29/11/2014
第十回合：聖公會聖三一堂曾肇添幼稚園 8:45
呢間係考慮咗好耐先決定報嘅學校，因為報呢間前已經報咗11間學校，當時已經畀米高話緊艾菲怪獸，但半日有學券仲要一條龍加Happy School實在好吸引，再加上我哋屋企樓上原來有個哥哥仔讀緊，即學校真係睇小朋友表現，而唔係睇學生家庭背景來收生啦，經米高同意後艾菲就喺截止報名當日朝早去交表，以為咁遲交表實係安排下午先見啦，點知畀咗最早個time slot我哋，等我哋可以一朝早趕三場。
呢晚燒腩仔算瞓得OK，不過七點我哋未叫佢已經自己醒咗，食完早餐換好衫我哋就出發，有人猛話停唔到車又話咁近怕畀的士司機鬧，結果我哋一家三口坐巴士去，上車十分鐘已經落車堅係近，落車穿過公園已經到學校，八點半到但未入得要排隊，燒腩仔有D企唔定，要我哋輪流帶佢行吓，當佢發現禮堂入面有個超邪惡嘅滑梯同彈床之後，就勁開心咁返埋去排隊（因為艾菲話要乖老師先畀玩），等咗十分鐘左右終於開始登記。
好彩我哋係第一批見，登記完已經可以直接去課室門口排隊，否則畀燒腩仔扭玩滑梯就大件事﹗去到課室門口，我哋都未貼好label老師就話入得（我哋係同組最後一個登記），interview只可以一個家長陪，咁呢D重任梗係又係艾菲做啦，一組六個小朋友對三個老師，全程只係小朋友玩唔使問家長嘢。
我哋最後一個入課室，企都未企定負責燒腩仔個老師就埋來同佢傾偈（其他老師又無同其他小朋友傾㗎喎），問佢咩名有答，但問佢邊個同佢來就笑而不答，由於當時艾菲仲整緊自己個label，所以只係抬頭問咗燒腩仔一句「我係邊個」，不過燒腩仔望吓我都係無答，然後已經發現咗playmat旁嘅大lego想撲埋去玩，呢個時候第二個老師就叫小朋友坐低喺playmat聽故事，咁負責燒腩仔個老師就叫佢坐低先，迷茫中嘅燒腩仔真係即刻聽話坐低，但個人係向住佢勁想玩嘅大lego，要艾菲出手指返畀佢知向邊到坐先識轉身坐返好。
老師講咗個簡單故事，燒腩仔有專心聽，但老師問大家問題就無搶住答，不過最後叫起身扮飛機行個圈都有跟住做，然後老師叫大家隨意玩玩具，其他小朋友即刻埋枱玩，燒腩仔二話不說就撲去砌大lego，呢個時候負責佢個老師又行咗埋來，問佢砌緊咩佢無答，但叫佢疊高，砌實D或者畀一舊老師都有跟住指示做，之後老師行開in第二個小朋友，就叫艾菲試吓帶佢去隔離拍波。
起初燒腩仔係砌lego砌到唔肯放手，後尾艾菲同佢一齊收拾咗一半，老師又再埋來同佢傾咗陣，佢終於肯跟老師去拍波，明顯係考小朋友嘅大肌肉發展，燒腩仔跳得唔太叻，但都有拍到D波，同老師一齊拍咗陣， 老師就叫我哋玩其他嘢，但當時枱面已經無位畀我哋坐落去，艾菲唯有帶燒腩仔去課室側邊畫畫。
畫咗一陣鬧鐘就響，老師宣布interview完結，拎咗籃波出來送畀小朋友，燒腩仔自己揀咗個綠色，有同老師講謝謝，等老師開門期間艾菲話出去可以玩滑梯，燒腩仔好似失憶咁一臉疑惑走咗去門口想望，老師知道燒腩仔想睇出面有無滑梯，就好熱情咁抱起咗燒腩仔喺門口個窗到望出去再問佢有無滑梯，燒腩仔即刻好開心咁話畀老師知「有滑梯呀」。
唔知點解...女人嘅直覺話畀艾菲知呢個老師都幾鐘意燒腩仔（佢對另一個都係佢負責嘅小朋友明顯無咁熱情㗎），不過佢呢朝狀態明顯一般，性格巨星上身咁，鐘意就聽你講唔鐘意就唔理你，艾菲都唔敢抱任何期望啦，出到去問咗米高可以玩十分鐘，就放佢去玩滑梯，之後仲玩埋彈床，不過趕住去下一間，所以無參觀埋樓上校舍就要走。
第十一回合：基督教中心幼稚園 9:50
口碑好好嘅happy school，不過本身有N所以K1位其實唔多，見都係我哋杯茶就即管報名一試，無咩期望燒腩仔會突圍而出，in完就更加覺得學校無可能收佢，除非學校鐘意挑戰自己，buy佢夠搞事唱反調，事關佢來到呢到完全唔扮嘢，好徹底咁做返平時嘅自己。
又係怕截唔到的士同畀司機鬧（其實艾菲好唔明點解米高成日話會畀司機鬧，真係咁大個女都未試過喎，最多拒載唔接你生意姐），所以米高建議我哋坐巴士過去仲好，咁其實坐兩三個站就落車，行過去都係五分鐘左右，入到去艾菲先入房登記，之後就叫我哋喺出面邊玩邊等，燒腩仔見到車就即時衝埋去，明明有好多架車任玩，但佢堅持要玩人哋玩緊架救護車，艾菲唯有叫佢等陣，好彩佢都叫做肯聽，之後見佢玩車玩到癲，廢事一陣到佢in時唔肯走，唯有盡早拉佢去公園仔到玩其他嘢冷靜吓，公園仔都有邪惡的滑梯，不過全部要爬上去先玩到，對燒腩仔來講有少少難度，加上有兩個女仔出手唔畀佢玩，所以佢玩咗兩次就無得再玩，kakakaka...
等咗十五分鐘左右就聽到叫佢名，老師好有禮貎咁親自出來接我哋入去，今次艾菲同米高可以一齊入去，老師叫燒腩仔坐中間張凳，但燒腩仔就堅持坐最側邊張凳，老師見艾菲出聲叫佢都仲唔郁就笑住話「由佢啦」（唉…唔係咁講仲可以點吖），之後老師問佢咩名有答，考物件都答到，手抓板，認顏色都無問題，但玩玩吓忽然呯一聲，燒腩仔成個跌咗落地，嗰一吓艾菲同米高真係O晒咀，原來佢個pat pat一直無坐好，所以玩得興奮得滯就跣咗落地。>.<
跟住老師考佢穿珠仔，燒腩仔樣樣發展都好，就係小肌肉一直都好普通，其實由上年見N開始已經同佢練穿珠仔，用有木條輔助嘅多數都得，但鞋帶呢就時得時唔得，好睇佢當日有無心情同耐性，所以老師叫佢穿珠仔艾菲都知衰硬，不過都要由佢自己試吓，結果當然係穿唔到，只係拎住粒珠仔喺到玩，老師就問艾菲平日同燒腩仔玩咩，艾菲答都有玩穿珠但坦白講佢係時得時唔得，老師聽完就叫艾菲幫吓佢，礙於佢一直拎住粒珠玩唔肯畀艾菲，艾菲唯有話「你可唔可以幫我穿粒珠落去呀」，燒腩仔好順口就應咗艾菲一句「唔可以」，老師聽到都忍唔住笑，之後佢出手幫燒腩仔先叫做夾硬穿咗。
考完燒腩仔就輪到問家長點解揀佢哋學校，好彩艾菲都有事先做定功課，知道佢哋會考家長，所以熟讀佢哋嘅辦學理念，呢次艾菲覺得自己都答得唔錯㗎，不過燒腩仔咁嘅表現，實在係浪費艾菲嘅一番心機呀﹗
最後老師話要送個波畀燒腩仔，叫燒腩仔喺佢身後箱波到自己揀顏色，燒腩仔自己揀咗個紅色，有同老師講謝謝，之後走都有講bye bye同拍凳，出到去我哋直奔正門想逃離現場，校長仲截住我哋話有時間可以玩多陣添，哈哈...再留多陣我估燒腩仔會原形筆露㗎啦，都係快D走等佢休息吓冷靜吓再去下場啦﹗
沒有留言:
張貼留言