15/11/2014
第四回合：藍田靈糧幼稚園 8:30
呢個星期六有四間學校in，難得四間都無撞期（其實更難得係我哋報13間，13間都無撞時間去得晒），當然都盡量出席啦，不過唔撞時間嘅代價，就係要晨早起身出發，對於平日瞓到9:30先起身嘅燒腩仔來講，都真係有D難度㗎﹗
為咗唔好令燒腩仔咁辛苦，艾菲都有諗過放棄唔in，因為呢間本身有N直升，K1唔係得返好多位放出來，而且位置唔太就腳，我哋屋企只得一架等好耐嘅巴士到，畀佢咁好彩入到可能要考慮坐校車先掂（但艾菲個心一直想親自接送），不過佢個音樂教學又確係好吸引（之前都提過燒腩仔對音樂好敏感，一播歌發緊脾氣都會自動收火），最終米高支持見咗先算。
我哋坐的士過去， 八點左右已經到學校門口，見無人排隊唔想燒腩仔呆企，就去咗對面公園仔玩陣，然後學校門口喺8:15開始出現人龍，準時8:30放行，先喺大堂排隊登記，再跟老師入一間課室玩玩具同拎label，燒腩仔初時表現呆滯，叫早晨叫到蚊滋咁嘅聲，跟住到老師話收玩具排隊去另一間房時，佢突然發難大大聲話「唔收」（好彩呢part應該唔計分同無老師見到），繼而扭抱唔行，其實艾菲都畀佢呢一吓嚇親，米高即刻提艾菲出絕招山渣餅，艾菲拿拿聲收好佢份玩具，再拎半塊山渣餅出來賄賂佢，佢先乖乖自己排隊行去第二個課室。
入到第二個課室，有好多玩具同自製樂器，老師話大家自由玩，D小朋友隨即四散，有幾個衝去狂拍課室中間嘅自製鼓，燒腩仔就唔知做咩望住佢哋呆咗，連老師埋來同佢傾偈都無乜反應咁，好彩老師都醒目帶咗佢去玩後面嘅自製沙槌，經老師同艾菲嘅鼓勵後佢開始回復狀態，老師問咩就答咩仲要笑容十足（又畀老師讚佢好鐘意笑），叫佢做嘅全部task都做到，最驚喜係玩煮飯仔時老師叫佢搽jam，佢居然識得拎把刀搽落麵包到，而呢樣嘢係我哋從來無教過佢，屋企亦從未試過搽jam夾麵包，唯一係老師喺佢耳邊好似講秘密咁叫佢拎個杯畀米高佢無做，要用正常音量再同佢講一次先做。
期間老師有問艾菲邊個主力照顧燒腩仔，平日喺屋企同燒腩仔玩咩，之後就好突登咁叫艾菲同燒腩仔玩，佢就轉向米高問問題，問佢平日放假會同燒腩仔去邊之類，米高話老師好似刻意想試吓佢到底了唔了解個仔，咁呢d問題對於米高來講當然係easy job啦，皆因米高確係一有時間就帶燒腩仔四圍去玩嘛。
完咗呢一part，我哋又要排隊去另一個課室，之前上網search過話呢一part係一班小朋友聽音樂做動作，艾菲原先以為係好free小朋友可以四圍走跳舞咁，點知原來係要跟號碼排排坐，燒腩仔仲要對凳面貼住個9字相當好奇，經常移開自己個pat pat擰轉望（都唔知有無扣分），而老師唱嘅歌我哋亦從未聽過，再加上佢係以講故事嘅模式表達出來，所以燒腩仔都無畀到太大反應，唯一係一開始聽校歌時有好開心咁跟住一齊拍手（燒腩仔同學媽咪有提過艾菲水，話可以畀佢聽定佢哋學校校歌，interview時有反應好似會有分加，不過為咗唔好太刻意艾菲都只係前一晚畀燒腩仔聽咗兩次），其他都係做d唔做d咁啦。
最好笑係唱咗陣歌做咗陣動作之後，老師就叫大家起身扮火車，同坐喺課室角落嘅校長講bye bye，咁大家都好興奮咁跟住行出去，之後老師帶大隊出咗課室，然後就同我哋講可以喺側邊到門到離開，個感覺係突然到你唔信，一眾家長行到出去都好似唔知發生緊咩事咁你眼望我眼，而成個interview就咁突然完咗，艾菲同米高都O咗咀。
第五回合：九龍城浸信會幼稚園 10:00
由於in完第一間之後時間尚早，我哋就去附近商場食個早餐叉吓電先再出發，期間燒腩仔都係keep住搞事mode，所以米高堅持in埋呢間就儘快帶燒腩仔返屋企休息，自動放棄之後一間學校嘅interview，寧願畀佢瞓夠養足精神先去見今日最後一間學校（因為係艾菲最心儀嘅學校）。
呢間學校係艾菲無意中上網見到，唔太出名但大家都讚佢係happy school同唔難入，唯一唔ok就係學校環境比較殘舊，咁艾菲見由屋企坐巴士都係十五分鐘內直達咁方便就報埋，佢最特別之處係唔收報名費，連報名表都係面試日先收，面試時間要家長打電話去學校約，但我哋去到學校門口個staff只係叫我哋入教堂拎籌等，完全無check過我哋有無約時間，先到就有得先上學校in，即唔跟約定時間去其實都ok喎。
入到教堂係估你唔到咁人山人海，等咗二十分鐘左右終於到我哋，期間艾菲已經出動晒所有法寶，山渣餅，車同圖書，但燒腩仔都係超失控咁爬來爬去，後尾仲自己一個衝咗出去，艾菲唯有順勢畀佢圍住教堂走一圈先返來等，上到waiting room都係咁上下情況，仲夠膽死玩推枱叫極都唔肯停，好似有一吓仲摞地添呀，好彩呢到除咗叫名時係無老師睇住，如果唔係一定扣晒分﹗
以為佢咁嘅狀態實衰硬啦，點知到見老師時又突然上身喎，老師問叫咩名，邊個同佢來都答得快而準，之後老師拎個真橙同蘋果出來都無答錯，老師考完眼耳口鼻再考佢毛巾又識答（又係艾菲無特別教過），仲識得跟老師指示拎條毛巾幫公仔抹咀，全程只需五分鐘左右就完成晒全部task，超勁咁一d錯漏都無﹗
由於我哋決定放棄之後間學校，所以就有時間可以輕輕鬆鬆咁參觀吓學校，基本上都係網上同樣嘅comment，學校環境同d設施係有d殘舊，不過地方其實算幾大，而且佢有兩個net teacher，仲有成套迪士尼美語世界嘅教材提供，感覺都係ok唔差，不過佢考嘅嘢咁易，相信十個有九個都會答啱做到，所以艾菲都唔敢抱太大期望啦（後尾上BK見有媽媽話當日有800個小朋友見，但學校只有85個位咋）﹗
第六回合：天主教彩霞邨潔心幼稚園 11:30 （自動棄權）
呢間係區內口碑最好嘅學校，同區內某間名小學有聯繫，而且超近艾菲屋企，行過去十分鐘內一定到，所以之前一年同燒腩仔搵N時己經決定今年一定要報，點知艾菲八月尾時打電話去學校問報名詳情，接電話嘅職員有d耍太極嘅感覺，到親身交報名表時收報名表位姐姐亦有d黑面，就連當時路過嘅老師or校長都感覺唔太友善同有愛心，再加上當日排隊交報名表時，十個有九個都係講廣東話唔正或者講普通話嘅新香港人（第十個咪艾菲囉），交完表艾菲已經即刻同米高講可以放棄呢間學校（所以艾菲之前成日話要多d去學校feel吓間學校啱唔啱自己小朋友）。
原先見時間唔撞又咁近屋企，唔心息嘅艾菲都諗住交咗報名費就去玩吓見識吓，但米高怕燒腩仔一日見四間太辛苦，最終得不償失連之後間最心儀嘅學校interview都衰埋，就極力勸艾菲打消念頭，寧願留返多d時間畀燒腩仔休息叉電，咁見佢朝早兩間學校interview時都的確有d唔夠瞓搞事feel，艾菲都明白無謂難為燒腩仔，乖乖聽米高話返屋企齊齊小睡片刻再出動。
沒有留言:
張貼留言