不一樣的十二月

掙扎咗好耐，到底應唔應該寫呢篇blog呢？陸續聽到blog友們嘅好消息，艾菲確實唔想掃大家慶，亦唔想大家擔心艾菲一家，但艾菲又覺得，要真正走出傷痛，先要面對自己真實感覺，否則唔會有人幫到自己...

十二月，係艾菲嘅生日月，仲有冬至同聖誕兩個大節，每年都係艾菲最期待嘅月份，今年亦唔例外，一早安排好節目準備好好慶祝，可惜因為「佢」嘅不辭而別，艾菲最終選擇咗返娘家避世靜養，連帶燒腩仔都只可以過一個冷冷清清嘅聖誕。

到宜家仲好記得生日前一日驗到條唔確實嘅線，經Dr Wong whatsapp confirm後，滿心歡喜以為係個天送畀艾菲嘅生日禮物，到生日後第二日流啡，Dr Wong解釋作小產唔代表真係會小產，仲幫艾菲照到個胎囊，艾菲同米高鬆一口氣以為係小事，直至四日後流紅去咗聯合睇急症，醫生話搵佢唔到都未死心，甚至留院一日等到第二朝婦產科醫生再照話唔confirm要抽血驗，結果懷孕指數只係得返25仲覺得會有奇蹟，終於到冬至當日朝早五點幾再突然流紅，艾菲先終於識得醒，叫醒米高問「佢係唔係要走啦」。

由有到無只係一星期嘅事，都未來得切開心「佢」已經話走就走，理智嘅艾菲當然知道「佢」嘅離開唔係自己嘅錯，如果「佢」本身係有問題，勉強留住「佢」對大家都無好處，而且「佢」喺六周呢個時候就走，艾菲仲可以自行排清唔需要入院塞藥或做手術，都係「佢」愛鍚艾菲嘅表現來，而且艾菲已經有燒腩仔，艾菲知道自己比好多人幸運。

不過現實嘅艾菲並無想像中堅強，想當日Dr Wong聽完艾菲嘅出血情況，只簡單whatsapp回覆一句「可能宜家排緊出來」，艾菲已經喊到死去活來，雖然之前入院都已經有晒心理準備，但到佢要走嘅一刻始終係十萬個唔捨得⋯

只有六周大嘅「佢」連人形心跳都未有，但殺傷力一D都唔細，望住「佢」留低嘅兩張超聲波相，嗰枝開始退色嘅驗孕棒，同張寫住預產期係2015年8月嘅懷孕證明書，仲有n次做陰超嘅難受感覺，只要諗起「佢」嘅一切都會忍唔住喊（包括寫呢篇blog嘅時候），每晚夜深人靜時都會特別掛住「佢」，會好傻咁覺得自己無用連個B都陀唔穩，會好唔忿氣問點解個天要對艾菲同米高咁殘忍，無端端俾個希望我哋又要忽然收返，會問係唔係自己唔適合再做媽媽⋯

唔覺唔覺，一星期就係咁捱過咗，生理上似乎開始回復正常，心理上就一直未能平伏，但艾菲知道再鑽牛角尖都係無用，日子始終要過，唔顧自己都要顧米高同燒腩仔，特別係知情嘅米高，佢絕對唔比艾菲好受，而任性嘅艾菲仲要堅決走返娘家抖，留低佢一個照顧燒腩仔，放假就趕頭趕命咁帶埋燒腩仔過來陪艾菲，難為佢竟然可以好豁達咁同艾菲講「有得抖你就抖多D」，等艾菲放心休息無後顧之憂，人生有好老公如此真係執到。

至於燒腩仔都算合作，對於媽媽突然離家出走表示理解，簡中會通屋走搵媽媽，但講佢知媽媽去咗婆婆到休息就唔會再嘈，無出現太大嘅抗拒搞事情況，有晚來陪艾菲瞓時仲突然殺出一句「燒腩仔愛媽媽」，感動到艾菲眼濕濕添。

所以凡事有失必有得，雖然無咗「佢」真係好痛好痛，痛到都唔知可以點樣去形容，但「佢」嘅離開亦令艾菲更感受到米高同燒腩仔嘅愛，所以為咗呢兩個至愛，艾菲知道自己要盡快好返，堅強勇敢咁爬返起身，一家人手拖手走埋以後嘅路，一齊面對將來嘅風風雨雨。