26個月

Hi! 媽媽又唔記得咗上星期日係我26個月大嘅日子啦﹗佢話呢排只記得我幾時interview同D學校幾時放榜，記得爸爸呢排公司peak season好忙成日weekend唔得閒搞到佢都無得抖，記得自己就來生日同聖誕要安排定D活動畀我玩喎...真係無心肝㗎佢...



其實過咗兩歲之後，媽媽話我已經變成小朋友，都無咩特別大嘅轉變啦，呢個月嘅飲食狀況都係差唔多，只係揀飲擇食嘅情況好咗DD，終於肯食返菜（只限菜框唔食葉，可能因為出緊四隻犬齒牙痕，食菜框可以止吓痕掛），終於無再食到咁誓願（但到尾都係要催同餵），終於肯踏出第一步試食糖（艾菲：其實邊有阿媽要逼個仔食糖咁騎㗎？）。



瞓覺就比上個月好返D，不過因為返學後長期咳同流鼻水，所以多咗半夜咳醒大叫，但好快又會瞓返，通常十點幾入房搞到十一點先瞓，瞓到第二朝九點半起身，但好多時七點幾就跟爸爸醒，要媽媽過來陪我一齊瞓先肯瞓多陣， 又忽然要返媽媽陪瞓服務，仲會指定媽媽瞓邊個位，至於晏覺就每日放學返屋企先瞓，瞓一個鐘左右媽媽就會開歌叫我起身，例必扭一輪先出房食飯（所以要落街食飯一定要提早叫佢起身）。

活動能力方面大肌肉向來進展良好，以前唔鐘意嘅韆鞦同搖搖馬都會玩，甚至入錢會郁嘅車仔都唔再驚（之前係一見佢郁就即刻走佬），係小肌肉明顯差D，到宜家都未識得舉手指公做叻叻手勢，又成日唔肯用隻食指，例如擰樽蓋會唔知點解飛咗隻食指出來，而走去用咗中指嘅力，呢D都係媽媽話要大執嘅嘢，怕我之後大個揸筆寫字會有問題喎。

返學後學識咗點同小朋友相處，帶佢去公園玩識得排隊一個跟一個，又會話「一齊玩呀」同「要分享玩具呀」，講得出好多個同學仔名，每日放學仲會好熱情好主動咁同同學仔媽咪打招呼，見到同學仔扭計喊唔開心，又會好熱情咁叫住人哋個名想衝上去拖實人幫人（但同學仔就怕咗佢囉，kakaka...）。



自理能力都係咁上下，繼除褲著褲之外今個月學識咗除開胸衫（其實只係亂fing出來），返學會搶住自己揹書包，會主動拎水樽同拎鞋，至於potty training都叫做進展良好，但wee wee始終未有poo poo咁叻，喺屋企會主動話畀媽媽知wee wee，都試過幾次成功忍到入廁所除褲再對住青蛙仔（尿兜）先痾，簡中落街一陣可以冒險唔著片，不過飲得水多時就唔識忍搞到十分鐘wee一次，換底褲仔都換到媽媽傻。



把口係完全唔識收，由起身就講到瞓覺，就算媽媽話唔同我講嘢，我都仲會自言自語不停講，以前叫人要扭擰一陣先叫，宜家落樓時會主動同媽媽講「要叫姨姨呀 （樓下保安員）」，去爺爺嫲嫲同公公婆婆到時又會話「入屋要叫人嘛」（實情係畀媽媽話過先會咁講），見到D唔熟或者第一次見嘅人，媽媽話叫人都會跟住乖乖 地叫，基本上宜家咩都識講，好多時會跟媽媽口水尾同口音講嘢（艾菲：真係要慎言先得），有次去公園有兩隻狗仔衝埋來，我即刻就話「嚇死人咩」（艾菲音）， 爸爸媽媽聽完即刻笑到碌地。

呢期至愛就係問「呢個咩來㗎」，有時係明知答案都會勁問，爸爸媽媽答完我就會好認真咁「哦...」返聲來做回應，成日出街指住D車問咩來， 考到媽媽頭都大埋，自己自學識讀晒1-10嘅英文（只係youtube播過D歌仔佢聽無特登教），又係自己學識唱晒成首《London bridge is falling down》（但成日唱唱吓最尾一句會變咗中文版:P）同《Mary had a little lamb》，最近練緊唱《Baa Baa black sheep》（三首都完全無教過，只係日日都有播佢聽），媽媽就教咗我諗《靜夜思》同《三字經》嘅頭八句，我話咁快就已經記得晒，爸爸話我應該都係有D語言天份。



最後又到講情感發展，呢個月媽媽讚我乖咗好多，愛上返學後返學放學都好少會扭，就算扭都會氹得到，只係放學仲係成日話唔換鞋唔返屋企，寧願喺學校大堂行來行去都唔肯走，間中都會反反覆覆突然發作，喪喊唔停加咩都話唔好唔要同叫住「唔要媽媽講」，但情況都總算係開始受控。

去得interview多，連安全意識嘅問題都解決埋，宜家無再話驚去陌生地方唔肯入，就算陌生人同我講嘢，我諗兩諗都會怕怕醜醜咁答吓佢，最勁係唔再驚睇醫生，自己行入診所仲同醫生叔叔有傾有講，唔會再好似之前咁喊到死去活來（呢個咁重要嘅歴史時刻，之後有時間一定要blog返），老師同校長更加係我最信賴嘅人啦，就連放學會去邊，媽媽應承咗D咩，或者剪咗頭髮都會主動話畀老師知等佢哋讚我叻。