第十二回合：香港基督教服務處觀塘幼兒學校 11:40
呢間學校艾菲覺得可以用觀塘區神校來形容，區內極受歡迎兼口碑超好，個個家長都對學校有讚無彈，仲要係同燒腩仔返開嘅幼潛同一個辦學機構就更加有信心，本來上年都想同燒腩仔報N，但佢哋唔收細仔艾菲唯有今年報K，明知今年報K機會極微（1000個小朋友爭17個位﹗），再加上佢係全日制學校，都諗過放棄唔好浪費時間，但諗到讀唔讀到唔係由艾菲決定，而係睇燒腩仔自己嘅表現，所以決定報咗先算等個天決定。
唔知燒腩仔同呢間學校係唔係無咩緣呢？之前返Pario上幼潛時連續兩星期想上去交報名表（學校喺正Pario樓上），學校都裝修無人收表，到第三次終於有老師收表，燒腩仔就十問九唔應，只係肯揮手bye bye，到呢日interview難得無撞時間去到，以為佢會越戰越勇，點知佢狀態明顯超差，從佢嘅表現來睇，艾菲甚至懷疑佢唔鐘意呢間學校添﹗
離開基督教中心幼稚園之後，見有時間艾菲同米高又肚餓，就決定行返去九龍城食個早餐先再坐車去觀塘，睇燒腩仔嘅表現明顯feel到佢開始無電，艾菲有天真地諗過佢呢個時間可以抖一陣就好，但事實係佢點會肯瞓吖，我哋唯有早D去學校搏吓有無得早D in仲好。
為咗幫燒腩仔打氣，艾菲上學校前專登帶佢去返之前上幼潛個課室，話佢知佢至愛嘅幼潛老師上緊堂，只要去學校玩完就可以落來探幼潛老師，咁佢去到學校初時都叫做合作，艾菲填問券（明明之前交表時填咗，D問題都一模一樣），佢就同米高喺側邊玩積木，艾菲搞掂就帶咗佢去隔離玩車仔，點知又玩到唔願走，艾菲出盡法寶氹佢過對面玩滑梯都唔成功，好彩老師叫名時佢又OK肯去排隊喎。
之前米高聽完簡介會返來都有大約講過個流程，interview會分3 part，第一部分係考大肌肉，五個小朋友一齊入個班房玩，有隧道平衡木拋波波之類嘅玩意任玩，起初燒腩仔都表現正常，不停走來走去玩，後來玩拋波波玩到超high，咁拋晒D波艾菲就叫佢幫手執啦，點知hyper狀態嘅佢每執一個返來就大叫一聲先放返落籃，第一聲艾菲已經勸停佢，如是者執到第三個都係咁叫，艾菲唯有即刻捉佢玩其他嘢，唉...
完成第一部分就進入第二部分考小肌肉，老師帶咗我哋去另一個課室進行group in，小朋友圍枱坐前面，家長就坐後面，燒腩仔又揀咗側邊位來坐（佢之前in另一間學校都係揀同一個位，呢排艾菲諗吓諗吓先醒起，可能同佢喺學校都係坐側邊位有關），坐好後老師逐一同小朋友打招呼問咩名，燒腩仔好爽快就答咗，之後老師就拎咗各式各樣嘅玩具出來畀小朋友玩，但每次都係得三份，其他無玩具嘅小朋友就要坐定定等。
起初燒腩仔都好正常咁跟老師指示做，直至老師拎個穿珠嘅玩具出來（係...又係衰喺穿珠呀﹗﹗﹗），艾菲仲心諗老師今次用木柱穿，絕對係easy job啦，點知...燒腩仔唔肯聽老師指示將兩粒珠穿晒入木柱，而係穿完一粒又倒返出來，再穿另一粒入去，後尾叫佢將積木放返同一顏色嘅圖卡上又係故意擺錯（睇住佢第一吓喺啱，但專登擺去第二到），要老師再問先放返啱，到最後叫佢跟老師用積木砌個金字塔出來，就連艾菲忍唔住出聲提水佢都係唔理，堅持兩個兩個平排咁疊高就算，好彩老師之後送餅都有講謝謝，走時有講bye bye同拍凳。
完成頭兩部分後就到最後一部分見家長，起初艾菲以為係單對單見，問吓點解揀佢哋學校同點解揀全日制學校之類啦，點知原來連家長都係group in，老師問問題叫家長答，講就話唔一定逐個答，但來得in嘅就點會唔幫小朋友爭取呢，結果艾菲又硬住頭皮去發表一輪偉論，呼...真係仲辛苦過自己去見工呀...
完埋見家長呢部分interview就完成，得唔得艾菲都心知肚明啦（都係reject定waiting之分姐），所以走嘅時候係毫無壓力同包袱，好開心咁同燒腩仔落樓下Pario探幼潛老師，啱啱好係轉堂時間老師有5分鐘break，燒腩仔見到老師勁開心，仲以為自己有份上堂想衝入課室玩添，而老師都真係好細心，攬住燒腩仔傾咗陣就已經見到佢頸同鼻D濕疹紅點，又問咗燒腩仔返N嘅情況同畀咗D湊仔意見艾菲，之所以艾菲一直覺得燒腩仔學校D老師唔夠好就係咁解啦，對比實在太太太太太大啦﹗
之後老師要上堂，我哋就去咗另一邊影聖誕相，原來佢哋搞咗個聖誕家庭攝影比賽，中心佈置到好有聖誕feel，仲有好多聖誕衫同頭飾可以借來影相，只可惜燒腩仔唔肯著D聖誕衫，如果唔係出來效果肯定好靚﹗
沒有留言:
張貼留言