋友hold住，艾菲就氹佢玩住積木同動物先，等咗陣之後玩車位小朋友走咗，燒腩仔就埋去拎咗一架埋來玩，不過玩咗無耐就忽然畀隔離位個男仔一手搶咗，燒腩仔個樣明顯不滿但無出聲話人，咁艾菲見佢媽媽全程只顧住㩒電話都唔多理個仔，只好氹燒腩仔玩返眼前嘅積木，好不容易終於喺呢到捱過咗30分鐘。
老師叫名之後我哋就要上一層樓梯去樓上等候區再等多陣，呢到有個書櫃仔，小朋友可以隨意睇，燒腩仔當然都唔執輸，即刻埋去拎返本來睇啦，不過基本上都無乜邊本書吸引到佢，每本書拎埋來翻兩翻就話睇完要換過另一本，好彩等咗十分鐘左右就入得去面試區。
入到去都仲要再等多陣，D staff就安排艾菲同燒腩仔一前一後咁坐喺其中一格嘅門口，明顯燒腩仔已經等得唔多耐煩，忽然一個箭步就想型爆咁自己衝入課室，好彩就喺艾菲勸阻期間老師話我哋入得啦﹗
入到去艾菲同米高夾住燒腩仔坐，有同老師講早晨，都有答老師問題，咩名邊個同佢來，食物圖片，物件名稱同用途，簡單指令都全部答到做到零出錯，不過唔知係唔係我哋坐門口位，燒腩仔初時表現勁唔專心，答問題時對眼一直望住門外，到中段先好返D有望老師，但今次就笑容欠燦爛啦（都有笑但無之前笑得咁甜美囉）﹗
之後老師轉問我哋對燒腩仔幼稚園嘅期望，艾菲同米高都要分別講吓自己睇法，咁有準備過都叫做答到，但因為呢日keep住呆滯mode，艾菲覺得自己係可以答得更好囉...問完家長老師就送咗張貼紙畀燒腩仔話in完，燒腩仔有雙手拎同講謝謝，再拍凳同老師講bye bye，老師勁nice好正面咁舉起手指公讚燒腩仔叻叻﹗
一口氣連見兩間，我哋一家都已經耗盡晒所有力氣，所以搞掂就急急腳打道回府補眠多陣，但難得燒腩仔唔夠瞓都無發癲失控，面試時又表現正正常常，我哋都無忘記要請佢食返D好嘢來做奬勵嘅諾言，而今次我哋就奬燒腩仔食晒成個叉燒包啦﹗YEAH！
沒有留言:
張貼留言